Muğamı canı, qanı ilə sevən qızcığaz

Kamilə Nəbiyeva birinciliyə ən layiqli namizəddir

"...Quş qonmayan qayalarda

daş oynadar,

Kirpiklərdə yaş oynadar,

Mahnılar var, ayaqları,

Muğamlarsa baş oynadar..."

Bu misralar mərhum şairimiz Bəxtiyar Vahabzadənin "Muğam" poemasındandır. Əslində bu misralar həm də xalqımızın mədəni irsi olan muğama verilən ən yüksək qiymətin təzahürüdür...

Hər bir xalqın böyüklüyü onun mədəni irsini, mədəni xəzinəsini layiqincə yaşadanlarla ölçülür. Sevindirici haldır ki, mənəvi xəzinəmiz olan muğamı hər dövrün gəncləri, böyük sənətkarları yaşadıb və gələcək nəsillərə ötürüb. Bu gün Azərbaycanın muğam sənəti ən yüksək səviyyədə təbliğ olunur və yaşayır. Yetişməkdə olan gənc nəsil bu sənəti layiqincə yaşadır. Neçə ildir keçirilən Televiziya Muğam Müsabiqəsi və ötən ildən start götürən Beynəlxalq Muğam Festivalı bu musiqi janrının təbliğatında önəmli rol oynayır.

Artıq bu müsabiqələr vasitəsilə neçə-neçə istedadlı gənci tanımışıq. Bu gənclər öz sənətkarlığı, istedadı ilə hər birimizin rəğbətini qazanıb. Bu gün biz onları həm də böyük səhnələrdə, beynəlxalq arenalarda görürük.

Belə istedadlı gənclərdən biri də hazırda keçirilən 3-cü Muğam Müsabiqəsinin iştirakçısı Kamilə Nəbiyevadır. Kamilə Nəbiyevanın şaqraq zəngulələrində, şirin səsində doğma İsmayıllı torpağının sanki saf havasının, büllur bulaqlarının, ecazkar təbiətinin saflığını, duruluğunu hiss edirik. Yaşının az olmasına baxmayaraq, bu qızcığaz böyük sənətkarlara xas sənət nümayiş etdirir... Hiss olunur ki, Kamilə canı, qanı ilə muğama bağlıdır. O, bu sənəti çox sevir, sanki elə bu sənət üçün, muğamı yaşatmaq üçün doğulub.

Təbii ki, biz tamaşaçılar bu müsabiqənin məsuliyyətini bilirik. Hər həftə yeni qəzəllər əzbərləmək, muğamın incəliklərini mənimsəmək, Arif Babayev, Mənsum İbrahimov, Əlibaba Məmmədov, Səkinə İsmayılova, Ağaxan Abdullayev və s. kimi böyük sənətkarların, milyonlarla tamaşaçının qarşısında muğam ifa etmək çox çətin və məsuliyyətlidir. Bütün bu çətinliklərə baxmayaraq, Kamilə bu işin öhdəsindən bacarıqla gəlir. O, hər dəfə daha böyük sənət nümayiş etdirir. Kamilənin istedadı, bacarığı münsiflərin, eyni zamanda tamaşaçıların gözündən yayınmır. Ötən həftə münsiflərin onun çıxışından sonra heç bir şərh, yozum vermədən birbaşa ən yüksək qiymət - 10 bal vermələri buna əyani sübut idi. Tamaşaçılar isə Kamiləyə verdikləri qiyməti hər dəfə gurultulu alqışlarla bildirirlər.

Söhbətləşdiyim muğam biliciləri bu müsabiqədən söz açanda Kamilə Nəbiyevanın haqqında xoş sözlər bildirir, onun istedadından söz açır və peşəkar muğam ifaçısı kimi parlaq gələcəyi olacağını bildirirlər. Təbii ki, ən doğru qiyməti onlar verirlər.

Biz də müşahidə etdiyimizdən, eşitdiklərimizdən nəticə çıxararaq bu balaca qızcığazın böyük gələcəyi olacağını, böyük səhnələr fəth edəcəyini düşünürük. Bu yolda Kamiləyə uğurlar arzulayır, istedadına inandığımızı bildiririk. İnanırıq ki, o, bu müsabiqədən qalib kimi ayrılaraq daha böyük səhnələrdə daha böyük qələbələr qazanacaq və daim öz sənəti, səhnə fəaliyyəti ilə Azərbaycanı layiqincə təmsil edəcək. Kamilə kimi istedadlı gənclər xalqımızın başını uca etdikcə, xalqımız da onlara sonsuz sevgisini bildirəcək, onların adını hər kəs böyük fəxarətlə çəkəcəkdir.

Uğurlar olsun, Kamilə! Sən birinciliyə layiqsən!

Nilufər Xaliqqızı

Təzadlar.- 2011.- 19-21 may.- S.13.