"Azərbaycanın güclü dövlətə çevrilməsi bizləri çox sevindirir"

Kəmalə Hüseynova: "Danimarkalıların Azərbaycan musiqisinə maraqları gündən-günə artır"

Azərbaycan musiqisini Danimarkada yaşadan və onu sevərək təbliğ edən Danimarka-Azərbaycan Dostluq Cəmiyyətinin Mədəniyyət Mərkəzinin rəhbəri Kəmalə Hüseynovanın "Təzadlar" qəzetinə müsahibəsi.

- Kəmalə xanım, öncə oxucularımıza özünüz haqqında məlumat verməyinizi istərdik.

- Mən 1965-ci ildə anadan olmuşam. Bakıda o vaxtkı Dzerjinski adına 11 illik orta ixtisas musiqi məktəbini, eyni zamanda Bakı şəhəri 12 nömrəli orta məktəbi fərqlənmə ilə bitirmişəm. 1986-cı ildə indiki N.Tusi adına Azərbaycan Pedaqoji Universitetini qırmızı diplomla bitirmişəm. Onu da qeyd etmək istərdim ki, Adil Bəbirov, Eldar Mansurov, Kamilə Qarabağlı, Gülarə Axundova, Dilarə Əliyeva kimi istedadlı bəstəkar və musiqiçilərin tələbəsi olmuşam, bununla da fəxr edirəm, əldə etdiyim nailiyyətlərdə onların əməyi böyükdür. Həmin ildən etibarən ixtisasım üzrə əmək fəaliyyətinə başlamışam.

1988-ci ildə ailə qurmuşam və həyat yoldaşım sovet ordusunun zabiti olduğu üçün Macarıstanda, Rusiyada və Ukraynada orta və musiqi məktəblərində çalışmışam.Təbii ki, sovet dönəmində hərbi orkestrlərlə və coxmillətli uşaq və gənclərlə apardığım işlərdə böyük təcrübə əldə etmişəm.1991-ci ildə ermənilərin Azərbaycana təcavüzü başlayan kimi həyat yoldaşım vətənə dönərək döyüşlərə qatıldı, mən isə Azərbaycan Respublikası Bədii Gimnastika Federasiyasında musiqi tərtibatçısı və pianoçu kimi fəaliyyət göstərməyə başladım.

2003-cü ildən ailəmlə Danimarkanın Fredensborq şəhərində yaşayıram. Danimarka dili məktəbini bitirmişəm, özəl Danimarka məktəbində, ixtisas musiqi məktəbində və özəl türk məktəbində musiqi, xor və fortepiano dərsləri verirəm. Bundan əlavə, danimarkalı vətəndaşlardan ibarət "Hafla" instrumental ansamblında və Danimarkanın qədim Renessans xorunda fəaliyyət göstərirəm. Danimarka-Azərbaycan Dostluq Cəmiyyətinin Mədəniyyət Mərkəzinin rəhbəri kimi daim fəaliyyət göstərirəm.

- Danimarkada Azərbaycan musiqisinə maraq necədir və xüsusilə, hansı janrlarla maraqlanırlar?

- Bir çox avropalılar kimi, danimarkalılar da əsasən müasir estrada musiqisinə, yaşlı nəsil isə dini musiqiyə üstünlük verirlər. Ümumiyyətlə, danimarkalılar təvazökar, işguzar və xoşməramlı xalqdır. Hər yeniliyə böyük maraq göstərirlər. Azərbaycan musiqisinə maraqları gündən-günə artır. Çıxışlar və konsertlerdən sonra mənə yaxınlaşıb ifa etdiyim musiqi və mahların qaynaqları ilə maraqlanırlar. Azərbaycan bəstəkarlarının CD-sini və ya internet ünvanını istəyirlər. Hesab edirəm ki, Azərbaycanımızı geniş tanıtmaq üçün musiqimizin və ümumiyyətlə, zəngin mədəniyyətimizin təbliği birinci yerdə olmalıdır. Çünki bu, protokol tədbirlərdən daha effektivdir.

- Ümumiyyətlə, Qərb müsiqisi ilə Şərq müsiqisi arasında fərqli cəhətlər coxdurmu, yoxsa prinsip etibarilə hər ikisinin fəlsəfi mahiyyəti eynidir?

- Təbii ki, Qərb musiqisi ilə bizim musiqi arasında olduqca böyük fərq var və fəxrlə qeyd etmək istərdim ki, bizim musiqimiz qərb musiqisindən qat-qat zəngin və maraqlıdır, bununla danimarkalıların özləri də razılaşır. Nəinki qərb musiqisi, şərqdə Azərbaycan musiqisindən zəngin və gözəl musiqi yoxdur. Bunu dəfələrlə mənimlə söhbətlərində Turkiyənin, Misirin, İraqın, özbəkistanın, İranın peşəkar musiqişünasları təsdiq ediblər. Təkrarolunmazlığı və rəngarəngliyi ilə seçilən Azərbaycan musiqisinə bir dəfə qulaq asan, ömürlük onun heyranı olur.

