Dərdə bax, ay Allah

Qəlbimdə sən varsan

Evimdə sən yox.

Evində sən varsan

Yanında mən yox.

Dərdə bax, ay Allah

Oxşayırıq, yox?!

Sən getdin, mən yoxam,

Payım-uzaqdan baxam.

Qəlbindən qəlbimə

Sancılan tək oxam,

Dərdə bax, ay Allah

Sənmi atdın, yox?!

Səninçün doğuldum,

Qəmindən boğuldum,

Səni sevdiyim gün

Var ikən yox oldum.

Dərdə bax, ay Allah

Yaşadımmı, yox?!

Dərd alıb elimi

Bükmüsən belimi,

Yıxılıb durarkən

Uzatdim əlimi.

Dərdə bax, ay Allah

Əl verdinmi, yox?!

Sev dedin sevirəm,

Gül dedin, gülürəm,

Bu eşqi bitirmə,

Bitirmə, ölürəm.

Dərdə bax, ay Allah

Bitirimmi, yox?!

Bu eşqi yazmışam,

Daşlara qazmışam,

Gözləyə-gözləyə

Canımdan bezmişəm.

Dərdə bax, ay Allah

Ölmüşəmmi, yox?!

Günüm, saatımsan,

Ağrıyan canımsan,

Uzaqda olsan da

Damarda qanımsan,

Dərdə bax, ay Allah

Yarımsanmı, yox?!

Adilə

Təzadlar.- 2011.- 26 noyabr.- S.15.