Mətbuatımızın vəziyyəti
Süleyman Osmanoğlunu xəstə saldı…
Süleyman Osmanoğlu: "Elə dostlarım var ki, hələ də intizarla zənglərini gözləyirəm"
Eşitdim
ki, Süleyman Osmanoğlu xəstələnib. Ciddi yumoru ilə
tanınan, "Proqnoz" qəzetinin baş redaktoru Süleyman
Osmanoğlunu deyirəm. Xeyli vaxtdır ki, "Azərbaycan"
nəşriyyatının koridorlarında onunla
rastlaşmırdım. Sən demə, səbəb
varmış. Hərçəndi, səbəb də xoşagələn
deyilmiş. Öyrəndim
ki, Süleyman bəy infarkt keçirib. Yaradıcılıq fəaliyyətinə
ara verən həmkarım ev şəraitində müalicə
olunur. Ona baş çəkmək üçün evinə
yollandım. Allaha şükürlər olsun ki, qapının
ağzında məni özü qarşıladı. Əyləşməyə
yer göstərdi. Oturmaq üçün ona hara daha rahat
olmasını soruşdum. Stolu göstərdi. Evdə
özündən başqa ailə üzvlərindən
yalnız oğlu və qardaşı vardı. "Soyuqdan gəlmisən,
isti-isti bir stəkan çay iç", - deyə oğlunun
süfrəyə gətirdiyi çaya işarə etdi. Səhhəti
ilə maraqlandım. İndi bir az yaxşı olduğunu
bildirdi. Kefinin bir az babat
olduğunu hiss edib onu söhbətə çəkdim.
Açığı deyim ki, onun baməzəliyi haqqında
"Azərbaycan" nəşriyyatında həmkarlarımdan
çox eşitmişdim. Eşitmək bir ayrı, görmək
bir ayrı...
- Süleyman bəy, indi
kefiniz necədir? Qəfil xəstə düşməyinizə
səbəb nə oldu?
- Belə baxanda, mənim
heç kimdən gileyim yoxdur. Sadəcə olaraq, prinsiplər
dəyişəndə, dəyərlər itəndə adama
çox acılar gətirir. Bəlkə də mənim xəstələnməyimin
əsas səbəblərindən biri mətbuatın
bugünkü duruma düşməsidir. Təbii ki,
yaşadığımız mühitin özünün də
təsiri az deyil. Mənim xəstəliyimə və bundan da
pis olan xərçəng xəstəliyinə tərif verərdim
ki, bunlar təbiətdən gələn xəstəliklər
deyil, cəmiyyətdən gələn xəstəliklərdir.
Təəssüflər ki, cəmiyyətdən gələn xəstəliklərin
sağalması çox çətin olur... Mənim həmkar
dostlarım var ki, hamısı dəyərli insanlardır. Bəziləri
bu gün həyatda deyillər, hansı ki, onlar Azərbaycanın
bir nömrəli yazarları idilər. İndinin özündə
daha istedadlı, daha güclü yazarlar var ki, bu gün onlar kənarda
qalıblar. Bəziləri baş verənlərə zəiflik
göstərərək, içkiyə aludə olurlar. Bu zəhrimardan
neçələri gözümüzün qabağında
dünyalarını dəyişdi. Elçin Səlcuq,
gözəl şair-publisist Akif Səməd... və
başqaları. Yaxud, vaxtilə Azərbaycan mətbuatının
tanınmış simaları olan bir çox qələm
sahibləri var ki, onlar bu gün nəşriyyatda içkiyə
meylli, daha doğrusu, əyyaş kimi tanınırlar. Çünki
dəyəri vaxtında verilməyəndə insan
ucuzlaşır... Bayaq qeyd etdiyim kimi, heç kimdən
giley-güzarım yoxdur. 2005-ci ildə, Milli Mətbuatımızın
130 illik yubileyində dövlət tərəfindən "Tərəqqi"
medalı ilə təltif olunmuşam. Təşəbbüs
göstərənlərə də, fərmanı imzalayan
dövlət başçısına da təşəkkür
edirəm ki, müxalif yazar olsam da, zəhmətim qiymətləndirilib.
