Mənaya dönə bilsən

Mənaya dönə bilsən

Dərin çaylar sakit axar həmişə,

Dayazları daim hay-küy qoparar.

Cahillər xor baxar ulu keçmişə,

Aqillər tarixi çəkib aparar.

Üzdən görünəni görməyə nə var,

Gərək dərinliyə enə biləsən.

Axınla bir ömür sürməyə nə var,

Şərt odu mənaya dönə biləsən.

Elə qarış, eldən yapış, - deyiblər,

Amma gərək yolunu da tapasan.

Yolsuzları hər tərəfə əyiblər,

Yollu olsan- kökdən çətin qopasan.

Amalsız yaşamaq yaşamaqdımı?

Məqsədsiz, məramsız yol nəyə gərək?!

Məqsədlə ya\nmırsa bir ömrün şamı,

Onu sovurasan küləyə gərək!

Vətən eşqi iynə ilə vurulmur,

Əqidədə öz yerini tapmalı.

İnam istək ilməsiylə hörülmür,

Ruha, qana layla ilə hopmalı!

Ağatlıya bənzəməz hər at minən,

Nə olsun ki, atı ağdı, ya qara!

Könül evi deyildir hər görünən,

Məkan hara, Ocaq hara, o hara?!

1 avqust 2010

Özündən öyrən

Yaxşını yamandan seçmək istəsən,

Danışdır, kəlmə kəs - özündən öyrən.

Keçilməz yolları keçmək istəsən,

Səndən öndəkinin izindən öyrən.

Belə gəlib, belə gedir bu dünya,

Gör-götür dünyası deyirlər ona.

Eyni gözlə o baxmayır hamıya,

Oğul gərək sınaqlara qatlana.

Onun qarşısında acizlik etsən,

Səni yıxıb, üzərindən keçəcək.

Yox, əgər yol seçib, yolunla getsən,

O zaman o səni hədəf seçəcək.

Bəs onda neyləyək? Var olmaq üçün

Nəyi inkar edib, nəyi seçməli?!

Zamanla döyüşə atılmaq üçün

Nəyi qurban verib, nədən keçməli?!

Öz yolu - qibləsi olmayanları

Dövrün küləkləri tez əyir yaman.

İdraka, İnama dolmayanları

Həyatda qov təki oynadır zaman.

Ulu keçmişinə, kökünə söykən,

Kökdən güc almayan palıd da çökər.

Ruhunda ləyaqət toxumu əkən

Özünə fərəhdən abidə tikər.

Sentyabr 2010

Ay mənim ağ buludum

Hərdən bəyaz olursan,

Ömrümə yaz olursan,

Heyif ki, az olursan,

Ay mənim ağ buludum.

Yurdsuzam, yuvasızam,

Yurd yoxdu - havasızam,

Dünyada dünyasızam,

Ay mənim ağ buludum.

Ürəyimdə odum var,

Xəyaldan qanadım var,

Bir quruca adım var,

Ay mənim ağ buludum.

Ürəyim tək dol ki sən,

Mənə həyan ol ki sən,

Boğulmayım qəhərdən,

Ay mənim ağ buludum.

Mənim ümidgahımsan,

Güvəncim, hənahımsan,

Bir bəyaz sabahımsan,

Ay mənim ağ buludum.

04.09.2010

Bir "Segah" çal, ay Vaqif

Uzun illər Səxavətlə birgə çalışan, bənzərsiz "Segah"ıyla qəlbləri riqqətləndirən qarmonçalan Vaqifə

"Segah"ınla sanki qanad açırıq,

Xəyalların ağuşunda uçuruq

Bax budur məharət, budur bacarıq!

Həsrətlərə gəl məlhəm ol, ay Vaqif,