Ata ömrü qibləmizdir

Ürəyinizdə Günəş olsun, istəkli yurddaşlarımız!

Biz, Mütləqə İnam Ocağı olaraq zaman-zaman xalqımıza Asif Atanın ömrünü, Dünyabaxışını, fəlsəfəsini təqdim eləmişik. İndi də Asif Atanın Yolunu yaşadırıq, İnamını davamlı olaraq öyrənirik və öyrədirik.

Bu gün biz Asif Atanın 75 illiyi qarşısındayıq. 25 Ata Ayı, 32-il (sentyabr, 2010) tarixdə Asif Atanın anadan olmasının 75 ili tamam olur. Bu məqsədlə sayğılı oxucular, onun ömrü ilə bağlı diqqətinizi bir məsələyə yönəldək.

Bəllidir ki, 75 yaş cəmiyyətdə yubiley yaşı kimi qəbul olunub. Ancaq bu vaxta qədər biz Asif Ataya yubiley keçirməmişik. Özü də bunu istəmirdi. Yubiley hadisəsini adi bir təqdimat hesab edirdi. Hələ 15 il bundan öncə məni (red. - Soylu Atalını) müxtəlif ədəbi orqanlara göndərərək təkidlə bildirmişdi ki, bizdən xəbərsiz heç kəs Onun (Asif Atanın) 60 illik yubileyini keçirmək təşəbbüsündə bulunmamalıdır.

Asif Ata heç vaxt öz adının, şöhrətinin gələcəyini düşünməyib, xalqının gələcəyini düşünüb. Bu günün şöhrətinə küsənməyi miskin aqibət yaşayanlara aid edibdir. Əslində Asif Atanın ömrü yubiley hadisəsinə sığmır da. Elə buna görə də Asif Atanın doğum təqviminə yönəlik söz demək xeyli çətindir. Asif Atanın ömründən bəhs etmək - şair ömründən, əməkdar xadim, yaxud siyasi xadim ömründən bəhs etmək qədər sadə deyil. Heç kimin ömrünü aşağılamadan bildiririk ki, Dünyabaxış hadisəsi hansısa bir cəhət, yaxud element deyil, dərin özülü və gələcək istiqaməti olan məsələdir; bir ömrün tutumundan qat-qat artıq olan Bəşəri dəyərdir; bir günə, bir tədbirə sığmayan məzmun nadir ömürlərdə yaşayır.

Bu səbəbdəndir ki, hər il Ata Ayının (sentyabr) 25-ni Ocağımızda Mərasim kimi keçiririk. Bu təqvim həmişəlik olaraq Ocaq Mərasimi kimi qəbul olunubdur. Mərasim - Atanın ömrü, işi, Ata-Evlad vəhdəti, Mütləqə İnamın xalqda oturuşması məzmununda həyata keçirilir. Yol Yaradan öz Davamçılarından ciddi məsuliyyət tələb edir. Asif Atanı yaşatmaq - əslində xalqı yaratmaq deməkdir. Bu fikir şüar kimi görünməsin. Mütləqə İnam - Asif Atanın şöhrətlənməsi üçün deyil, xalqın var olması üçündür. İnam - xalqın içində özümlü quruculuq deməkdir. Ona görə də İnamın şöhrət üçün olmasından danışmağa dəyməz. Bu günün şöhrəti kütlənin səviyyəsinə uyğun davrananda, kütlə kimi yaşayanda yaranır. İnam isə kütlənin mövcud səviyyəsini inkar edir, onu özündən yüksək olmağa sövq edir. Ona görə də ilk mərhələlərdə "İnkar" özünə qarşı inkar yetirir. Asif Ata yaratdığı İnamı bu topluma verdiyi ilk gündən çağdaşları tərəfindən danılmağa başlayıb. Ancaq bununla belə xalqın içinə yol tapıb və barmaq sayda olsa belə öz ardıcıllarını yetirib. Əslində İnam Yükü elə barmaq sayda adamların çiyninə düşür. Bu çiyinlər möhkəmləndikcə İnam da xalqlaşır. Təsadüfi deyil ki, bu gün İnamın sorağı yurdumuzun sınırlarından qırağa çıxıb əks-səda doğurmaqdadır.

Asif Atanın məzmunca dərin, həcmcə geniş elə bir İrsi yaranıb ki, düşünürük bu, Azərbaycan xalqı üçün başucalığıdır. Bu xalqın öz içindən yaranan və İnsani Həyat ahəngi vəd edən bu İrs, onu həm Qədim Dünyanın bir hissəsi kimi təqdim edir, həm də bəşər gələcəyinin böyük, ruhani bir xalqı kimi. Asif Atanın ömrü belə bir zəngin gedişatın arxasında dayanıb. Bu aqibət onun sağlığında gecikən xoşbəxtliyidir. Ona görə də hesab edirik ki, bu Aqibəti yubileylərdə xırdalamaq, kiçiltmək olmaz...

Yükümüzdən Böyük Fərəhimiz Yoxdur!

Atamız Var Olsun!

Soylu Atalı

Təzadlar.- 2010.- 25 sentyabr.- S.14.