Bir parça çörək
Bir çörək parçası atılıb yerə,
Heyrətdən quruyub, donub qalmışam.
Heç kimin önündə sınmazdım belə,
Çörəyin önündə sınıb qalmışam.
Necə tullayıblar, necə atıblar,
Çörək də yerlərə düşərmi görən?
Çörəyin yanından ötən adamlar
Belə saymazyana keçərmi görən?
Çörəyin üzünə həsrət qalanlar,
Bir tikə çörəyə çox mohtaclar var.
Çörəklə sınağa çəkilən şahlar,
Çörəksiz can verən yalavaclar var.
Diz qoyub çörəyi götürürəm mən,
Öpürəm, qoyuram gözüm üstünə.
Elə bil təndiri qalayır nənəm,
Çörəyi düzürəm közün üstünə.
Əlimdə günəşdir bir parça çörək,
Kim atıb, görəsən, günəşi yerə?
Mənim əllərimi yandırdığı tək
Kimin əllərini yandırar belə?
Qurandan irəli ruzidi, gəlib,
Bizə yaradanın haqqı-sayıdır.
Haqsızın həmişə burnundan gəlib,
Çörək insanlara Tanrı payıdı.
Esmira Məhiqızı çağdaş poeziyamızın ən isti, ən kövrək nümunələrini yaradan qələm sahiblərindəndir. Onun şeirləri obrazlılığı, səmimiyyəti və özünəməxsusluğu ilə seçilir. "Bir xışma xəyal"la oxucuları ilə ilk görüşə gələn Esmira xanımın şeir boğçasından bir neçə nümunəni təqdim edirik.
Ay Ağdamın
gecələri...
Ay Şuşanın
gecələri...
İşıq-işıq sıralanıb
Bir su kimi axırsınız.
Bulud-bulud ağrı çəkib
Yağış-yağış yağırsınız.
Mən bu yandan boylanıram,
Siz o yandan baxırsınız,
Ay Ağdamın
gecələri,
Ay Şuşanın
gecələri.
Şirin-şəkər xatirələr
Bir yarımçıq nağıl
imiş.
Vüsalınız necə
uzaq,
Həsrətiniz yaxın imiş.
Pərvanəsi ölü
yurdun,
Zənguləsi yanğı
imiş,
Ay Ağdamın
gecələri,
Ay Şuşanın
gecələri.
Gözəl-gözəl çağlarımın
Nənəsi siz, babası siz.
Perik düşən
yuvaların
O dağılmış
yuvası siz.
Nəğmələrin qəm axını,
Nisgillərin havası
siz,
Ay Ağdamın
gecələri,
Ay Şuşanın
gecələri.
Sizdə mənim
mənə bənzər
Günüm qalıb, ayım qalıb.
Sırsırada qarlı
qışım,
Cırhacırda yayım qalıb.
Təpələrdə dəli
qıyım,
Dərələrdə hayım
qalıb,
Ay Ağdamın
gecələri,
Ay Şuşanın
gecələri.
Xatirəmdə bir yüyrük var,
İçində mən yellənirəm.
Ruhum hara qonaq olur,
Ağrısına millənirəm.
Qısılıb bir gül koluna
Həzin-həzin dillənirəm,
Ay Ağdamın
gecələri,
Ay Şuşanın
gecələri.
Bulaqların qan ağlayan
Suyu elə göz yaşımdı.
Başı kəsik
kötüklər də
Mənim qırıq başdaşımdı.
Sizdə salıb
itirdiyim
Elə sizli yaddaşımdı,
Ay Ağdamın
gecələri,
Ay Şuşanın
gecələri.
Nənəm, babam, atam ölüb,
Edamlarda dardayam mən.
Dönərgələr elə dönüb,
Heç bilmirəm hardayam mən.
Çığırmaqdan səsim
batıb,
Burdayam mən,
burdayam mən,
Ay Ağdamın
gecələri,
Ay Şuşanın
gecələri.
Gecələrin qaranlığı
Qaramatdı qorxu kimi.
Biri varda-biri
yoxda
İtib gedir duyğu kimi.
Gözlərimdən qaçırsınız,
Qaçırsınız yuxu kimi,
Ay Ağdamın
gecələri,
Ay Şuşanın
gecələri...
Esmira Məhiqızı
Təzadlar.- 2011.- 11 yanvar.- S.15.