"17 il fəaliyyət göstərən Minsk Qrupunun işi Azərbaycan cəmiyyətini qane etmir"

Əli Əhmədov: "Bunlar bəzi hallarda məntiqə sığmayan bəyanatlar verməkdən əl çəkmirlər"

Azərbaycan- Ermənistan münaqişəsinin həll olunması istiqamətində vasitəçilik missiyasını öz üzərinə götürən həmsədr ölkələrin uzun müddət heç bir nəticə əldə edə bilməməsi artıq ciddi narahatçılıq doğurur. Siyasi partiyalar, ayrı-ayrı qurumlar həmsədrlərin və ya missiyanın formatının dəyişdirilməsini tələb edirlər.

Dünən isə daha bir narazılıq Yeni Azərbaycan Partiyasının icraçı katibi, millət vəkili Əli Əhmədovdan eşidilib. Millət vəkili parlamentdə çıxışı zamanı və sonra jurnalistlərlə söhbətində həmsədrləri ciddi tənqid atəşinə tutub.

"Azərbaycan-Ermənistan, Dağlıq Qarabağ münaqişəsinin nizama salınması məqsədi ilə yaradılmış Minsk Qrupunun həmsədrlərinin təmsilçilərinin bəzi hallarda bütövlükdə vasitəçilik məntiqinə sığmayan bəyanatları Azərbaycan cəmiyyətini narahat etməyə bilməz. Azərbaycan münaqişənin sülh yolu ilə həll olunmasının tərəfdarı olduğunu dəfələrlə bəyan edib və eyni zamanda 17 il fəaliyyət göstərən Minsk Qrupunun işinin Azərbaycan cəmiyyətini qane etmədiyi ilə bağlı fikirlər ölkə rəhbərliyi səviyyəsində də söylənilib. Hesab edirəm ki, vasitəçilik missiyasını üzərinə götürmüş insanlar və qurumlar ilk növbədə onların vasitəçilik missiyasının həyata keçirilməsi bu və ya digər mənada kömək edən istənilən təşəbbüsü dəstəkləməyə borcludurlar. Bu, onların vasitəçilik missiyasının məntiqindən irəli gələn həqiqətdir"

- Həmsədrlərin tez-tez müxtəlif bəyanatlarla çıxış etməsi nədən qaynaqlanır?

- Təəssüf hissi ilə qeyd etmək lazımdır ki, bunlar bəzi hallarda məntiqə sığmayan bəyanatlar verməkdən əl çəkmirlər və konkret olaraq Minsk Qrupunda Fransanı təmsil edən nümayəndənin Dağlıq Qarabağ münaqişəsinin nizama salınmasının Ermənistanla Türkiyə arasında sərhədlərin açılması ilə heç bir əlaqəsi olmadığı haqqında bəyanatlar səsləndirib. Azərbaycan cəmiyyəti, ölkə prezidenti bu iki məsələnin bir-biri ilə bilavasitə əlaqədar olduğunu bildirib. Bu, Azərbaycan cəmiyyətinin mövqeyidir.

- Bəs nə üçün bu mövqeyə qarşı belə münasibət var?

- Hesab edirəm ki, belə mövqeyə qarşı çıxılması Minsk Qrupunun missiyasını həyata keçirən təmsilçi tərəfindən səslənirsə, bu, vasitəçilik funksiyasına və missiyasına sığışmayan bir hərəkətin həyata keçirilməsi deməkdir. Mən hesab edirəm ki, Milli Məclis və burada təmsil olunan deputatlar da Minsk Qrupunun həmsədrlərindən və onların təmsilçilərindən bütövlükdə nizamasalınma prosesinin məntiqinə uyğun gəlməyən bu cür vərdişlərdən əl çəkməyi onlara xatırlatmalıdırlar. Bu vərdişlər prosesin gedişinə müsbət yox, mənfi təsir göstərir.

- Həmsədrlər heç bir qurumun münaqişənin həlli istiqamətində irəli sürdüyü təşəbbüsü dəyərləndirmək belə istəmirlər.

