Haqsız axan qan...

Misirin eks-prezidenti Hüsnü Mübarəkə.

Heç vaxt yerdə qalmayır

Millətin ah amanı.

Vaxt vədə yetişəndə,

Zaman özü gətirir.

Hər şeydən qırılanda,

Hər ümidü, gümanı,

O baxmır bu dünyada

Nə qazanır, itirir.

Gedir ərşdə dayanır,

Onun səsi, naləsi.

Özünü haqlı sayır

Tanrının da yanında.

Dönüb baxa bilməyir,

Hansı yanda qibləsi.

Nifrəti püskürəndə

Ürəyində canında.

Hər söz söndürə bilmir,

Dərdlə gələn tufanı.

Silir, süpürür, atır

Nə çıxsa qarşısına.

Ölümlər qorxutmayır

Təngə gəlmiş insanı

Daha məhəl qoymayır

Pisinə, yaxşısına.

Etiraf eləsən də,

Yüz dəfə, milyon dəfə,

Günahsız tökülən qan

Etirafla yuyulmur.

Özün günahsız sayan

Layiqdirsə, nifrətə

Ona öz vətənində

Daha hörmət qoyulmur

Bu dünya çox görübdü

Qan tökən fironları.

Adını tarixlərə

Əbədi yazan da var.

Onların diktəsinə

Axıdılan qanları

Nə tarix yuya bilir,

Nə də özləri yuyar.

Kamal Alışoğlu

Təzadlar.- 2011.- 12-15 fevral.- S.15.