- Süleyman bəy, bu
ağrılı günlərinizdə sizi kimlər tək
qoymadı?
- Təbii ki, mənim həm
mətbuatda, həm də mətbuatdan kənar olan dostlarım
sağ olsunlar ki, məni tək buraxmadılar. Onlar məni
vaxtaşırı arıyıb-axtarıb səhhətimlə
maraqlanırlar. Maddi yardım göstərənlər də
az olmadı. Hər birinə minnətdaram. Adlarını
sadalamayacağam, qorxuram ki, kimlərisə yaddan
çıxaram. Ancaq elə dostlarım da var ki, hələ də
intizarla zənglərini gözləyirəm. Qeyd edim ki, xəstəlik
ərəfəsində bir məqam mənim əbədi
yaddaşıma həkk olundu. Xəstələndiyim gündən
bir gün sonra mən iki, illərin yaxını olduğum həmkarımla
rayonların birində keçirilən mərasimdə birgə
iştirak etməliydik. Onlardan biri televiziyada
çalışan dostumuzdur, digəri isə önəmli
jurnalist təşkilatlarından birinin rəhbəridir. Bu
şəxslərlə bu günə kimi mətbuatda da birgə
addımlamışıq. Bu günə qədər onlar mənimlə
maraqlanmasalar da, əvvəllər xoş günlərimizi birgə
paylaşmışıq.
- Telefon nömrələriniz
dəyişməyib ki?..
- Xeyr, mənim telefonlarım
nə bağlanmır, nə də nömrələri dəyişməyib.
Mənimlə əlaqə saxlamamağa əllərində
tutarlı bəhanələri də yoxdur. Necə deyərlər,
dostlar sağ olsun. Gəlişinizə görə sizə və
başda Asif Mərzili olmaqla kollektivinizə təşəkkür
edirəm. Onu da qeyd edim ki, bu neçə ayda hətta öz rəhbəri
olduğum qəzetdə belə mənim xəstə
olmağım barədə heç bir informasiya verilməyib.
- Süleyman bəy, uzun illər
mətbuatda çalışan, müxtəlif dövrlərdə
bir neçə qəzetə və bu gün "Proqnoz" qəzetinə
rəhbərlik edən şəxs kimi geridə qalan illər
üçün hesabat verəcək olsanız, nələri
qeyd edərdiniz?
- Bilənlər bilir, bilməyənlər
üçün aydın olsun deyə bildirirəm ki, 1952-ci il
iyul ayının 10-da Qazax rayonunun Kəmərli kəndində
anadan olmuşam. Mənim mətbuata gəlişim heç də
təsadüfi olmayıb. Hələ orta məktəbdə
oxuyanda "Azərbaycan gəncləri", "Bakı"
qəzetldərində yazılarım dərc olunurdu. Ali təhsil
aldıqdan sonra üç il Tovuz rayonunda müəllim
işlədim. Təyinat müddətim bitəndən sonra Azərbaycan
Dövlət Radiosunda işləməyə başladım.
