Sahibkarlıq fəaliyyəti haqqında" qanuna yeni əlavə

Xarici şirkət və firmaların rəhbərlərinin müavini azərbaycanlı olmalıdır

Ötən gün Milli Məclisin İqtisadi siyasət, Hüquq siyasəti və Dövlət quruculuğu komitələrinin birgə iclasında "Sahibkarlıq fəaliyyəti haqqında" qanuna əlavə və dəyişikliklər müzakirə olunub.

İqtisadi siyasət komitəsinin sədri Ziyad Səmədzadə bildirib ki, 1992-ci ildə qəbul edilmiş qanunun 10-cu maddəsinə üçüncü bənd əlavə olunmasını təklif ediblər. Z.Səmədzadə deyib ki, bu düzəlişi zəruri edən səbəb Azərbaycanda kifayət qədər kadr potensialının olmasıdır. "Həmin bənddə vurğulanır ki, təsisçiləri xarici vətəndaşlar və ya xarici hüquqi şəxslər, o cümlədən nizamnamə kapitalının və ya səhmlərinin 51 faizindən çoxu xarici vətəndaşlara və ya xarici hüquqi şəxslərə məxsus olan xarici hüquqi şəxslərin filial və nümayəndəliklərin rəhbərlərinin müavinləri Azərbaycan vətəndaşları olmalıdır. Onların namizədlikləri müvafiq icra hakimiyyəti orqanı ilə razılaşdırılmalıdır. Həmin filial və nümayəndəliklərin dövlət qeydiyyatına alınmasına yalnız onların rəhbərlərinin müavinlərinin namizədlikləri razılaşdırıldıqdan sonra yol verilir. Bundan başqa kənd təsərrüfatı, ovçuluq, meşə təsərrüfatı, balıqçılıq, mədənçıxarma sənayesi, emal sənayesi, elektrik enerjisi, qaz və suyun istehsalı ilə bölüşdürülməsi, maliyyə, təhsil, səhiyyə, sosial xidmətlərin göstərilməsi, habelə digər kommunal, sosial və şəxsi xidmət göstərilməsi sahələrində fəaliyyət və təsisçiləri xarici vətəndaşlar və ya xarici hüquqi şəxslər, o cümlədən nizamnamə kapitalının və ya səhmlərinin 51 faizindən çoxu xaricilərə məxsus olan xarici hüquqi şəxslərin filial və nümayəndəliklərin işçilərinin ən azı 90 faizi Azərbaycan vətəndaşları olmalıdır".

Müzakirələrdən sonra layihə Milli Məclisin plenar iclasına təklif olunub.

Firdovsi

Şərq.- 2009.- 23 iyun.- S. 4.