Azərbaycan Prezidentinin ictimai-siyasi fəaliyyəti beynəlxalq aləmdə yüksək dəyərləndirilir

Cənub-Şərqi Avropanın ən nüfuzlu mətbuat orqanlarından olan "Balkanlar və Avropa" jurnalının İlham Əliyevi "İlin adamı" elan etməsi bu fikri bir daha təsdiq edir

İnsanın əməlləri, fəaliyyəti, xidməti o zaman yüksək qiymətləndirilir ki, o, öz əməyinin, xidmətinin əvəzində mükafat və ya hansısa təmənna gözləmir. Özü barədə qiymətləndirmə gözləməyən adamlar həmişə cəmiyyət tərəfindən yüksək dəyərləndiriliblər.

Heydər ƏLİYEV,

Ümummilli lider

Dünya inkişaf etdikcə, tarix bəşər övladına yeni dərslər və ibrətlər verdikcə, mənəvi dəyərlər xəzinəsinə yeni tendensiyalar əlavə edilir. Həmin tendensiyalardan biri də cəmiyyət həyatının müxtəlif sahələrində böyük nailiyyətlər əldə etmiş ayrı-ayrı adamların təkcə öz ölkəsində və ya mənsub olduğu regionda deyil, planetin müxtəlif qütblərində qiymətləndirilməsi, yüksək təltiflərə layiq görülməsidir.

Bu, ilk növbədə ölkələr və insanlar haqqında çoxsaylı informasiyaların dünyanın hər yeri üçün əlçatan olması ilə bağlıdırsa, eyni zamanda belə bir arqument də var ki, artıq siyasətçilərin, elm və texnika xadimlərinin və görkəmli hərbçilərin xidməti öz ölkəsi və ya regionu çərçivəsindən çıxaraq ümumbəşəri əhəmiyyət kəsb edir. Yəni ölkələr, regionlar və hətta qitələrarası əməkdaşlığın inkişafına xüsusi töhfələr vermiş şəxsin dünyanın müxtəlif guşələrində yüksək adlara və mükafatlara layiq görülməsi tamamilə təbii bir prosesdir.

Azərbaycan Respublikasının Prezidenti İlham Əliyevin Buxarestdə fəaliyyət göstərən ekspert və politoloqların ərsəyə gətirdiyi nüfuzlu bir jurnalın keçirdiyi qiymətləndirmə nəticəsində "2010-cu ilin adamı" elan edilməsi də məhz həmin tendensiyanın tərkib hissəsidir. Avropanın kütləvi informasiya vasitələri yazırlar ki, Rumıniya paytaxtında işıq üzü görən "Balkanlar və Avropa" jurnalının son 10 ildə keçirdiyi illik qiymətləndirmələr nəticəsində siyasət, iqtisadiyyat, ədliyyə, insan hüquqları, mədəniyyət üzrə nominasiyalarda xüsusi xidməti olan şəxslər mükafatlandırılır. Sonuncu mükafatlandırmanın nəticələrinə görə siyasət sahəsində "2010-cu ilin adamı" Azərbaycan Prezidenti olmuşdur. Bu nüfuzlu təşkilatın münsiflər heyətinə siyasi, iqtisadi, sosial, mədəni sahələrdə xüsusi çəkiyə malik olan şəxsiyyətlər və ölkənin nüfuzlu qeyri-hökumət təşkilatlarının, kütləvi informasiya vasitələrinin nümayəndələri, müstəqil ekspertlər və digər təmsilçilər daxildir.

Münsiflər heyətinin bu qərarını əsaslandıran jurnal rəsmiləri bildiriblər ki, Azərbaycan Prezidentinin "2010-cu İlin adamı" elan edilməsi üçün kifayət qədər əsas vardır. Belə ki, Prezident İlham Əliyevin siyasi, iqtisadi, elmi, mədəni və humanitar sahələrdə əldə etdiyi uğurların özü ayrılıqda bu siyasətçinin "ilin adamı" elan edilməsi üçün zəmin yaradır. Ancaq bütün bunlardan əlavə Prezident İlham Əliyevin Rumıniya xalqı və dövləti tərəfindən daha yüksək adlara layiq görülməsi üçün də əsaslar vardır. Belə ki, Prezident Əliyev Rumıniya -Azərbaycan əlaqələrinin, hər iki xalqın və geniş Xəzər və Qara dəniz bölgələrinin tərəqqisinə göstərdiyi xüsusi diqqətə görə dost ölkə ekspertləri tərəfindən böyük hörmət və ehtiramla qarşılanan siyasi xadimə çevrilmişdir. Rumın ekspertlərinin fikrincə, İlham Əliyev regionun, eyni zamanda gələcəkdə Qərbi Avropanın enerji problemlərinin həllinə səbəb olacaq nəhəng iqtisadi layihələrin müəllifi və ya iştirakçısı kimi xüsusi xidmətlər göstərmişdir.

