Şair haqqında söz

Bölgə-paytaxt ayrıntıları tarixən Azərbaycan ədəbiyyatında və eləcə də Milli mədəniyyətimizdə fərqli və əsaslı şəkildə gözə çarpmamışdır. Ona görə ki, istər fəlsəfi, istərsə də bədii fikir bu sərhədləri tanımır. Xəqanidən Nəsimiyə, Füzulidən Nəbatiyə və bu gün Musa Yaquba qədər bu gerçəklik tam doğru-dürüst və real bir gerçəklikdir.

Bu gün Şirvan torpağın da yaşayan yazıçı Mirəfsəl Təbib sözün həqiqi mənasında Tanrının ona verdiyi yaradıcılıq enerjisinin miqyas və vüsət qütblərinin bütün əhatəsində aydın görünə bilməsi ilə seçilən yazıçılarımızdandır. Yaradıcılıq nümunələrinin nəşri və ədəbi orqanlarda dərc olunması baxımından heç də paytaxtda yaşayan qələm dostlarımızdan fərqlənməyən Mirəfsəl bədii yaradıcılıq məziyyətlərinə görə həmişə orijinal və məhsuldar ampulası ilə diqqəti cəlb edir:

Bu da bir rübai-yüzbirincidir,

Yüz bir ləl, cəvahir, yüzbir incidir.

Qüdrətdən yaranan hər şey gözəldir,

Amma Söz-möcüzə, Söz birincidir.

Milli heca şeirimizin ənənələrinin böyük ustalıqla qorunmasından əlahidə bu bənddə orijinal bədii səciyyələndirmə və sözə fəhmlə yanaşma Mirəfsəl misralarında oxucunu elə ilk misralardan əfsunlaya bilir. Bu "əfsun" bədii ifadə tərzinin orijinallığından daha çox, sözə bədii kredo və ədəbi əxlaq prizmasından baxıldıqda görüntüyə gəlir, bədii mündəricə qazanaraq şeirdə ustad nəfəsinin emosional bəlirtisini əhatə edə bilir. Mirəfsəl Təbib qələmində bu səciyyəvilik milli ənənələrə bağlılığın təzahürlərindəndir.

Şairin qələmə aldığı mövzular özünün zənginliyi və səciyyəviliyi baxımından diqqəti xüsusi ilə cəlb edir. Belə ki, bu səciyyəvilik milli ədəbiyyatımızın mərhələ xüsusiyyətləri ilə bədii-fəlsəfi ənənəvilik əlaqələri baxımından ciddi bir dinamikaya malikdir. Bu ənənəvilik təriqət prinsiplərindən başlayaraq, Azərbaycan şeirinin təsəvvüf çalarlarına qədər davam edə bilir. Hətta, Mirəfsəlin bu səpkidən olan şeirlərində irfan motivləri elə ilk təəssüratlarında aydın və konkret ideya-estetik məntiqi ilə nəzərə çarpır:

İlahi, bir eşq ver mənə,

Hardayamsa heç bilməyim.

Elə itirim özümü,

İtirsəm də qoy bulmayım.

Əlbəttə, şair irfan əxlaqının eşq ərkanatına nişan verən bir ülvi məhəbbətdə və bu eşqin dərinlik və zənginliyində əriyib itmənin, yox olub mənəviyyatca ilahi nura qovuşmanın hicran duyğularını tərənnüm işığına tutur ki, bu işıqda Şərq ədəbi mühitinin irfan ürəfasının bu yolda ifadə etdikləri xeyli mətləblərin əks-sədasını aydın eşitmək və duymaq o qədər də çətin deyildir.

Mirəfsəl şeirlərində bədii-fəlsəfi duyum çalarlarında şərtilikləri çoxdur. Bu şərtilik təzahürləri baxımından şairin dual bədii modifikasiyaları daha çox Şərq-Qərb tandeminin fəlsəfi dünya duyumları ilə özünü büruzə verir.

Mirəfsəl təbib poeziyasında vətən başdan-başa Təbrizli- Dərbəndli, Zəngəzurlu-Göyçəli, Qarabağlı, Borçalı sınırları ilə birdi, birgədi, bütövdü, tamdı. Vətən sözü ilə, sazı ilə, baldan şirin dili ilə ən böyük poetik obrazdır. Bu poetik duyum daha çox böyük türkçülük motivləri ilə də şairin yaradıcılığında diqqəti gəlb edə bilir:

Tarixlər yaradıb türkün türk soyu,

Hünərli döyüşü, düyünü, toyu,

Əsrlər, əsillər, nəsillər boyu

Olubdur şöhrəti, şanı qeyrətin.

Milli pafos şairin bədii dünya duyumunda geniş mərhələni təşkil edir. çünki bütün mövzuların da bir vətəndaşlıq pafosu misradan- misraya, bəndən-bəndə həm tərənnüm, həm də tarixi-milli təsdiq obrazını əhatə və ehtiva edə bilir. Bu vətəndaşlıq pafosu yalnız dünənimizin deyil, elə yaxın tariximizin-müstəqillik dövrümüzün də poetik düşüncə tərzini səciyyəsi ilə daha çox diqqəti cəlb edir. Və bu zaman dövlət-məmləkət tandemi Mirəfsəl poeziyasında bir doğmalıq, birgəlik və toplum-xalq anlayışının dövlətçiliklə birlik təntənəsinin simvoluna çevrilir:

Milli birlik olsun hər meyarımız,

Millilik dərk etsin hər həmkarımız...

Uzlaşsın bizimlə bütün yer üzü,

Siyasət hifz etsin, yaşatsın bizi.

Bir yazıçı olaraq Mirəfsəl mövzu əhatəsinin genişliyi ilə diqqəti cəlb edən yaradıcılıq manerasına malikdir. İrəlidə qeyd etdiyimiz şairin bədiyyatına dair fikirlər onun hər misrasında, hər cümləsində özünü büruzə verir. Məhz bu istiqamətdəki araşdırmalarında görkəmli alim Nizami Cəfərov da Mirəfsəl Təbib yaradıcılığına işıq tutaraq yazır: "...dövlətçilik, millilik, türkçülüklə bağlı fəlsəfi qənaətlər və mülahizələr bu əsərlərin əsas mahiyyətini təşkil edir. Onun poeziyasın da əsasən klassik ədəbiyyatımıza məxsus ədəbi və əzəli mövzular qələmə alınmışdır".

Sitatdan da aydın göründüyü kimi Mirəfsəl Təbib müasir vətəndaş şair kimi eyni zamanda kökə, milli gələnəklərə qırılmaz tellərlə bağlı olan qələm sahibidir. Hətta bağlılıq o qədər dərindir ki, onun yaradıcılığını qeyri bir ampulada təsəvvür etmək də çox çətindir. Barəsində, yaradıcılığı haqqında, düşüncələrindəki qızıl ilmələrinin zərif naxışlarına dair kifayət qədər geniş bəhs etmək imkanlarının mümkünlüyünə baxmayaraq, qələm qardaşımız Mirfəsəl Təbibin yaradıcılığına müfəssəl bir baxışla onun böyük ürəyinin döyüntülərinə şəhadət verdik.

Şöhrət Qaraoğlu,

fiziologiya üzrə fərsəfə doktoru,

Azərbaycan Yazıçılar Birliyinin üzvü

Təzadlar.- 2011.- 14-18 iyun.- S.15.