Onu da qeyd edim ki, bu günədək heç bir siyasi
partiyanın üzvü olmamışam. Yalnız sovet
dövründə Kommunist Partiyasına namizədliyim irəli
sürülüb. O zaman Respublika Şərq
Kitabxanasının elmi metodik mərkəzində böyük
redaktor işləyirdim. Həmin mərkəzdə metodik vəsaitlər
hazırlanırdı. Prezident Administrasiyasının rəhbəri
Ramiz Mehdiyev vaxtilə orada keçirilən iclaslarda daim
iştirak edirdi. O, iclasların birində Nəsimi rayon partiya
komitəsinin ikinci katibinə tapşırdı ki, perspektivli
gənclərdən biri kimi mənim partiyaya keçmək
üçün namizədliyimi irəli sürsün. O
zamanlar rəhmətlik Afiyəddin Cəlilov Nəsimi rayon
partiya komitəsinin birinci katibi idi. Partiyaya namizədliyimin təsdiqi
günü məndən əvvəl yarım saat ərzində
xeyli namizdi sorğu-sual etdilər. Ancaq şəxsən Afiyəddin
Cəlilov məni ən azı 40-45 dəqiqə sorğu-suala
çəkdi. Bir neçə gündən sonra onunla koridorda
rastlaşanda gülə-gülə dedi ki, sənin
danışığın xoşuma gəldiyi
üçün özüm qəsdən səni çox
danışdırdım. Yəni demək istəyirəm ki, o
dövrdə partiyaya yalnız namizəd olmuşam. Camaat
partiya biletindən imtina edəndə, mən də namizədlik
biletini atdım və Milli Hərəkata qoşuldum.
"Fövqəladə vəziyyət" və
"Yurd" qəzetlərinin işıq üzü görməsinə
kömək etdim. "Azadlıq" qəzeti nəşrə
başlayanda onun əməkdaşlarından biri oldum. Qazax
rayonunun Bağanıs Ayrım kəndi ermənilər tərəfindən
ikinci dəfə yandırılanda qəzetimizin əməkdaşı
Əhməd Orucla birgə oradan ilk olaraq geniş reportaj
hazırladıq. O zaman hətta ölümlə üz-üzə
də gəldik. Onda "Azadlıq"ın heç bir vəsaiti
yox idi. Demək olardı ki, təmənnasız işləyirdik.
Təbii ki, özüm eyni zamanda dövlət işində də
çalışırdım. Bir müddətdən sonra
"Azadlıq" qəzetindən uzaqlaşdım. Sonradan,
1993-cü ilin may ayında yenidən bu qəzetə
qayıtdım. Tam məsuliyyət və fəxarətlə
deyirəm ki, "Azadlıq" qəzeti başda olmaqla Azərbaycan
demokratik milli mətbuatının dirçəlməsində,
ayaqda durmasında mənim fəaliyyətimi kim danarsa,
özünü danmış olar... Sonra dörd il yarım
"Müxalifət" qəzetinin baş redaktoru oldum. Daha
sonra "Ekspress" qəzetində baş redaktorun müavini
vəzifəsində çalışdım. Həmin
dövrdə "Ekspress"in baş redaktoru Qənimət
Zahid idi. Mən o qəzetdə işləyə-işləyə
"Proqnoz" qəzetini təsis etdim. Ancaq fəaliyyəti
üçün maddi vəsait yox idi. Ona görə də bir
çox dostlarımın təklifi ilə
"Günaydın" qəzetində Şahvələd
çobanoğlu ilə işləməli oldum. Demək olar
ki, həmişə sevdiyim insanlarla işləmişəm. Bu
gün də həmin insanlarla münasibətim davam edir. Bu
gün məni arayıb-axtaran da elə o zamanın
dostlarıdır...
Bilirsiz, mənim həyatda
nifrət etdiyim iki şey var. Biri yalan danışmaq, digəri
yalmanmaq. Həmişə çalışmışam ki,
bunlardan uzaq olum. Ancaq bütün yalanlar nifrətedici deyil. Mənim
də, sizin də, başqalarının da sevdiyi,
bağrına basdığı yalanlar var. Kiməsə zərər
verməyən, xeyirxah məqsədli yalanlardan başqa faciə
yaradan yalanlar da var. Bəzən görürsən ki, bir məddah
yazar, yaxud televiziya aparıcısı ona aid olmayan sahədən,
məsələn, ölkəmizin inkişafından
ağızdolusu danışır. Yəni bu inkişaf təbiidir.
