"Azərbaycana diqqət və maraq artmaqdadır"

Ayhan Dəmirçi: "Əvvəlki illərlə müqayisədə indi Azərbaycan Belçikada daha çox tanınır"

Azərbaycan-Belçika Dostluq Cəmiyyətinin başqanı Ayhan Dəmirçinin "Təzadlar" qəzetinə müsahibəsi.

- Ayhan bəy, bu gün Belçikada Azərbaycan haqqında fikirlər hansı səviyyədədir?

- Əvvəlki illərlə müqayisədə indi Azərbaycan daha çox tanınır. Biz bunu Avropa parlamentində təşkil etdiyimiz tədbirlər zamanı da hiss edirik. Halbuki əvvəllər Azərbaycanla bağlı söhbət düşəndə maraq və diqqət yox idi. Sonradan Azərbaycan dövlətinin və Belçikadakı səfirliyimizin, təşkilatımızın aktiv fəaliyyəti və sistemli çalışmalar nəticəsində ölkəmiz haqqında müsbət fikirlərin yaranmasına səbəb oldu. Bu gün Azərbaycana diqqət və maraq artmaqdadır. Bu inkişafa doğru istiqamət alıb.

- Azərbaycanın daha geniş tanıdılması ilə bağlı bu ölkənin öz dilində qəzet çap edilməsi və ya saytın yaradılması mümkündürmü?

- Əlbəttə, Azərbaycanın daha yaxşı tanıdılmasında xarici dildə qəzet və saytın yaradılması önəmli məsələdir və yaxşı nəticə verər. Fəqət, öncədən bildirdiyim kimi, bu cür yayın orqanlarını həyata keçirmək bəzən asan olmur. Təşkilat olaraq, bu məsələləri həll etmək üçün işlərimizi davam etdiririk. Bu arada işlərimizin çoxluğu və fəaliyyət proqramımızın geniş olması bu məsələləri həll etməyi geçikdirir. May ayının 25-də Avropa Parlamentində keçirəcəyimiz tədbirdən sonra bu işi həll edəcəyimizə inanıram.

- Diasporumuz erməni yalanlarının ifşası ilə bağlı hansı addımları atır və xüsusilə, Qarabağ münaqişəsi haqqında fikirlər hansı istiqamətdədir?

- Diasporumuz erməni yalanlarını ortaya çıxarmaq və həqiqətləri Avropada tanıtmaq istiqamətində var gücü ilə çalışır və buna örnək olaraq, bu ilin əvvəlində Avropa Birliyində və digər yerlərdə bir neçə önəmli tədbirlər keçirildi. Human Rights Without Frontiers mərkəzi adına Avropa Parlamentində Villy Fautrenin ev sahibliyi ilə keçirilən Xocalı faciəsi və Qarabağ problemi nəticəsində 1 milyon məcburi köçkünün vəziyyətinin yaxşılaşdırılması istiqamətində tədbir keçirildi. Ermənilər tədbirin baş tutmaması üçün əllərindən gələni edirdilər. Buna baxmayaraq, tədbir baş tutdu. Tədbir vasitəsilə Qarabağ və Xocalıda yaşanan faciələr haqqında məlumatlar avropalılara çatdırıldı. Ayrıca 17 mart 2011-ci il tarixində Avropa Parlamentində Azərbaycan-Belçika Dostluq Cəmiyyətinin təşkilatçılığı və Avropa Parlamentinin üzvü İsmayıl Ertuğun ev sahibliyi ilə Avropa İttifaqı və Azərbaycan münasibətlərində mədəniyyətlərarası dialoq adlı seminar baş tutdu. Sonra isə 1918-ci il 31 mart tarixində azərbaycanlılara qarşı həyata keçirilən soyqırım siyasəti və 2011-ci il martın 8-də erməni snayperi tərəfindən öldürülən 9 yaşlı Fariz Bədəlovla bağlı Avropa parlamenti (Scuman meydanında) önündə etiraz aksiyası keçirildi. Bununla yanaşı, Xocalı faciəsini əsk etdirən məlumatlar Avropa və Belçika parlamentinin 550-ə yaxın üzvünün emal ünvanlarına göndilirdi.