- İçtimai işlərdə necə, fəalsınızmı və diasporamızın işləri ilə maraqlanırsınızmi?

- Əlbəttə, amma daha çox Türk özəl məktəbində və Danimarka "Kompas" gənclər mərkəzində geniş fəaliyyət göstərirəm. Hər il keçirilən Beynəlxalq Türkcə Olimpiadalarının Danimarka üzrə musiqi tərtibatçısı və münsiflər heyətinin üzvüyəm. Danimarka-Azərbaycan Dostluq Cəmiyyətinin mədəniyyət mərkəzinin rəhbəriyəm. ümumiyyətlə, musiqi özü-özlüyündə içtimai işdir, insanlarin ortaq nöqtəsidir.

- Bu gün danimarkalıların təsəvvüründə Azərbaycanla bağlı fikirləri necədir?

- Mən Danimarkaya yeni gələndə ətrafımızdakı insanların əksəriyyəti Azərbaycanın harada yerləşdiyini belə bilmirdi, hətta bu, mənim xətrimə dəyirdi. Amma gün-gündən vəziyyət dəyişir. Azərbaycanın güclü dövlətə çevrilməsi, dünyada artan nüfuzu bizləri çox sevindirir. Artıq bu gün Azərbaycanı geniş Danimarka kütləsinə tanıtmağa nail olmuşuq. Yaxınlarda küçədə bir danimarkalının "Əsmərim" mahnısını özü-özünə zümzümə etdiyini eşitdim və bunu gördüyüm işlərin ən böyük bəhrəsi kimi qəbul edirəm.

Musiqimiz o qədər gözəldir ki, hətta bir qrup təqaüdçü danimarkalı xor təşkil edərək onlara azərbaycan mahnılarını öyrətməyi məndən xahiş ediblər. Çox gözəl də oxuyurlar, bizim xalq mahnılarını çox bəyənirlər. Bu gün, demək olar ki, Hillerod və Fredensborq şəhər bələdiyyələrinin əsas dövlət və mədəniyyət tədbirlərində Azərbaycan musiqisi və mahnıları səslənir və alqışlarla qarşılanır.

- Əslində siz böyük işlər görürsünüz, danimarkalılara musiqimizi öyrətməklə xalqımızın milli mənəvi dəyərləri ilə onları məlumatlandırırsınız. Oxucularımız üçün də maraqlı olardı ki, Danimarkada sizin kimi içtimai-inzibati, elm tədris mərkəzlərində çalışan insanlar varmı?

- Danimarkada azərbaycanlı çox azdır. Yəqin ki böyüklü-kiçikli 60-70 insan var və onlar bütün Danimarkaya yayılmışlar. Demək istərdim ki, azərbaycanlılar oxuyur, çalışır və nailiyyətlər əldə edirlər. Aramızda gözəl mütəxəssislər, həkimlər, iş adamlari var və əldə etdikləri nailiyyətlər Azərbaycanımızı bir çox sahələrdə tanıdır. Amma hesab edirəm ki, Azərbaycanımızı tanıtmaq üçün geniş danimarkalı auditoriyası vacibdir. Həyat yoldaşım Elxan Fredensborg bələdiyyəsinin mədəniyyət və ictimaiyyət bölməsində fəaliyyət göstərir və Danimarka-Azərbaycan Dostluq Cəmiyyətinin sədridir.

Cəmiyyətimiz Danimarka dövləti tərəfindən dəstəklənir, fəaliyyətimiz gərəkli və əhəmiyyətli qəbul olunur. Azərbaycanla bağlı bir çox layihələr həyata keçirmişik və bu gün də bu layihələr davam edir. Mənə gəldikdəisə, ən böyük arzum yaratdığımız danimarkalılardan ibarət "Hafla" ansamblı ilə Azərbaycanda konsert proqramı ilə çıxış etmək, ansambl üzvlərinə qədim və gözəl Azərbaycanımızı göstərməkdir.

- Kəmalə xanım, suallarımızı cavablandırdığınız üçün sizə təşəkkürümüzü bildiririk və gələcək işlərinizdə uğurlar azru edirik.

- Vətəndən uzaqda yaşayan azərbaycanlıların həyatı ilə maraqlandığınız üçün "Təzadlar" qəzetinin kollektivinə təşəkkürümüzü bildiririk. Ölkəmizi, milli - mədəni irsimizi Avropaya tanıtmaq və sevdirmək üçün əlimizdən gələni etməyə həmişə hazırıq.

Elnur Eltürk

Təzadlar.- 2011.- 23-26 aprel.- S.12.