Dövlət büdcəsi təsdiqləndi

Sənədin lehinə 101, əleyhinə isə 8 nəfər səs verdi

Milli Məclis 2010-cu ilin dövlət büdcəsini təsdiqlədi. Sənəd lehinə 101, əleyhinə 8 səs olmaqla qəbul edildi. Amma büdcənin müzakirəsi zamanı 76 deputatın səsləndirdiyi təkliflərdən bir neçəsi qəbul olunub. Spiker Oqtay Əsədov Qurban bayramı münasibəti ilə həmkarlarını təbrik etdikdən sonra bildirdi ki, MM-də 4 gün büdcə ilə bağlı müzakirələr aparılıb. Müxtəlif təkliflər səslənib. Hökumətə isə 10 gün vaxt verilib. Sonra isə büdcə ilə bağlı maliyyə naziri Samir Şərifov açıqlama verdi.

Deputatların təkliflərinin bəziləri qəbul edilib

Maliyyə naziri isə çıxışında qeyd etdi ki, ötən iclasda 76 millət vəkili çıxış edərək əhalinin maddi rifah halının, ölkənin müdafiə potensialının gücləndirilməsi, ekoloji problemlərin həlli, elm, təhsil, səhiyyəyə dövlət dəstəyinin artırılması və digər məsələlərlə bağlı bir sıra sual, təklif və tövsiyələr irəli sürüblər. Bütövlükdə səslənən təkliflərə ətraflı cavab verilib. Hökumət tərəfindən həmin təkliflər müzakirə edilib, onların həlli yolları, həyata keçirilməsi və maliyyə tutumu nəzərə alınmaqla büdcə imkanları daxilində bəzilərinin müsbət həlli üzrə əməli addımlar atılıb.

Dövlət Neft Fondunun büdcə xərcləri 20 milyon manat artırılıb

Nazir dedi ki, bir sıra dövlət əhəmiyyətli və prioritet vəzifələrin, o cümlədən ölkəmizdə ekoloji durumun yaxşılaşdırılması, alternativ enerji mənbələrinin yaradılması ilə bağlı əlavə vəsaitin ayrılması məqsədi ilə 2010-cu ilin icmal büdcəsinin, onun tərkib hissəsi olan Dövlət Neft Fondunun gələn il üçün büdcə xərcləri 20 milyon manat artırılacaq. Artım üçün nəzərdə tutulan vəsaitin 2010-cu ilin ölkədə Ekologiya ili elan olunmasını nəzər alaraq ekoloji problemlərin həlli ilə bağlı müvafiq dövlət proqramlarının və tədbirlərinin maliyyə təminatına, ölkənin enerji balansının artırılmasında mühüm əhəmiyyət kəsb edən və ekoloji təmiz alternativ enerji mənbələrinin yaradılması ilə bağlı xərclərə yönəldilməsi nəzərdə tutulub.

Elm xərclərinə əlavə 3 milyon manat ayrıldı

Nazirin sözlərinə görə, artımlar nəzərə alınmaqla 2010-cu il üçün icmal büdcənin xərclərinin yuxarı həddi 12 milyard 636 milyon manat təşkil edəcək. Elm xərclərinin, əsasən də elmi-tədqiqat institutlarının maddi-texniki təminatının yaxşılaşdırılması, onların müasir avadanlıqlarla təchizatı ilə bağlı xərclərin artırılması üçün dövlət büdcəsindən elm xərclərinə əlavə 3 milyon manat vəsait yönəldiləcək.

Səhiyyə xərclərinə də əlavə 4 milyon manat verilir

Samir Şərifov bildirdi ki, ötən iclaslarda əksər millət vəkili səhiyyə xərclərinin azlığından şikayətlənmiş və bu sahəyə ayrılan vəsaitin artırılmasını tələb etmişdilər. Nəzərə alınan təkliflər sırasında səhiyyəyə ayrılan vəsaitlər də var. Onun sözlərinə görə, ölkədə dərman preparatlarının təchizatının yaxşılaşdırılması üçün səhiyyə xərcləri bölməsində nəzərdə tutulan şəkərli diabet üzrə dövlət proqramı və səhiyyə sahəsindəki digər proqramların maliyyə təminatı ilə bağlı xərclərə əlavə 4 milyon manat veriləcək.