Bunu danmaq mümkün deyil, Azərbaycan böyük
inkişaf yolu keçir. Ancaq məsələ
burasındadır ki, bu boyda inkişafın içərisində
insan yaşamının inkişafı çox geridə
qalıb. Azərbaycan müstəqillik əldə etdikdən
bu yana ilkin olaraq bütün sahələrdən yana, mətbuat
daha böyük sıçrayış eləmişdi. Bəlkə
də bu inqilabi bir sıçrayış idi. Ancaq sonradan Azərbaycan
mətbuatını ya bilərəkdən, ya da bilməyərəkdən
çox pis günə saldılar. Cəmiyyətin gözundə
mətbuatı gərəksiz etdilər. İş o yerə gəlib
çatdı ki, haqlı tənqid olunan məmur belə,
heç nədən çəkinmədən "əşi,
yazıblar, cəhənnəmə yazsınlar, heç vecimə
də deyil..." - deyə dilə gəldi. Halbuki təxminən
1998-99-cu illərə qədər mətbuata böyük
önəm verilirdi. "Azərbaycan" nəşriyyatına
daxil olan istənilən şəxs geyiminə,
davranışına, danışığına diqqət edərdi
ki, nöqsana, səhvə yol verməsin. Nəşriyyat
hamı tərəfindən bir mədəniyyət
ocağı kimi qəbul edilirdi. Ancaq bu gün "Azərbaycan"
nəşriyyatı çox pis gündədir. Mən əvvəllər
"Azərbaycan" nəşriyyatının binasına
yaxınlaşanda qürur hissi duymuşam. İndi isə əksinə,
nəşriyyatda məskunlaşan təsadüfi adamlara
görə xəcalət çəkirəm. Küçədən
keçən, işsiz-gücsüz, avara qalan qəzet
açır. Əzizim, mətbuat pul qazanmaq yeri deyil axı. Mətbuat
əqidə və söz adamlarının, millətsevərlərin
yeridir. Açığı deyim ki, mən ömrüm boyu
millətimi çox sevmişəm. Bu yaxınlarda
sayılıb-seçilən həmkarlarımdan biri mənə
dedi ki, sən hakimiyyətə işləmədin... Xeyli
güldüm, dedim ki, başa düşmədim, hakimiyyətə
işləmək nədir?.. Sonra öz-özümə fikirləşdim
ki, içimdəki millət sevgisi, dövlətçilik
sevgisi, müstəqillik sevgisi məgər hakimiyyətdən
ayrı şeylərdir, hakimiyyət bu dövlətin, dövlətçiliyin,
millətin deyil? Bəs millət olmasa, hakimiyyət olarmı?
Bəs onda mən bu ömrümü kimə sərf etmişəm,
kim üçün işləmişəm,
yaşamışam, yanmışam? Başa düşmürəm,
onda belə çıxır ki, bəzi dostlarımın
analizi məndən daha dəqiqdir. Deməli, millət,
dövlət, dövlətçilik, hakimiyyət
ayrı-ayrı şeylərdir... Amma yenə də mən
yaşadığım bu ömürdən təəssüflənmirəm...
Onu da qeyd edim ki, Azərbaycan
mətbuatında daha çox təqiblərə məruz qalan
şəxslərdən biri də mənəm. Ancaq bununla
heç vaxt özümü reklam eləməmişəm. Gecəyarısı
gözümə qaz vurulub, qarşımı silahla kəsib,
evimə basqın ediblər.
Ancaq bu gün bəziləri belə şeylərdən
reklam kimi istifadə edir, aləmə car çəkirlər.
Vaxtilə 20 aparıcı qəzetin baş redaktorunun məşhur
aclıq aksiyasının iştirakçılarından biri də
mən idim. Aclıq aksiyası zamanı mətbuatımızın
banisi Həsən bəy Zərdabinin məzarını ziyarət
edərkən orada mənim maraqlı bir
çıxışım oldu. O zaman nitqimi
yumorqarışıq bir müraciətlə bitirdim. Sonralar həmin
çıxışımı həmkarlarım tez-tez
zarafatyana yada salırdılar.
