Milli Məclisdə Qarabağ müzakirəsi aparılıb

Qüdrət Həsənquliyev: "Rusiya ilə yaxın əlaqələr qurulmalıdır"

İqbal Ağazadə: "Biz istəyirik ki, Rusiya Azərbaycanda yeni Xocalı faciəsi törətsin?"

Milli Məclisin dünənki iclasında 2010-cu ilin büdcəsi qəbul edildikdən sonra geniş müzakirələr aparılıb. Bu müzakirələr isə son zamanlar ictimaiyyəti narahat edən Dağlıq Qarabağ münaqişəsi ilə bağlı aparılan danışıqlardı. Büdcə zərfinin qəbulundan sonra spiker Oqtay Əsədov cari məsələlərin müzakirəsi üçün vaxt ayırıb. Çıxış edən bütün deputatlar isə Qarabağ danışıqları ilə bağlı öz fikirlərini səsləndiriblər. Millət vəkillərinin əksəriyyəti bu danışıqlardan xəbərsiz olduqlarını və onlara məlumat verilməsini istəyiblər.

"Madrid prinsipləri"nin 4-cü bəndi Azərbaycan üçün təhlükəlidi"

İlk çıxış edən Müsavat deputat qrupunun üzvü Pənah Hüseyn son zamanlar "Madrid prinsipləri"ndən tez-tez danışıldığını xatırladaraq bu prinsiplərin dördüncü bəndinin - Dağlıq Qarabağın yekun statusunun referendumla müəyyənləşməsi müddəasının Azərbaycan üçün təhlükəli olduğunu deyib. O qeyd edib ki, Azərbaycan hakimiyyəti bu məqamla bağlı açıqlama verməli, danışıqların hansı istiqamətdə getdiyini bildirməlidir.

"Milli Məclisdə qapalı toplantı keçirilsin"

Millət vəkili Fazil Mustafa isə təklif etdi ki, deputatlar aparılan danışıqlar barədə məlumatlandırılsınlar. Onun fikrincə, prezidentlər səviyyəsində keçirilən görüşlərdə əldə olunan nəticələr, detallar barədə Milli Məclis qapalı iclas keçirməlidi. "Biz yalnız məlumatları qəzetlərdən oxuyuruq. Amma jurnalistlər də hər dəfə bizə bu barədə mövqe bildirməyi tələb edirlər. Biz isə xəbərsiz olduğumuz danışıqlardan necə danışa bilərik?" sual edən BQP başqanı hesab edir ki, parlament rəhbərliyi ən azı MM-də təmsil olunan partiyaların rəhbərlərinə məlumat verməlidir. "Rəhbərlik partiya sədrləri ilə qapalı toplantı keçirsin və məlumatların yayılmaması məsuliyyəti də qoyulsun onların üzərinə".

"Beynəlxalq təşkilatlar Azərbaycana təzyiq etməyə başlayıblar"

AVP sədrinin müavini, deputat Zahid Oruc isə bütün həmkarlarını birliyə səslədi. Onun fikrincə, münaqişə ilə bağlı Azərbaycanın mövqeyi bəllidir. Bu səbəbdən də ölkəyə beynəlxalq təşkilatlar artıq təzyiq etməyə başlayıblar. Zahid Orucun sözlərinə görə, bütun beynəlxalq güclərə Milli Məclis cavab verməlidir. Buna görə də münaqişə ilə bağlı danışıqlar, keçirilən görüşlərlə bağlı hər bir Azərbaycan vətəndaşı ciddi mövqe ortaya qoymalıdır. "Prezidentin Goranboyda səsləndirdiyi fikirləri hər bir vətəndaşımız dəstəkləməli, onun arxasında olduğunu sübut etməlidir".