Azərbaycan Prezidentinin qeyd edilən sahələrdəki xidmətlərindən bir neçəsini yada salaq. Prezident İlham Əliyev 2010-cu ildə regional və beynəlxalq sülhə nail olunması üçün dünya ictimaiyyətinin atdığı bütün addımları dəstəkləmiş, əksər beynəlxalq təşkilatların tribunasından çıxış edərək öz ölkəsinin terrorçuluğa, separatizmə, narkotik qaçaqmalçılığına qarşı mübarizəyə dəstək verdiyini bildirmiş və bu təklifləri öz əməlləri ilə reallaşdırmışdır. 2010-cu ildə Prezident İlham Əliyev iki dəfə ABŞ Prezidenti Barak Obama ilə, üç dəfə Rusiya Federasiyasının Prezidenti Dmitri Medvedevlə, üç dəfə Türkiyə Prezidenti Abdullah Güllə, eləcə də Qazaxıstan, Ukrayna, Özbəkistan prezidentləri ilə görüşmüş, regional və beynəlxalq sülhün bərqərar edilməsi üçün mühüm danışıqlar aparmışdır. Dövlət başçımız 2010-cu ildə BMT, ATƏT, NATO, MDB, İslam Konfransı Təşkilatı, GUAM və digər beynəlxalq təşkilatların ya tribunalarından çıxış etmiş, ya da onların rəhbərləri ilə müxtəlif tədbirlərdə görüşmüşdür.

Beynəlxalq ictimaiyyətə, o cümlədən Rumıniya siyasətçilərinə yaxşı məlumdur ki, Azərbaycan Prezidenti Qafqaz regionunda sabitliyin qorunub saxlanılması, hərbi əməliyyatların yenidən başlanmaması üçün ATƏT-in Minsk qrupunun həmsədrləri ilə birlikdə, böyük səbr və təmkinlə danışıqları davam etdirir. Ermənistan rəhbərlərinin Dağlıq Qarabağ münaqişəsinin həlli ilə bağlı danışıqlarda tutduğu destruktiv mövqe dünyanın istənilən ölkəsi tərəfindən lənətlənir. Azərbaycanın sülhsevər siyasəti isə nəinki dövlətimizə və dövlət başçımıza, eləcə də bütövlükdə xalqımıza böyük hörmət və ehtiram qazandırır. Dünya siyasətçilərinə yaxşı məlumdur ki, gündən-günə inkişaf edən Azərbaycan dövləti öz silahlı qüvvələrini də inkişaf etdirib və regionun ən qüdrətli ordusunu formalaşdırıb. Ancaq buna baxmayaraq Azərbaycan danışıqlar prosesinə sədaqət nümayiş etdirərək əslində ATƏT-ə, vasitəçi ölkələrə, ümumilikdə dünya ictimaiyyətinə öz ehtiramını göstərir. Azərbaycanın hərbi büdcəsinin Ermənistanın icmal büdcəsindən artıq olduğunu həm Ermənistanda, həm də dünyanın hər yerində yaxşı bilirlər. Ancaq rəsmi Bakı bu üstünlükdən istifadə edərək regiondakı sabitliyin pozulması istiqamətində addım atmır. Halbuki azğınlaşmış Ermənistan rəhbərliyi Azərbaycanın həmin zərbələrini görməyə layiqdir.

