Qədir Rüstəmovu dinlərkən

"Segah" ın canımı aldı,

Ötənləri yada saldı,

Həzin, şirin avazına

Bülbüllər də heyran qaldı.

Oxu Qədir, yandır Qədir, yan Qədir.

"Dili-dili" dilləri bəzər,

Qəlbimin evində gəzər,

Bu səs ilə dalğalanar

Dəli Kürüm, mavi Xəzər.

Oxu Qədir, yandır Qədir, yan Qədir.

"Apardı sellər Saranı"

Sızlatdı yenə yaramı,

Xançobanın naləsidir

Yandırıb - yaxar Aranı.

Oxu Qədir, yandır Qədir, yan Qədir.

"Olmaz-olmaz" olar oldu,

Məlhəm olub qəlbə doldu,

Can yandıran o səsindən

Çəməndə güllərim soldu.

Oxu Qədir, yandır Qədir, yan Qədir.

"Ay Laçın" bağrım qan etdin,

Çox yalvardım, sən yan keçdin,

Fələk də baş açammadı

Yollarına qurban etdin.

Oxu Qədir, yandır Qədir, yan Qədir.

"Çahargah" ruh kimi uçar,

Paslı könülləri açar,

Ən ümidsiz qəlbə belə

Sevgi dolu işıq saçar.

Oxu Qədir, yandır Qədir, yan Qədir.

"Sarı gəlin" mənim varım,

Kimsənin yox, mənim yarım,

Haram əllər uzanmasın

Dağ başında bəyaz qarım.

Oxu Qədir, yandır Qədir, yan Qədir.

Nə yaman soldurdu məni,

"Sona bülbüllərin" qəmi,

Köz oldu düşdü qəlbimə,

Gözümdən doldurdu məni.

Oxu Qədir, yandır Qədir, yan Qədir.

Adilə

Təzadlar.- 2011.-2-4 iyun.- S.15.