Pərişan

Bəylərin obası bayquşa qaldı,

Kövşəni pərişan, yalı pərişan.

Dağlar da dağıyla baş başa qaldı,

Səbası pərişan, yeli pərişan.

Ellər o torpağı əkməz oldular,

Elatlar bu dağı çəkməz oldular.

Xınalı kəkliklər səkməz oldular,

Sonası nazlanmaz, gölü pərişan.

Yaman dönük çıxdıq biz o yerlərə,

Qaldı, həsrət qaldı göz o yerlərə.

Elə yaslı gəldi yaz o yerlərə,

Çiçəyi pərişan, gülü pərişan.

Nədir bu ayrılıq, bu yazı, dağlar,

Əksilməz başının poyrazı, dağlar.

Yaz ağzı köçlərə tamarzı dağlar,

Çəhlimi pərişan, yolu pərişan.

Eşiklər cəhrəsiz, hanasız qalıb,

Nənələr birçəyi xınasız qalıb.

Anam da qürbətdə anasız qalıb,

Ovqatı pərişan, halı pərişan.

Yıxdı Şərahili bu dərd, bu kədər,

Nə gedib gələn var, nə xəbər-ətər.

Dünyadan gileyi dünyalar qədər,

Obası pərişan, eli pərişan.

Dünyada

Kor bəxt ilə çəksən cəngi,

Kürək yerə vermisən ki?!

Haramlıq ömrün xərçəngi,

Çarəsi yoxdu dünyada.

Könül, qəlbi kordan qorun,

Qəlbi görür gözü korun.

Qanan varmı, tanıt görüm,

Yarası yoxdu dünyada?!

Varım yoxdur sözdən özgə,

Doğmam özgə, özgəm özgə.

Cahangirin bezdən özgə,

Xarası yoxdu dünyada.

Sağım yoxsul, solum yetim,

Əlacım yox, ölüm itim

Mən umduğum səadətin,

Yarısı yoxdu dünyada

Qulu ol, qulu duyanın,

Ağası düyün düyənin.

Bu dünyamla bu dünyanın,

Arası yoxdu, dünyada.

Şərahil, dünya arsızın,

Qanan başlara qan sızır.

Dünyada pul parasızın,

Parası yoxdu dünyada.

Qağa

Dört yan iyrənci hərrac,

Düzlər düzdə yalavac,

Salam, Mənsuri-Həllac,

Salam, Nəsimi qağa...

Böhtan duz - yaram üstə,

Üzüldüm bir kam üstə.

Köklənib haram üstə,

Dünyanın simi, qağa.

Cümlə yaranmış yalan,

And, dua, qarğış yalan,

Yağan bu yağış yalan,

Əsən nəsimi, qağa.

Nə hellənir bu təkər

Qan tökəni qan çəkər.

Çəksə Yaradan çəkər,

Mənim yasımı, qağa

Qara gəldi bu yazım,

Ha göynüyüm, ha yazım.

Bayquşların avazı,

Boğdu səsimi, qağa.

Dayan, a dünya

Bir zərrə sevinci umuram, olmur,

Xırmanım oddanır, yağmurum olmur

"Sacım tava gəlir, xamırım olmur",

Dayan, danışarıq, dayan a dünya

Bağlanıb barxanam, boxçam bükülü,

Dəymişim budaqda - kalım tökülür

Qəlbimi kör qoydu arzumun külü,

Dayan, danışarıq, dayan a dünya

Sitəmlər çəkdirdin elimə bunca,

Başımnan həsrətlər ələmə, bunca.

Yetər züy tutduğun naləmə bunca,

Dayan, danışarıq, dayan a dünya.

Calasam zövqünü arşına gəlməz,

Qandım ya qanmadım - işinə gəlməz.

Başıma gələnlər başına gəlməz,

Dayan, danışarıq, dayan a dünya

Şərahil Laçın

Təzadlar.- 2011.- 24-26 may.- S.14.