- Ümumilikdə, Belçikada nə qədər soydaşımız yaşayır və onlar diaspor fəaliyyətində aktivdirlərmi?

- Beçikada soydaşlarımızın sayı o qədər də çox deyil. Təxminən 250-300 nəfərə qədərdir. Türkiyəli azərbaycanlılarla bir yerdə 4 minə çatar. Soydaşlarımızı milli, mədəni və önəmli mövzularda keçirilən tədbirlərə dəvət edirik və hamısı da olmasa fəal insanlar iştirak edib, tədbirlərimizə dəstək olurlar. Bildirmək istəyirəm ki, birlik və bərabərliyimizə ən çox ehtiyac duyduğumuz bir zamanda bir-birimizin işini ləngitməyə çalışır, birliyimizə mane olub şəxsi məsələləri qaldırırıq. Bu gün bizə milli birlik lazımdır. Onsuz da bizi istəməyən qüvvələr çoxdur. Daxilimizdə olan problemləri özümüz həll etməliyik. Azərbaycan gənc dövlətdir. Əsas odur ki, problemlərimizi özümüz həll edib və ümümmilli işlərimizin həyata keçirilməsi yolunda birgə addım atmalıyıq.

- Erməni diasporu tərəfindən sizə maneələr olurmu və onların təhdidləri ilə üzləşirsinizmi?

- Təbii ki, bəzi tədbirlərimiz gizli olsa da mane olmağa çalışırlar. Azərbaycanın Belçikadakı səfirliyi və dərnəyimizin Avropa Parlamentində təşkil etdiyi tədbirə mane olmağa çalışdıqlarını bilirdik. Buna baxmayaraq, biz fəaliyyətimizi davam etdiririk. Ayrıca olaraq, ciddi bir təhdidlə qaşılaşmamışıq. Əgər belə hal baş versə, təhdidlərin qarşısını ala biləcək səviyyədə imkanlarımız var.

- Mayın 25-də Avropa Parlamentində tədbiriniz gözlənilir. Tədbir nə ilə bağlı keçirilir və kimlərin iştirak edəcəyi gözlənilir?

- 25 mayda təşkil edəcəyimiz tədbirin əsas mövzusu Avropa Birliyi-Azərbaycan əlaqələrini əhatə edəcək. Xüsusilə, Avropa Birliyi və Azərbaycanla əməkdaşlıq və geopolitik gerçəkliklər mövzusuna önəm veriləcək. Konfransa Avropa Birliyinin parlamentarı Qraham Vatsonun ev sahibliyi ilə Azərbaycan-Belçika Dostluq Cəmiyyəti və Azərbaycanlıların və Digər Türkdilli Xalqların Əməkdaşlıq Mərkəzi tərəfindən birgə təşkil ediləcək.

Başda Avropa Parlamentinin üzvü İnese Vaidere olmaqla 50-ə yaxın Avropa Parlamentinin məsulları, mətbuat, ictimai təşkilat rəhbərlərinin iştirakı gözlənilir. Azərbaycandan gələn nümayəndə heyətinə isə millət vəkili Azay Quliyev, Prezident Administrasiyasının (PA) İctimai-siyasi məsələlər şöbəsinin diasporla iş sektorunun müdiri Qafar Əliyev, Azərbaycanlıların və Digər Türkdilli Xalqların Əməkdaşlıq Mərkəzinin (ATXƏM) sədri İlham İsmayılov, "Politika" jurnalının baş redaktoru İlqar Bayraməliyev, ATXEM əməkdaşı Telman Əlirzayev qatılacaqlar.

Elnur Eltürk

Təzadlar.- 2011.- 24-26 may.- S.11.