60 yaş nədir hələ?

Bu gün görkəmli akademik İsa Həbibbəylinin 60 illik yubileyidi

Dünyada elə insanlar var ki, onlar Tanrının onlara verdiyi ömür payını tək özləri üçün deyil, daha çox ətrafdakı insanlar üçün yaşayırlar.

Belə sadə insanlardan biri, hər zaman təvazökarlığı və insanların problemlərinə həssaslığı ilə seçilən akademik İsa Həbibbəylidi. Bu gün NDU-nun rektoru, millət vəkili, akademik İsa Həbibbəylinin 60 yaşı tamam olur.

1949-cu ilin oktyabrın 16-da Naxçıvan MR-in Şərur rayonunun Dan yeri (Danzik) kəndində göz açan İsa müəllimin çox maraqlı həyat yolu olub. 1967-ci ildə o vaxtkı Azərbaycan Dövlət Pedaqoji İnstitutunun Naxçıvan filialının Azərbaycan dili və ədəbiyyatı fakültəsinə daxil olan İsa Həbibbəyli tələbəlik illərində ictimai tədbirlərin aktiv iştirakçılarından olub. Elə "Dünya vəfasız deyil", "Mənim şəhərim" adlı ilk şeirləri məhz tələbəlik illərindən mətbuata yol alıb. Tələbəlik illərində qələmə aldığı bədii publisistik yazıları "Şərq qapısı"nda nəşr olunub. Taleyin onu akademik Məmmədcəfər Cəfərovla qarşılaşdırması isə bu cavan və istedadlı gəncin elm yolunda sanki yaşıl işıq olur. Ali məktəbi bitirəndən sonra bir müddət müəllimlik fəaliyyəti ilə məşğul olan İsa Həbibbəyli 1973-cü ildə Azərbaycan EA-nın Nizami adına Ədəbiyyat İnstitutunun aspiranturasına daxil olub. 1980-ci ildə "XX əsrin əvvəlləri Azərbaycan romantik lirikası" mövzusunda namizədlik, 1996-cı ildə isə Nizami adına Ədəbiyyat İnstitutunun Elmi Şurasında "Cəlil Məmmədquluzadə: mühiti və müasirləri" adlı doktorluq işi müdafiə edib. "Ədəbiyyat nəzəriyyəsi" və "Ədəbi yüksəklik" adlı kitabları nəşr olunub. 1990-cı ildə Naxçıvan Dövlət Universitetinin elmi işlər üzrə prorektoru, 1995-ci ildə Naxçıvan Atatürk Araşdırma Mərkəzinin rəhbəri seçilib. 1996-cı ildən Naxçıvan Dövlət Universitetinin rektorudu. 1997-ci ildə Naxçıvan Ali Məclisinin deputatı seçilib. Ədəbiyyat sahəsindəki araşdırmaları, xüsusi ilə də görkəmli ədib Mirzə Cəlil Məmmədquluzadənin irsinin araşdırılması sahəsindəki müstəsna xidmətləri olan İsa Həbibbəyli bu gün təkcə Azərbaycanda deyil, həm də dünyada görkəmli cəlilşünas alim kimi tanınır. Onun elmi fəaliyyəti ilə yanaşı, rəhbərlik etdiyi ali məktəbin dünyada tanıdılması sahəsində də xüsusi xidmətləri var. Bütün bunların nəticəsidir ki, Naxçıvan MR-in yaranmasının 85 illiyi münasibəti ilə Muxtar Respublikanın inkişafındakı xidmətlərinə görə Azərbaycan prezidenti İlham Əliyev tərəfindən ən yüksək mükafat "Şərəf" ordeni ilə təltif edildi.

Dostları - görkəmli ziyalı, sadə və təvazökar insan olan İsa müəllimi 60 illik yubileyi münasibəti ilə təbrik edir, ona cansağlığı və uğurlar arzu edərək "60 yaş nədir hələ?" - deyirlər.

Şərq.- 2009.- 16 oktyabr.- S. 6.