Asif Atanın Sonevi ziyarət edilib

Tədbirdə Mütləqə İnam Ocağının Evladları və Ocaq dostları iştirak ediblər

Şölə ayının 5-i 32-ci ildə (5 iyun 2010) Türk Ulusunun Ruhaniyyat Ocağı - Mütləqə İnam Ocağı İnam Atanın (Asif Atanın) ölümünün 13-cü ili münasibətilə onun Ağstafadakı sonevi başında "Kutsal Ziyarət Günü" Törəni keçirdi. Törəni giriş sözüylə Mütləqə İnam Ocağının Yükümlüsü İşıqlı Atalı açdı, günün mahiyyəti haqqında söz dedi. O, Ata sonevinin 13 ildən bəri ziyarət ünvanı olaraq ənənələşməsini önəmli xəlqi bir mərhələ kimi dəyərləndirdi.

Mütləqə İnam Ocağının Odqoruyanı (Başçısı) Safruh Ata sonevini ziyarətin xəlqi-ruhani mahiyyətini belə əsaslandırdı: "Atanı anlamaq çətin olduğu dərəcədə qaçılmazdır. Atanın ömrü öydükcə öyülməli bir ömürdür. Yəni o, rəqibin böyüklüyünə, azmanlığına baxmayaraq döyüşə, Yer kürəsinin yarısını bürümüş ideologiyaya qarşı dayana bilirdi. Atanın Ruhaniyyatı indiki insanların psixologiyası və gerçəkliyi baxımından aktual görünməyə bilər, ancaq insanlığın sabahı üçün fövqəladə aktualdır. Mən bunu qınadığım dünyanın ən qabaqcıl fəlsəfəsinin ən qabaqcıl kitabını oxuyandan, onunla bir kədərlənəndən, axtarandan sonra deyirəm".

İşıqlı Atalı dedi: "Bu gün İnam Atanın Kutsal Sonevi ziyarət olunur. Ziyarətə gəlişimiz Ata, Amal qarşısında üzüağlığımızın təntənəsidir. Deyirik ki, Ata, Ocağını, Dünyabaxışını yaşatmağa qadirik. İnam Ata-Safruh-İnam Evi vəhdətimizi göz-bəbəyimiz kimi qoruyuruq. Bu ənənə Kutsal Bitiqlərə İnam Evlərinin yiyəliyi ilə davam edəcək. Bir daha deyirik ki, Ruhun Ruhumuzdadır Ata!"

Tədbirdə iştirak edən tanınmış yazıçı-publisist Əlisahib Əroğul bildirdi ki, Asif Atanı özümüzə, ruhumuza doğma sanırıq: "Asif Atanın kitablarını son vaxtlar ardıcıl şəkildə oxuyuram. Atanın böyüklüyünü hər yerdə təbliğ eləməliyik. Bəli, insanın ən böyük işi özü üzərində qələbə olmalıdır. Həmişə Safruhu, İşıqlını, Yolruhu, Uluruhu görəndə sanıram ki, içimə bir işıq düşür. Bu, o deməkdir ki, onlar Atanın Ruhunu inadla, inamla yaşadırlar. Qoy bu İnamın yolu həmişə açıq olsun, Asif Atanın bizlər üçün yazdığı kitablar, "İnsanlaşmaq-İnsanlaşdırmaq" tələbi həyati işimiz, əməlimizə çevrilsin. Atanın sözünü daim yaşatmaq üçün hər birimiz əlimizdən gələn etməliyik".

Tanınmış ədəbiyyatşünas-araşdırmaçı Maarif Teymur: "Bu gün Ağstafaya Asif Atanın sonevini ziyarətə gəlmişik. Onun insanilik çağırışları həmişə qulaqlarımda səslənir. 35 ildir Atanın yoluna sadiq Safruhun dəyişməzliyi mənə onun möhtəşəmliyini bir daha gözəl anladır. Asif Atanın xoşbəxtliyi ondadır ki, başladığı işi, yolu axıra kimi gedə bildi. Asif Atanın yaşaması üçün Safruhun ardıcıl yanğısı məni həmişə heyran edib. Asif Atanın ruhu qarşısında baş əyirəm".

Yolnur Atalı Ata qarşısında həmişə söz deməyin çətinliyini bildirdi: "Atanı sevdim, Ataya inandım, həm də Safruhu sevdim, Safruha inandım. İşıqlı qardaşım deyə bilmədiyimi deyir və eləyir. Buna niyə sevinməli deyiləm? Eləcə də Uluruhun, Yolruhun işləri. Bu sevgini məndə yaratdığına görə Ata Ruhu qarşısında baş əyirəm. Atanın Bayrağını öpürəm və dünyanın ən xoşbəxt insanı olduğumu bildirirəm".

Doğma Atalı evlad kimi ilk dəfə Ata Sonevini ziyarət etməsiindən yaranan duyğularını belə ifadə etdi: "Ocağa insan olmaq üçün gəlmişəm. İnsan təmənnasız yaşayanda çox güclü olür".

Uluruh Atalı dedi: "Bu ziyarət məqamı mənim üçün çox müqəddəsdir. Burada hər kəsin izharında mən özümü tapa bildim. Doğrudan da insan müqəddəs yaşayanda özü ola bilir. Və bu yolda insan doğmalarını yaxından tanıyır. Əgər bu yolda dəyərli əqidədaşlarım varsa, mənim üçün çox böyük gücdür."

Yolruh Atalı buraya hər il böyük bir sevgiylə gəldiyini dedi: "Ataya layiq olmağımız onu yaşatmağımız deməkdir. Bir də var ömür Ataya layiq olmaya. özünü Ata yoluna həsr etmək və onun ömrünə bənzətmək insaniliyin təsdiqidir. Hələlik ki, bunun müqəddəs və yetkin örnəyi Safruh qardaşımızdır. Yolu sona kimi gedəcəyimə daxili əminliyim var".

Sonda Ocaq Odqoruyanı Safruh törənə bənzərsiz Ruhani Hədiyyə - "Kutsal öyrəti" haqqında uca söz dedi, kitabı İşıqı Atalıya təqdim etdi.

İşiqlı Atalı

Təzadlar.- 2010.- 8 iyun.- S.10.