Milli Məclis və XİN-in əməkhaqqı fondu 458 və 580 min manat artırılır

Büdcənin müzakirəsi zamanı bəzi deputatlar tarixi abidələrin bərpası, diplomatik korpusların işçilərinin əməkhaqlarının və teatr, film çəkilişlərinə ayrılan vəsaitin azlığından şikayətlənmişdilər. Ancaq hökumət aparılan müzakirələr zamanı bu sahələrə ayrılan vəsaitin də artırılmasını nəzərə alıb. Nazir bildirdi ki, tarixi abidələrin bərpası, ölkəmizin xaricdə mədəniyyət mərkəzlərinin təsis edilməsi, teatr tamaşalarının qoyuluşu, bədii və sənədli filmlərin çəkilişi və digər mədəniyyət tədbirlərinin maliyyələşdirilməsi üçün əlavə 6.3 milyon manat vəsait ayrılır. Milli Məclisin yeni inzibati binasının istifadəyə verilməsi, habelə XİN-in fəaliyyətinin genişləndirilməsi ilə bağlı bu qurumların əməkhaqqı fondunun müvafiq olaraq 458 və 580 min manat artırılması məqbul hesab edilib.

13.3 milyon manat sosialyönümlü tədbirlərin maliyyələşdirilməsinə yönəldiləcək

Bütövlükdə deputatların təkliflərinə müvafiq olaraq dövlət büdcəsi üzrə ayrı-ayrı xərclərin tənzimlənməsi üçün əlavə ayrılması təklif olunan 14.3 milyon manat vəsaitin 13.3 milyon manatı sosialyönümlü tədbirlərin maliyyələşdirilməsinə yönəldiləcək. Göstərilən əlavə xərclərin ayrılması 2010-cu il üçün dövlət büdcəsi xərclərinin təqdim olunmuş ümumi məbləğinin artımına gətirib çıxarmayacaq. Yəni dövlət büdcəsinin xərclərinin məbləği əvvəlki kimi 11 milyard 264 milyon manat səviyyəsində qalacaq.

Dövlət büdcəsinin bəzi xərclərinə tətbiq ediləcək artımlar isə 2010-cu ilin büdcəsinin əsas bölmələrə aid edilməyən xidmətlər xərcləri bölməsində valyuta komertasiyası üzrə xərclər üçün nəzərdə tutulan vəsaitin azaldılması hesabına həyata keçiriləcək. Eyni zamanda bəzi deputatların səsləndirdikləri təkliflər hökumətin diqqət mərkəzindədi. Onların mərhələli qaydada növbəti illərin dövlət və icmal büdcələrində baxılması üçün tədbirlər görüləcək.

"Gəl sənə bir qonaqlıq verim"

Nazirin çıxışından sonra spiker Oqtay Əsədov müzakirələrə ehtiyacın olub-olmadığını soruşdu. Əksər millət vəkili sənədin səsə qoyulmasını istədi. Müsavat deputat qrupunun üzvü Pənah Hüseyn isə əlini qaldıraraq danışmaq istədi. Amma spiker onun əlini görmədi. Pənah Hüseynin danışmaq istədiyini görən millət vəkili Rüfət Quliyev atmaca atdı: "Ay Pənah bəy, gəl sənə bir qonaqlıq verim, qurtarsın getsin bu məsələ". Amma Pənah Hüseyn bu dəfə deputat həmkarına cavab vermədi və beləliklə, sənəd sənəd səsə qoyuldu, 101 lehinə və 8 əleyhinə olmaqla qəbul edildi.

Büdcənin qəbulundan sonra iclasda Dövlət Sosial Müdafiə Fondunun, Milli Məclisin xərclər smetası qəbul edildi, yaşayış minimumu və ehtiyac meyarı təsdiqləndi.

Rəşad Baxşəliyev

Şərq.- 2009.- 27 noyabr.- S. 4.