Müxalifət partiyaları da gənclərə və qadınlara güvənir

Bələdiyyə seçkilərində onların imkanlarından istifadə olunacaq

Yeni Azərbaycan Partiyası (YAP) bələdiyyələrdə daha çox qadınların və gənclərin təmsil olunmasının tərəfdarıdır. YAP-ın icraçı katibi Əli Əhmədov bu səbəbdən də qarşıdan gələn bələdiyyə seçkilərində partiyanın namizədləri sırasında daha çox qadınların və gənclərin üstünlük təşkil edəcəyini istisna etməyib. Maraqlıdır, bələdiyyə seçkilərində iştiraka qərar vermiş digər partiyalar bununla bağlı nə düşünür?

ADP-nin sədr müavini Həsrət Rüstəmov:

- Bələdiyyələrə maraq partiyada o qədər də çox deyil. Bunun səbəbi bələdiyyələrin statusu və keçirilən seçkilərlə bağlıdır. Partiya üzvləri nisbətən iri bələdiyyələrdə mübarizəyə qatılmağa daha maraqlıdırlar. Biz hələ ki, partiyadaşlarımızı yaş və cinsi ilə əlaqədar diferensiya etməmişik. Bundan başqa bu şüarla çıxış etmək partiyanın imkanları xaricindədir. Reallığı nəzərə alsaq, təşkilatda qadınların və gənclərin sayı baxımından belə bir məsələni şüar kimi götürmək düzgün olmazdı. İqtidarın imkanlarından fərqli olaraq müxalifət qurumlarında bu imkan azdır. Biz yaşından, cinsindən asılı olmayaraq bələdiyyə üzrə seçilmək imkanı daha geniş olan şəxsləri namizədlər sırasına salmağa çalışacağıq.

AMİP-in mətbuat katibi Əli Orucov bildirdi ki, onlarda bu məsələdə məhdudiyyət olmayacaq.

- Düzdür, AMİP fəaliyyətində gənclərə imkan verir və hesab edirəm ki, seçkilərdə onların potensialından, enerjisindən istifadə etmək lazımdır. Qadınlar da hərzamankı kimi üstün mövqelərini qoruyub saxlayıblar. Çalışacağıq ki, namizədlər arasında gənclər də olsun. Amma məhdudiyyət olmayacaq ki, filan qədər gənc, filan qədər də qadın olmalıdır.

Ümid Partiyasının sədr müavini Ənvər Ağazadə hakim partiyanın bu mövqeyini təqdir etdi.

- Qadın və gənclərin siyasi proseslərdə aktiv iştirak etməsi yaxşıdır. Biz də siyasətimizdə bu xəttə üstünlük veririk. Partiyanın rəhbərliyində də əsasən gənclər təşkil olunur. Məclisdə kifayət qədər intellektli qadınlar da var. Amma bələdiyyə seçkilərində qadınların və gənclərin üstünlük təşkil edib-etməyəcəyi barədə indidən hər hansı söz deyə bilmərəm. Çünki hələ namizədlərin siyahısı müəyyənləşdirilməyib.

Firdovsi

Şərq.- 2009.- 12 iyun.- S. 7.