YAP təşviqat kampaniyasına başlayıb

Hakim partiya budəfəki bələdiyyə seçkilərində qadınların və gənclərin namizədliyinə üstünlük verəcək

Yeni Azərbaycan Partiyası bələdiyyələrdə həm qadınların, həm gənclərin xüsusi çəkisinin artırılması istiqamətində təşviqat kampaniyasına başlayıb. Bu barədə jurnalistlərə açıqlamasında məlumat verən YAP İcra katibi, millət vəkili Əli Əhmədov deyib ki, partiya tərəfindən irəli sürülən namizədlər arasında 30-35 faiz qadınlar və təxminən bu qədər də gənclər təmsil olunurlar:

"Bizim apardığımız təhlil nəticəsində məlum olub ki, mövcud bələdiyyələrdə qadınların və gənclərin xüsusi çəkisi həddindən artıq aşağıdır. Təxminən 3-4 faiz civarında qadınlar və elə bundan o qədər fərqlənməyən sayda gənclər bələdiyyələrin sıralarında təmsil olunurdular. Təbiidir ki, bu, nə qadınların, nə də ki, gənclərin Azərbaycan cəmiyyətinin ictimai həyatında tutduğu yerə, demoqrafik çəkisinə və xüsusiyyətinə uyğun gəlmirdi". Partiyanın seçki kampaniyası nəticəsində irəli sürülən namizədlərin bələdiyyə üzvlüyünə seçilməsinə çalışacağını vurğulayan icra katibi həmçinin əlavə edib ki, bu, insanların onlara verdiyi səslərdən asılı olacaq: "Amma hər halda bizim irəli sürdüyümüz namizədlərin siyahısında gənclər və qadınlar geniş təmsil olunduğundan, bələdiyyə seçkiləri nəticəsində insanların verdiyi səslərin nəticəsində də YAP-nin irəli sürdüyü namizədlər arasında bələdiyyəliyə üzv seçilənlərin içərisində qadınlar və gənclərin xüsusi çəkisinin yüksək olacağına inamımız var". Partiyanın Azərbaycanda bütün bələdiyyələrə namizəd irəli sürmək niyyətində olduğunu açıqlayan Ə.Əhmədov deyib ki, Azərbaycanda 1700-dən artıq bələdiyyələrə seçkilər keçiriləcək və həmin bələdiyyələrə təxminən 20 minə yaxın namizəd irəli sürüləcək: "Güman edirəm ki, bir neçə gün ərzində YAP prosedur qaydalarına uyğun olaraq sənədləri hazırlayıb namizədlərin siyahılarını qanunauyğun şəkildə Mərkəzi Seçki Komissiyasına və seçki dairələrinə təqdim edəcək".

Ə.Əhmədov müxalifətin seçki hazırlığından da danışıb. Millət vəkili artıq neçə illərdir ki, Yeni Azərbaycan Partiyasının müxtəlif seçkilərdə özünə hər hansı problem yaradan rəqiblə qarşılaşmadığını qeyd edərək partiyanın ciddi rəqiblərin meydanda olmasını istəyir: "Bu, bir yandan bizim üçün yaxşıdır, ona görə ki, seçkilərdə biz asanlıqla nailiyyətlər və uğurlar qazanırıq. Digər tərəfdən isə biz bir partiya olaraq istərdik ki, ciddi rəqiblər olsun ki, onlarla ciddi mübarizə nəticəsində qələbə qazana bilək". Ə.Əhmədov deyib ki, indiki bələdiyyə seçkilərində isə hələlik müxalifət partiyaları tərəfindən ciddi şəkildə seçki prosesinə qatılacaqları ilə bağlı bəyanatlardan savayı hər hansı addımlar müşahidə olunmur. Onun sözlərinə görə, biz keçən bələdiyyə seçkilərində olduğu kimi, yenə də müxalifət partiyalarının namizəd irəli sürməsi ilə bağlı çətinliklərlə üzləşdiyi müşahidə edilməkdədir.

Nəsimi

Şərq.- 2009.- 15 oktyabr.- S. 3.