- Münaqişənin nizama salınması istiqamətində kiminsə və yaxud hansısa bir qurum tərəfindən müsbət təşəbbüs irəli sürülürsə, onlar gərək bunu dəstəkləsinlər. Ancaq biz bunun əksini görürük. Bir neçə dəfə bu təkrar olunub. O cümlədən də Birləşmiş Millətlər Təşkilatında Azərbaycanın təşəbbüsü ilə münaqişə ilə bağlı məsələ müzakirə olunanda həmsədrlər tamamilə əks mövqe tutdular. Digər bir halda Türkiyə ilə Ermənistan arasında sərhədlərin açılması məsələsinin Dağlıq Qarabağ münaqişəsinin nizama salınması ilə əlaqələndirildiyi barədə bəyanatlar səsləndirildikdə Fransanı təmsil edən nümayəndə tamamilə fərqli mövqe ortaya qoyub. Vasitəçilik məntiqindən çıxış etsək, istər-istəməz bu fikrə gəlinməli idi ki, Fransanı təmsil edən nümayəndə bunu dəstəkləməli idi. Mən hesab edirəm ki, həmsədrlər bütün yaxşı təklifləri dəstəkləməyə borcludurlar. Bu, onların üzərinə düşən missiyanın məntiqindən irəli gələn borcdur ki, biz bunu görmürük.

- Azərbaycan və Ermənistan prezidentlərinin Sankt-Peterburq görüşündən nəsə gözlənilirmi? Belə bir fikirlər səslənir ki, münaqişə ilə bağlı baza prinsipləri razılaşdırıla bilər.

- Hər bir görüş keçirilirsə, demək, o görüşdən nəsə gözləməyə dəyər. Aəzərbaycan münaqişənin nizama salınması üçün bütün addımları atır, amma təəssüf hissi ilə qeyd etmək istəyirəm ki, bu, indiyədək həll olunmayıb.

- Həmsədrlər 2009-cu ildə münaqişənin həlli istiqamətində müsbət irəliləyişlərin olacağını bildiriblər. Sizcə, Azərbaycanın xeyrinə hansısa müqavilənin imzalanması gözlənilirmi?

- Bütün münaqişələr, o cümlədən Dağlıq Qarabağ münaqişəsi də mürəkkəb münaqişədir və bunun həll olunması da səylər, böyük zəhmət tələb edir. Amma bizim bütün niyyətlərimiz ondan ibarətdir ki, münaqişə tezliklə həll olunsun. Azərbaycan qədər münaqişənin tezliklə həll olunmasına çalışan tərəf yoxdur.

- Dəfələrlə həm müxalifət partiyaları, həm də hakim partiyanın nümayəndələri bu cür fikirlər səsləndirirlər, amma həmsədrlərin mövqeyi dəyişmir. Missiyanın formatında dəyişiklik ola bilərmi?

- Mən belə hesab edirəm ki, vasitəçilər öz missiyasını yerinə yetirməyi sadəcə olaraq regiona səfər etmək və bəyanat verməkdə görməməlidirlər. Azərbaycan prezidenti bunu deyib. İşlər görülüb və bunu qiymətləndirməmək olmaz. Amma fakt bundan ibarətdir ki, münaqişə həll olunmayıb, işğal altında olan torpaqlarımız azad edilməyib. Ona görə də biz Minsk Qrupunun bütövlükdə fəaliyyətinə qiymət verərkən həm tərəflərin mövqelərinin yaxınlaşdırılması istiqamətindəki səylərinə və o səylərin müəyyən nəticələrinə, həm də reallığın indiyə qədər dəyişilməməsinə istinad edərək biz öz mövqeyimizi bildiririk. Mənim yanaşmam bundan ibarətdir ki, əgər bir qurum uzun müddət öz vəzifəsini yerinə yetirə bilmirsə, ən azından formatının dəyişdirilməsi haqqında düşünmək lazımdır.

Rəşad Baxşəliyev

Şərq.- 2009.-23 may.- S. 5.