Mən hansı bir insana bənzədim ki...

(Şəxsiyyətinə və qələminə boyük hörmət etdiyim görkəmli şairimiz Rəsul Rzanın bir vaxtlar "baba" adlandırdığımız proletar xalqının rəhbəri V.İ.Leninə həsr etdiyi poemaya indiki dövr üçün səslənən nəzirə)

Mən hansı bir insana bənzədim ki, Lenini,

Müsəlman torpağına göz tikib yatmış olsun.

Mən hansı riyakara bənzədim ki, Lenini,

Qovub çatıb milləti cənginə çəkmiş olsun.

Mən hansı bir həkimə bənzədim ki, Lenini,

Pul almadan xəstəni doğrayıb kəsmiş olsun.

Mən hansı bir dəlləyə bənzədim ki, Lenini,

Kor ülgücü sabunsuz saqqala çəkmiş olsun.

Mən hansı pinəçiyə bənzədim ki, Lenini,

Bizi saplayan zaman dizinə batmış olsun.

Mən hansı xanəndəyə bənzədim ki, Lenini,

Zəngulə vuran zaman xoruz buraxmış olsun.

Mən hansı bir suçuya bənzədim ki, Lenini,

Arxın suyu kimsəsiz bostanı basmış olsun.

Mən hansı bir müdirə bənzədim ki, Lenini,

Katibənin sözüylə oturub durmuş olsun.

Mən hansı bir şeytana bənzədim ki, Lenini,

İnsanların qəlbini aldadıb yırtmış olsun.

Mən hansı bir məhbusa bənzədim ki, Lenini,

Günahsız şərlənərək cəzasın çəkmiş olsun.

Mən hansı kisəçiyə bənzədim ki, Lenini,

Kir çıxmayan bədəndən kiri çıxartmış olsun.

Mən hansı bir xədimə bənzədim ki, Lenini,

Nadejdadan bir övlad qoyub, itməmiş olsun.

Mən hansı bir müəllimə bənzədim ki, Lenini,

Şagirdləri kor qoyub, özünü dartmış olsun.

Mən hansı bir şairə bənzədim ki, Lenini,

Qafiyəsiz şeirdən ürək bulanmış olsun.

Mən hansı yazıçıya bənzədim ki, Lenini,

Cild - cild yazdığı əsər arxivdə yatmış olsun.

Mən hansı bir əsgərə bənzədim ki, Lenini,

Süngü ilə dostunu qəlbini dərmiş olsun.

Mən hansı bir hakimə bənzədim ki, Lenini,

Pul almadan məhbusa hökm oxunmuş olsun.

Mən hansı komandirə bənzədim ki, Lenini,

Düşmənə işləyərək əsgəri satmış olsun.

Mən hansı bir polisə bənzədim ki, Lenini,

Sifarişlə insanı qətlə yetirmiş olsun.

Mən hansı bir nazirə bənzədim ki, Lenini,

Saysız villalarında bayquş ulamış olsun.

Mən hansı bir mollaya bənzədim ki, Lenini,

Fatihə oxumadan ölü basdırmış olsun.

Mən hansı bir cəllada bənzədim ki, Lenini,

Günahsız insanları diri asdırmış olsun.

Mən hansı simasıza bənzədim ki, Lenini,

Dünənki yalan sözdən bu gün utanmış olsun.

Mən hansı bir Corc Buşa bənzədim ki, Lenini,

Müsəlman torpağına mərmilər atmış olsun.

Mən hansı prokurora bənzədim ki, Lenini,

Rüşvət ilə məhkumu dardan qurtarmış olsun.

(Ardı var)

Rauf İlyasoğlu

Təzadlar.- 2011.- 15 noyabr.- S.7.