"Rusiya ilə yaxın əlaqələr qurulmalıdır"

Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev Azərbaycanın Rusiya ilə yaxın əlaqələr qurmasını təklif etdi: "Azərbaycan NATO ilə inteqrasiya yolu tutub, Türkiyə ilə strateji müttəfiqdir. Rusiya ilə də belə münasibətlər qurulmalıdır". Q.Həsənquliyevin fikrincə, Rusiya Azərbaycanın Dağlıq Qarabağ üzərində suveren hüquqlarını tanıyarsa, Azərbaycan Kollektiv Təhlükəsizlik Müqaviləsi Təşkilatına da daxil ola bilər: "Sərhədləri də birgə qoruya bilərik, hətta Rusiya Azərbaycanda hərbi baza da yerləşdirə bilər".

"Qarabağ problemini yaradan Rusiyadır"

Deputat İqbal Ağazadə Rusiya ilə əməkdaşlığın dərinləşdirilməsi təklifinə qarşı çıxıb: "Biz istəyirik ki, Rusiya Azərbaycanda yeni Xocalı faciəsi törətsin? Qarabağ problemini yaradan Rusiyadır. MDB-dəki bütün milli-etnik konfliktləri Rusiya yaradıb. Rusiya əlini çəksə, bu konfliktlər həllini tapar. Dağlıq Qarabağ məsələsi bütün vətəndaşları narahat edir. Biz də millət vəkili olaraq fikirlərimizi açıqlayırıq. Narahat olduğumuz üçün istəyirik ki, Xarici İşlər Nazirliyi danışıqlar barədə məlumat versin".

"Tək prezidentin yox, xalqın da səsi çıxmalıdır"

Vətəndaş Həmrəyliyi Partiyasının sədri, millət vəkili Sabir Rüstəmxanlı da xalqı birliyə çağırdı. Deputat bildirdi ki, son zamanlar Qarabağ münaqişəsindən yalnız Azərbaycan prezidenti İlham Əliyev danışır. Amma onun fikrincə, ümummilli problem olduğu üçün tək dövlət başçısının yox, xalqın da səsi çıxmalıdır. "Bu, adi hal alıb. İnsanlar heç nə danışmırlar. Yalnız prezident danışır. Tək prezident yox, xalq da səsini çıxarmalıdı" deyən deputat bildirib ki, Türkiyə Böyük Millət Məclisinin deputatları Qarabağ münaqişəsi ilə bağlı aparılan danışıqlardan daha çox xəbərdardılar. "Biz onlarla görüşdükdə elə şeylər danışırlar ki, bizim onlardan xəbərimiz yoxdu. Çünki onların məclisində belə müzakirələr aparılır".

Sabir Rüstəmxanlının çıxışından sonra digər millət vəkillərinin danışmasına imkan verilmədi. Spiker vaxt azlığından gündəlikdəki məsələlərin müzakirəsinə keçilməsini istədi.

Gündəlikdə olan ilk məsələ "Türkdilli Dövlətlərin Əməkdaşlıq Şurasının yaradılması haqqında" Naxçıvan Sazişinin təsdiq edilməsi ilə bağlı qanun layihəsi idi. Bu qanun layihəsi ilə bağlı MM-in Beynəlxalq münasibətlər və parlamentlərarası əlaqələr komitəsinin sədri Səməd Seyidov məlumat verdi. Deputat dedi ki, bundan sonra bütün türkdilli dövlətlərlə Azərbaycanın əlaqələri genişlənəcək və qarşılıqlı layihələr həyata keçiriləcək. Sənəd səsə qoyuldu və qəbul edildikdə zaldan alqış səsi eşidildi. Bu, deputat Pənah Hüseyn idi. Onun alqışları spikeri təəccübləndirdi və Oqtay Əsədov deputatdan nə üçün əl çaldığını soruşdu:

Oqtay Əsədov: Nə olub, Pənah bəy, nəyə görə əl çalırsınız?

Pənah Hüseyn: Necə yəni, neyçün əl çalıram? Belə dəstəkləyirəm də bu qanunun qəbulunu.

Oqtay Əsədov: Çox yaxşı. Sən əgər dəstəkləyirsənsə, deməli yaxşıdı vəziyyət.

Sonra iclasda bir sıra imzalanmış sazişlər təsdiqləndi və qanunlara edilən əlavə və dəyişikliklər qəbul edildi.

Rəşad Baxşəliyev

Şərq.- 2009.- 27 noyabr.- S. 27.