Ciddi hazırlıq işləri aparılmalıdır

Qalib QHT rəhbərləri ilə layihələrin müzakirəsi aparılıb

Dünən Prezident yanında QHT-lərə Dövlət Dəstəyi Şurasında 2009-cu il maliyyə yardımı müsabiqəsinin qalibi olmuş 46 layihənin rəhbərləri ilə görüş keçirilib.

Görüşdə Ermənistan-Azərbaycan, Dağlıq Qarabağ münaqişəsi ilə bağlı Azərbaycanın ədalətli mövqeyinin xarici ölkələrdə və beynəlxalq təşkilatlarda təbliği və müdafiəsi, sosial problemlərin həllinə dəstək, qaçqın və məcburi köçkünlərin, əlil, veteran və şəhid ailələrinin sosial problemlərinin həllinə kömək məsələləri müzakirə olunub.

Şuradan verilən məlumata görə, katibliyin icraçı direktoru Fərasət Qurbanov layihələrin icrasında effektivliyinin təmin olunması üçün ciddi hazırlıq işlərinin aparılmasını və görülən tədbirlərə yardımçı münasibətin bəslənməsini vacib sayıb. O həmçinin hesabatlarda, donor-resipient məsələlərində QHT rəhbərlərini məsuliyyətli və dəqiq olmağa çağırıb.

Çıxış edən Şura üzvü Vüqar Qədirli bildirib ki, təşkilatlar donorun müqavilə tələblərinə və şərtlərinə əməl etməlidirlər. Şura üzvü layihələrin icrasına müxtəlif maneələrin yarandığı təqdirdə QHT-lərə dəstək verəcəklərini deyib.

Belə görüşlərin əhəmiyyətindən danışan QHT rəhbərləri Məhərrəm Zülfüqarlı, Etimad Əsədov, Faiq İsmayılov, İradə Rzazadə, müzakirə edilən məsələlərə öz münasibətlərini bildiriblər.

Firdovsi

Şərq.- 2009.- 11 iyun.- S. 4.