Osman Gəzəkər Turqut Ərə cavab Verdi

(Əvvəli ötən saylarda)

Azərbaycan-Türkiyə münasibətlərində uzun müddət xidmətləri olmuş Osman Gəzəkərin "Təzadlar" qəzeti vasitəsilə açıqlamaları

"Mənim Azərbaycanda qürur duyduğum bir sıra insanlar var. Onlardan biri də daxili işlər naziri sayın Ramil Usubovdur"

- Osman bəy, Turqut Ər qeyd edir ki, siz Azərbaycanda diplomatik fəaliyyətə başlayan kimi dərhal Azərbaycan iqtidarının xüsusi qayğısı və diqqətinə malik olan müstəsna adam olmusunuz. Sizə xüsusi mənzil şəraiti və səfirin belə, malik olmadığı minik avtomobili və digər şəraitlər yaradılmışdı.

- Hər bir insan öncə sözünün məsuliyyətini dərk etməlidir. Mən Turqut Ərin iddia etdiyi kimi, Bakıda diplomatik vəzifədə çalışdığım zaman düz üç il rəhmətlik Əbülfəz Elçibəyin çox yaxın qohumlarının birinin evində, yəni "Nizami" metrostansiyasından bir qədər yuxarıda kirayədə yaşamışam. Bu ailənin çox böyük maddi sıxıntısı var idi. Sadə bir mənzildə həm ev sahibi məndən, mən də onun əxlaqlı bir insan olmasından çox məmununluq duymuşuq. Mənə ən çox xoş gələn də mənzil sahibinin böyük türkçü insan olması idi. Mənə şəxsən Azərbaycan iqtidarı tərəfindən xüsusi mənzil verilməsi, xidməti maşın hədiyyə edilməsi hadisəsi olmayıb. Turqut Ər əsassız olaraq iddia edir ki, guya Türkiyə səfiriliyinin malik olmadığı yüksək səviyyəli qayğı mənə olub. Halbuki o zaman Trabzon əsilli bir yaxın dostum ilk dəfə olaraq Türkiyə və Azərbaycan arasında təyyarə reysləri xidməti göstərən şirkət açmışdı. Bu şəxs Türkiyədə Muhtar adıyla tanınan və indi həyatda olmayan Rıfat Güney adlı bir iş adamı idi. Mən diplomatik fəaliyyətə başlayan zaman Azərbaycan vətəndaşı olan adi bir insanın "Jiquli" markalı maşınını kirayələmişdim. Rıfat Güney işadamı olduğu üçün tez-tez xaricdə ezamiyyətlərdə olurdu. Onunla yaxın dostluğumuz var idi. Buna görə də Rıfat Güney Almaniyadan özü üçün gətirdiyi və texniki vəziyyəti orta səviyyədə olan "Mercedes" markalı maşınından müvəqqəti olaraq istifadə etməyimə izn vermişdi. Sonradan biz həmin maşını Fuad bəyə geri qaytardıq. İmkanımız yaranan kimi öz maşınımızdan istifadə etməyə başladıq. Turqut Ər bu faktları bilmədən özünün yalanlarının əsirinə çevrilib.

- Sizinlə bağlı qeyd olunan iddialardan biri də guya Azərbaycanda polis rejiminin qurulmasında yaxından iştirak edən əsas simalardan biri olmusunuz. Hətta o zamankı səfir Altan Karamanoğlu belə, sizin təyinatınızdan narazı olub.

- Öncə onu qeyd etmək istəyirəm ki, mənim səfirlikdə əmniyyət müşaviri vəzifəsində fəaliyyətə başlamağım o zaman səfir vəzifəsində çalışan Altan Karamanoğlunun da təəccübünə səbəb olmuşdu. Turqut Ər bu faktı haqlı olaraq qeyd edir. Ancaq səfirliyin nəzdində belə bir statusla mənim çalışmağımın əsas mənası "bir millət-iki dövlət" maraqlarını uzlaşdıran səbəblərdən, eyni zamanda bir sıra uzlaşmaları daha da dərinləşdirmək, çevik şəkildə bu prosesin inkişaf etdirilməsi məqsədini güdüb. Onu da qeyd etməyi zəruri bilirəm ki, iki dövlət arasında qarşılıqlı güvənlik məsələsinin dərinləşməsi, Azərbaycandan Türkiyədəki polis akademiyalarında müasir standartlara cavab verə biləcək kadrların təhsil alması kimi məsələləri həll edirdik. İndi aradan xeyli müddət keçib. Belə bir təhsil siyasəti əslində Azərbaycanın keçmiş sovet təfəkkür tərzindən uzaqlaşması, müasir dünya standartlarına uyğun kadr siyasətinin tərkib hissəsi kimi başa düşmək lazımdır. Mərhum prezidentimiz Heydər Əliyev belə bir fəaliyyətə xüsusi önəm verirdi. Türkiyədəki polis akademiyalarında təhsil almış həmin kadrlar bu gün Azərbaycanda xidmət edirlər. Şəxsən bu yöndəki xidmətimdən çox qürur duyuram. Mənim Azərbaycanda qürur duyduğum bir sıra insanlar var. Onlardan biri də daxili işlər naziri sayın Ramil Usubovdur. Onunla diplomatik fəaliyyətim müddətində çox sıx təmaslarımız olub. Hər iki dövlətin arasında dərin tellərin bağlanılmasında onun xidmətlərinin misli yoxdur. O, sadəcə, bu barədə başqaları kimi danışmağı sevmir. Əsl dövlət xadimi etdiklərini dövlətinə və millətinə sədaqət andı kimi qəbul edir. Mən bu mənada, Ramil Usubovdan çox razıyam.

