"Əsl şairdə gərək bir anormallıq olsun"

Əhməd Şahidov: "Romanımda Azərbaycanda baş verən ictimai-siyasi proseslərə maraqlı yanaşma sərgiləyəcəm"

Son vaxtlar gənclərin ədəbiyyata marağı artmaqdadır. Müasir gənclik, sadəcə, ədəbiyyat oxumaqla deyil, eyni zamanda ədəbi yaradıcılıqla da məşğul olur. Burada da fərqli zövqləri, fərqli baxışları sezmək mümkündür. Amma əsas bu deyil. Əsas olan yeni ədəbiyyatın yaranması və ölkədə baş verənlərin gənclərin dilindən poetik tərzdə təsvir olunmasıdır. Bu baxımdan, yenicə ədəbi yaradıcılığa qədəm qoyan, onlarla şeirin, bir-neçə hekayənin müəllifi olan Əhməd Şahidovla söhbətləşmək qərarına gəldik:

- Əhməd bəy, siz ədəbi aləmə necə gəldiniz? İlk yazdığınız əsər hansı janrda olub?

- Mən əsasən şeirlər yazıram. Onlarla şeirin müəllifiyəm.

- Deməli, şairsiniz?!

- Mən özümü şair hesab etmirəm. Sadəcə, təbim gələndə şeir yazıram, vəssəlam.

- Şair adlandırılmaqdan niyə qorxursuz?

- Qorxmuram, sadəcə, düşünürəm ki, şairlər qeyri-adi insanlardır, hətta mən deyərdim ki, əsl şairdə gərək bir anormallıq olsun. Adi insanlar kimi düşünməsin, adi insanlar kimi gəzməsin, baxmasın. Şairlər məndən inciməsin, amma əsl şairdə gərək bir az dəlilik olsun. Onda, məncə, əsl şeir, əsl sənət yaranar. Mən isə normal insanam. (Gülür)

- Şeirləriniz əsasən hansı mövzudadır?

- Şeirlərimi əsasən fikirlər, düşüncələr içində boğulanda yazıram. Tez-tez düşünürəm. Düşüncələrimin əksəriyyəti isə ana, vətən və Allah barəsindədir. Odur ki, şeirlərimdə əsas xətt məhz bu üç müqəddəs varlıqdan keçir.

- Bəs sevgi, məhəbbət barədə yazmırsınız? Axı bu qəbildən şeirlərinizə də rast gəlirik...

- Doğrudur, məhəbbət barədə də yazıram. Mən deyərdim, bu barədə şeirlərim daha çoxdur. Amma nədənsə, sevgidə vüsalı, hicranı, həsrəti, ayrılığı daha yaxşı təsvir edə bilirəm. Odur ki, xoşbəxt sevgi sonluqlu şeirim heç yoxdur.

- Niyə? Bəlkə bu, şəxsi həyatınızla bağlıdır? Məhəbbət sizə çoxmu acı çəkdirib?

- Ola bilər. Amma bu haqda danışmaq istəməzdim.

- Ən çox sevdiyiniz, bəyəndiyiniz şeiriniz hansıdır?

- (Bir qədər düşünür) Ən çox sevdiyim şeirim "Sənsən" adlanır:

Səni axtarmışam bir ömrüm boyu,

Həyatda ən böyük uğurum sənsən.

Bir bahar səhəri içimə dolan

Sevgi dolu təmiz nəfəsim sənsən.

***

Səninlə başladı sevgi həyatım,

Bu yolda sən mənim əlimdən tutdun.

Birlikdə yürüdük uzun bir yolu,

Mənə yol göstərən çırağım sənsən.

Bu şeiri heç vaxt əldə edə bilmədiyim, amma xəyallarımdan bir an belə çıxmayan bir gözələ həsr etmişəm. Bilmirəm o kimdir, amma bilirəm ki, yaşayır və məni yaşamağa, yaratmağa sövq edir.

- Bəs nəsr necə? Ədəbiyyatın bu janrıyla aranız necədir? Nəsə yazmısınızmı?

- Bir-iki hekayə yazmışam. Amma qısa hekayələrdir. Hazırda isə roman yazıram. Bu romanın böyük hay-küyə səbəb olacağını zənn edirəm.

- Romanınız nədən bəhs edir və necə adlanır?

- Artıq bir aydır ki, yazmağa başlamışam. Adını hələ qoymamışam, axırda bir ad fikirləşəcəm. Özüm üçün də maraqlıdır. Hər gün yeni hadisələr baş verir romanda. Bu gün oturub yazıram, amma sabah nələr yazacağımı dəqiq bilmirəm. Hər günün ssenarisini öz gününə saxlayıram. Ona görə də özüm üçün də maraqlı gəlir. Bu marağı, həyəcanı daha çox yaşamaq üçün asta-asta yazıram. Güman edirəm ki, 3-4 aya bitirərəm. Roman süjet xətti bir cavan oğlanın başına gələnlərdən bəhs edir. Kənddə böyüyüb başa çatmış bu cavan oğlan daha sonra Bakıya gəlir, burada özünə iş və ev tapır, siyasətə qoşulur, yeni-yeni simalarla tanış olur, ölkə siyasətinin içinə qədər daxil olur, eybəcərlikləri, xəyanətləri, ikiüzlülükləri öz gözləri ilə görür. Bu qədər... qalanını hələ özüm də bilmirəm.

- Romanda qəhrəmanlarınız uydurma olacaq, yoxsa reallıq təsvir olunur?

- Yox. Mən digər müəlliflər kimi qəhrəmanlarımı ya tam, ya da qismən gizlətməyəcəm. Qəhrəmanımdan başqa bütün personajlar real həyatda yaşayan, siyasətlə məşğul olan insanlardır. Odur ki, onların hamısını bildiyim qədər canlandıracam. Hansı siyasətçini necə görürəmsə, elə də canlandıracam.

- Bəs qorxmursuz ki, roman çıxandan sonra bəzi siyasi dairələrdən sizə qarşı təzyiqlər yönəlsin?

- Hər şey ola bilər. Ancaq hesab etmirəm ki, hansısa siyasətçi bədii əsərə görə roman müəllifini məhkəməyə verəcək qədər cılız düşüncə sahibi olsun. Amma hər şey ola bilər. Yaxşı olar, inşallah.

- Ümumiyyətlə, çağdaş yazıçılardan, xüsusən də Azərbaycan yazıçılarından kimləri oxuyursunuz və kimi bəyənirsiz?

- Heç kimi oxumuram. ümumiyyətlə, özüm nəsə yaratmağı xoşlayıram. Kimisə oxuyub, sonradan təqlid etməklə aram yoxdur. Mən real həyatı, gördüyüm, şahidi olduğum və qavradığım həyatı yazıram. Mənim tarixi fantastikayla, uydurma əsərlərlə aram yoxdur.

- Bəs şairlərdən kimi bəyənirsiz?

- Salam Sarvanı, Aqşin Yeniseyi, Ramiz Rövşəni və Zəlimxan Yaqubu çox bəyənirəm.

- Şeirlər kitabınızı nə zaman oxucuların ixtiyarına verəcəksiniz?

- Şeirlər kitabımı bir-neçə aya təqdim edəcəm. Amma oxucularım şəxsi saytımdan (shahidov.com) şeirlərimi oxuya bilərlər. Romanımı isə yayda dərc etdirəcəm.

Fərid Şahbazlı

Təzadlar.- 2011.- 17-19 fevral.- S.15.