Beynəlxalq ictimaiyyətə yaxşı məlumdur ki, Azərbaycanda vətəndaş cəmiyyətinin formalaşdırılması, cəmiyyətin daha da demokratikləşdirilməsi istiqamətində kifayət qədər səmərəli addımlar atılır. Noyabrın 7-də keçirilmiş parlament seçkiləri həmin tendensiyanın davamı kimi qəbul edilirdi. Müxtəlif beynəlxalq təşkilatların təşkil etdiyi müşahidə missiyasının tərkibində rumıniyalı deputat və ekspertlər də var idi. Yüzlərlə əcnəbi müşahidəçinin yekdil qərarı belə idi ki, Azərbaycanda parlament seçkiləri ədalətli, şəffaf, demokratik və dünya seçki təcrübəsinə uyğun şəkildə keçirildi. Ermənistanda isə istənilən seçkidən sonra ya qan tökülür, ya da çoxsaylı həbslər başlanılır. Yəni dilənçi kimi qapı-qapı düşüb ianə toplayan Ermənistan rəhbərliyindən fərqli olaraq Azərbaycan rəhbərliyi sosial-iqtisadi inkişafla bərabər siyasi mədəniyyət, seçki mədəniyyəti, demokratiya mədəniyyəti də formalaşdırır və inkişaf etdirir.

Dünya ictimaiyyətinə yaxşı məlumdur ki, Azərbaycan Prezidenti öz ölkəsinin təbii sərvətlərindən əldə edilən vəsaitin bugünkü və gələcək nəsillər üçün bərabər şəkildə paylanılması üçün mükəmməl dövlət proqramlarını təsdiq edib və həmin proqramların icrası öz müsbət nəticələrini çoxdan verir. Təkcə təhsil sahəsinə aid 16 Dövlət Proqramı təsdiq olunub və bu proqramların hamısı neft sektorundan əldə edilən vəsait hesabına icra olunur. Avropalı ekspertlər İlham Əliyevin həmin addımlarının sırf iqtisadi xarakterli olmadığını, siyasi-iqtisadi məzmunlu olduğunu dönə-dönə qeyd ediblər. Bütün bununla yanaşı, dövlət başçımızın Xəzərin Azərbaycan sektorundan hasil edilən neft və qazın dünya bazarına çıxarılması üçün həyata keçirdiyi şaxələndirmə siyasəti də beynəlxalq ictimaiyyət tərəfindən maraqla və rəğbətlə qarşılanır. Çünki Azərbaycan artıq Avropanın enerji təhlükəsizliyinin təmin edilməsində xüsusi rol oynayan ölkələrdən birinə çevrilib. Məhz rəsmi Bakının təşəbbüsü ilə bu günlərdə Azərbaycan paytaxtında reallaşdırılan Xəzəryanı ölkələrin dövlət başçılarının üçüncü sammiti çərçivəsində əldə edilən razılaşmalar Azərbaycanla bərabər Qazaxıstan və Türkmənistanın da enerji daşıyıcılarının dünya bazarına çıxarılmasını asanlaşdıracaq. Bütün bunlar dünya ictimaiyyətinin gözü qarşısındadır və beynəlxalq ekspertlər, son məqamda isə rumıniyalı mütəxəssislər Prezident İlham Əliyevi "İlin adamı" elan edərkən məhz həmin məqamları əsas götürürlər.

Dövlət başçımıza "İlin adamı" mükafatını verən qurumun ekspertləri əsaslandırırlar ki, İlham Əliyev eyni zamanda mədəni və humanitar sahədə dünya miqyaslı xidmətləri ilə seçilir. Bu, həqiqətdir. Son 10 ildə elə bir il olmur ki, Azərbaycanda hansısa ölkənin mədəniyyət günləri keçirilməsin və ya, hansısa ölkədə Azərbaycan mədəniyyət günləri təşkil edilməsin. Xalqlar, ölkələr və dövlətlər arasında əməkdaşlığın genişləndirilməsi üçün bu qəbildən olan tədbirlərin təşkil edilməsi daim ulu öndər Heydər Əliyevin də diqqət mərkəzində idi. Bu gün Azərbaycan dövlətinin əldə etdiyi çoxsaylı nailiyyətlər də məhz Heydər Əliyev siyasi kursunun davam etdirilməsinin nəticəsidir. "Balkanlar və Avropa" jurnalı Prezident İlham Əliyevi "İlin adamı: 2010" mükafatına layiq görərkən məhz sadaladığımız bu prinsipləri əsas götürmüşdür.

İttifaq MİRZƏBƏYLİ

Xalq qəzeti.- 2010.- 28 noyabr.- S. 1.