Vəfa Quluzadə proqnozlarını verdi

"Yaxın günlərdə ABŞ-dan bura Azərbaycanı yola gətirmək üçün çoxsaylı qonaqlar gələcək"

AKP hökumətinin Ermənistanla münasibətləri normallaşdırmaq fonunda siyasi oyun oynaması tək Azərbaycanda deyil, başqa türkdilli ölkələrdə də narazılıq doğurub.

Rəcəb Tayyib Ərdoğan başda olmaqla AKP hökuməti rəsmilərinin "DQ münaqişəsi ortadan qalxmayınca sərhədləri açmarıq"- deyərək ermənilərlə dostlaşmaq üçün əməldə günü-gündən daha çox canfəşanlıq nümayiş etdirməsi artıq digər türkdilli ölkələrin rəhbərlərini də dilə gətirib. Qazaxıstan prezidenti Nursultan Nazarbayev Türkiyə hökumətinə müraciət edərək "Ərdoğan Azərbaycan xalqına verdiyi vədin üstündə durmalıdır" səpkili müraciət edib. Bu yaxınlarda Naxçıvanda keçirilən türkdilli dövlət başçılarının sammitində də bu məsələnin müzakirə edildiyini bildirən Qazaxıstan prezidenti DQ münaqişəsi həll olmayınca AKP hökumətinin Ermənistanla normal münasibətlər qurmaq siyasətinin türk birliyinə zərbə olacağına da açıq şəkildə işarə vurub. Xəzər Araşdırmalar Fondunun prezidenti, politoloq Vəfa Quluzadə isə hesab edir ki, Nursultan Nazarbayevin bu bəyanatı alqışlanmalıdı. "Nazarbayev həmişə Rusiyanın qorxusundan belə məsələlərə müdaxilə etmirdi. Amma bu gün bu bəyanatı veribsə, bu alqışlanmalıdı. Ümidvaram ki, onun bu çağırışı eşidiləcək" deyən politoloq hesab edir ki, rəsmi Ankaranın Bakıya qarşı apardığı siyasət kökündən yanlışdı. "Ermənistan-Türkiyə yaxınlaşmasının əsas müəllifi ABŞ və Türkiyədi. Hesab edirəm ki, hər iki ölkənin siyasəti səhvdi və onlar sonra bunun ziyanını görəcəklər" deyən politoloqun sözlərinə görə, Obama administrasiyasının Cənubi Qafqazla bağlı siyasəti dəyişib. Amma ABŞ Azərbaycana indi deyil, bir az əvvəldən Türkiyə və Ermənistan arasında gizlin danışıqlara start verilməsini dəstəkləməklə xəyanət edib. Ermənistan-Türkiyə gizlin danışıqlarının bir hissəsinin hələ Buş hakimiyyəti dönəmində Osloda aparıldığını xatırladan politoloq hesab edir ki, həmin danışıqların Azərbaycandan gizlədilməsi düzgün deyildi. Vaxtında məlumat verilmədiyinə görə Azərbaycanın hər iki strateji partnyoru - ABŞ və Türkiyə bizim ölkəyə xəyanət edib. Politoloq onu da bildirib ki, Obama administrasiyasının bu bölgədəki siyasətini dəyişməsinin mahiyyəti də hələ tam aydın deyil. Ya Obama burada nə baş verdiyini başa düşmür və ona səhv məlumat verilir, ya da özü bu siyasəti aparır" deyən politoloq artıq Azərbaycanda həm Türkiyə, həm də ABŞ-ın nüfuzunun ciddi şəkildə aşağı düşdüyünü bildirir. Onun sözlərinə görə, Ermənistan prezidenti Serj Sərkisyana Türkiyə prezidentinin göstərdiyi xüsusi münasibət təkcə Azərbaycanda deyil, elə Türkiyənin özündə də etiraz doğurub. "Ərdoğan çıxış edib deyir ki, Türkiyə böyük dövlətdi. Onun böyük maraqları var. Biz xırda məsələlərlə məşğul olmuruq. Bu nə deməkdir? Yəni Azərbaycan və DQ məsələsi Türkiyə üçün xırda məsələdir. Onda Türkiyə Ermənistanla birgə getsin böyük məsələlərini həll etsin. Türkiyədə Sərkisyanın elə qarşılanması kimə lazım idi? Azərbaycan televiziyası bu gün Abdullah Gülü Sərkisyanın aşbazı adlandırır. Sərkisyan kimdi axı? Sərkisyan əli minlərlə azəri türkünün qanına batan bir canidi. DQ-i işğal edən separatçı və işğalçıdı. Belə bir adamı özündən yüksəkdə tutub onun qabağında yeri gəldi-gəlmədi dişlərini göstərmək kimə lazımdı axı? Hər şeyin bir həddi var. Burada ciddi məsələlərdən danışılırsa, ciddiyyəti də qorumaq lazımdı"- deyən politoloq uzun illərin təcrübəli və peşəkar diplomatı kimi AKP hökumətinin apardığı siyasətin diplomatiya çərçivəsindən kənar olduğunu bildirib. Vəfa Quluzadənin baş verən proseslərlə bağlı maraqlı proqnozu da var. Azərbaycan prezidentinin və Azərbaycan xalqının sərt təpkisinin bu proseslərin irəliləməsinə bir qədər mane olacağını deyən politoloq güman edir ki, həm ABŞ, həm də Türkiyə öz siyasətlərini bir qədər "tormozlamalı" olacaqlar. "Mən belə hiss edirəm ki, yaxın günlərdə ABŞ-dan bura Azərbaycanı yola gətirmək üçün çoxsaylı qonaqlar gələcək. Yəqin ki, yaxın vaxtlarda bu səfərlərə start veriləcək. Çünki belə götürəndə Azərbaycan çox kiçik ölkə olsa da, elə kiçik ölkələr var ki, bu gün ABŞ-a meydan oxuyurlar. Azərbaycanın da müəyyən imkanları var. Ona görə ABŞ yəqin ki, bu səhv siyasətini düzəltməli olacaq. Əks halda hər iki ölkənin Azərbaycandan əli çıxacaq"- deyən politoloq rəsmi Bakının hər iki ölkə ilə münasibətlərdə sərt siyasətə keçməsinin tamamilə normal olduğu qənaətindədir. Onun sözlərinə görə, onsuz da Azərbaycana qarşı bu ölkələr tərəfindən artıq xəyanətə yol verilib. "Onlar bilməli idilər ki, bir gün bu gizlin danışıqların üstü açılacaq. Əgər Obama Sərkisyanla telefon danışığında DQ məsələsinin Ermənistanla Türkiyənin sərhədlərinin açılmasına dəxli olmadığını, Ərdoğan isə bu məsələləri xırda məsələlər adlandırırsa, onda Azərbaycan nə etməlidir ki? Onlar bizdən sərt mövqeni gözləməlidirlər".

Vüsalə Rafiqqızı

Şərq.- 2009.- 20 oktyabr.- S. 3.