- Turqut Ər sizinlə bağlı daha bir iddia ortaya qoyub ki, Osman Gəzəkər diplomatik səlahiyyətini aşaraq, Bakıda çoxlu sayda restoranlar şəbəkəsinə malik idi.

- Bəli, mən qeyri-rəsmi şəkildə bir insanlıq borcu kimi bu yöndə bir sıra addımlar atmışdım. Bakıda fəaliyyət göstərən bütün universtitetlərdə xeyli sayda türkiyəli tələbələr təhsil alırdılar. Onların əksəriyyəti kasıb ailələrdən çıxmış insanlar idi. Bu tələbələrin hansı qayğılar və maddi sıxıntılara malik olduqlarını zatən Turqut Ər, digər səfirlik işçiləri də bilirdilər. Mən öz təşəbbüsümlə həmin tələbələrin gənclik yaşında belə bir maddi və mənəvi sıxıntılar içində əzab çəkmələrinə dözə bilmirdim. Onlara imkanımız daxilində nə qədər dəstək olsaq da, bütün bunlar etdiklərimizin qarşılığında çox cüzi idi. Onlar bəzən bir dəfə etdiyimiz yardım və dəstəyin qarşılığında ikinci dəfə bizə müraciət etməyə utanırdılar. Buna görə də həmin gəncləri bir araya gətirərək, dərs saatlarından sonra hər hansı bir kafedə və restoranda çalışmaları üçün imkan yaradılmasına onlara dəstək oldum. Demək olar ki, tələbələrin hamısı burada pulsuz qidalanırdılar. Eyni zamanda öz maddi problemlərinin həllində bir sıra uğurlar da əldə etmişdilər. Elə tələbələr var idi ki, Bakıdan Türkiyədəki kasıb ailəsinə belə maddi cəhətdən kömək etməyə başladılar. Turqut Ərin bütün bunlardan xəbəri yox idi. çünki onun başı iş rejimi bitdikdən sonra bahalı viskilər içməyə qarışmışdı. Turqut Ərin heç xəbəri belə yoxdur ki, mənim həmin restoran və kafelərdən bir quruş da olsa xeyrim olmayıbdır. çünki həmin kafe və restoranları tələbələrin özləri icarəyə götürürdülər. Mən, sadəcə, onlara qarşı problem yarandığı təqdirdə, rəsmi şəxs qismində kömək etmişəm. Belə bir dəstəyin nəticəsi olaraq, türkiyəli tələbələrin başqa mənasız əməllərə qurşanmasının qarşısı alınırdı. O zaman Turqut Əri daha çox əntiq malların ticarətilə maraqlandırırdı. Mən çox-çox sonralar onun belə bir qeyri-rəsmi fəaliyyətindən xəbər tutmuşam. İndi bəlli olur ki, Turqut Ər Azərbaycan rəssamlarını içki məclislərinə dəvət edərək onların qiymətli sənət əsərlərini çox ucuz qiymətə almaq siyasətini aparırmış. O zaman Azərbycanda çox ucuz qiymətə aldığı həmin qədim sənət əsərlərini bu gün Türkiyədə çox baha qiymətə satmaqla məşğuldur.

- Osman bəy, Turqut Ər iddia edir ki, siz Azərbaycanda diplomatik xidmətdə olduğunuz zaman qardaş Türkiyəyə qarşı fəaliyyət göstərən PKK-çılarla əlaqədə olubsunuz və eyni zamanda onların himayə olunmasında yaxından iştirak etmisiniz. Bu iddalar nə qədər doğrudur?

(Ardı var)

Ənvər Yusifoğlu,

Azərbaycan Jurnalistlər

Birliyinin üzvü

Təzadlar.- 2011.- 10-12 fevral.- S.7.