çıxışımın məzmunu belə idi ki, mətbuata
yönələn basqıları sadalayandan sonra dedim, ay baba,
bu eşitdiklərin hələ nədir ki, bizim
başımıza nələr gətirilib, heç
yarısını demədim, qalanı da, inşallah, sonra deyərəm...
Mənim fəaliyyətimdə
prinsiplərdən biri mübarizədə ləyaqət məsələsidir.
Yazılarımda, rəhbərlik etdiyim mətbu orqanlarda həmişə
məsuliyyət hiss etmişəm. Kiminsə ləyaqətinə,
heysiyyətinə toxunmamışam. Əgər kiminsə
işində nöqsanı olubsa, onu yazmışam. Müsavat
başqanı İsa Qəmbərin təsisçisi olduğu
"Muxalifət" qəzetinə rəhbərlik edəndə
də müstəqil olmuşam, kiminsə göstərişi
ilə işləməmişəm. O zaman belə bir
qadağa vardı ki, müxalifət qəzeti hakimiyyət
nümayəndələrindən müsahibə dərc edə
bilməzdi. Ancaq mən bu qadağanı qəbul etmirdim.
Hansısa məsələ barədə həm müxalifət,
həm də iqtidar nümayəndəsinin münasibətini dərc
edirdim. Müxtəlif mövqeləri üz-üzə qoyurdum
ki, haqlı olanı ictimaiyyət özü məyyənləşdirsin.
Yeri gəlmişkən bir məqamı
qeyd etmək istəyirəm. "Müxalifət" qəzetində
işləyəndə bu gün hakimiyyətdə çox
öndə olan şəxslə bağlı bir səhifə
yazı dərc etmişdim. Yazının dərc olunduğu səhifənin
rublikası "Günəbaxan" adlanırdı. Həmin
səhifənin bir hissəsi adını çəkmək
istəmədiyim şəxsin mərhum prezident Heydər Əliyevin
Moskvada "vurulduğu" vaxt onun əleyhinə
"Kommunist" qəzetində dərc etdirdiyi
yazısını, qalan hissəsinə isə H.Əliyevin
ikinci dəfə hakimiyyətə gələndən sonra onun
haqqında yazdığı kitabdan bir parçanı
qoymuşdum. O zaman mənə çatdırdılar ki, H.Əliyev
həmin səhifəni şəxsən özü oxuyub və
dəhşətə gəlib. Bu gün hakimiyyətdə olan
həmin adamı yanına çağırıb deyib ki,
görürsən, adamın iç üzünü belə
açarlar.
"Müxalifət"in
son səhifəsi satira və yumora ayrılmışdı.
Orada dərc olunan yazılar oxucular tərəfindən maraqla
qarşılanırdı. Hətta o dövrdə Heydər Əliyevin
tapşırığı ilə AzTV-də satira və yumor səhifəmizdə
yer alan yazılarla bağlı 20 dəqiqəlik veriliş
göstərilmişdi. Yəni demək istəyirəm ki,
vaxtilə mətbuata yanaşmalar, insanların bir-birinə
münasibəti indikindən fərqli idi.
- Təəssüf ki, bu
gün müstəqil mətbuat tez-tez müxtəlif
ittihamların, iftiraların ünvanına çevrilir. Məsələn,
rəngli siyahılar, "reket" damğası və s.
- Bu məsələni bir dəfə
geniş formada qabartmışam. Hətta Mətbuat
Şurasının qurultayında da sözümü demişəm.
ümumiyyətlə, mətbuatın "reket"
adlandırılması onların əməllərini ehtiva
etmir. Ona görə ki, "reket" sözünün
özündə müəyyən bir güc dayanıb. Yəni
"reket" deyəndə daha güclü, eyni zamanda, qətiyyətli
şeylər nəzərdə tutulur. Ancaq onların
siyahısına daxil olan adamların əksəriyyətinin elə
bir gücü yoxdur. "Reket" zor gücünə öz
qəzetlərini abunə yazdıranlardır, yaxud hansısa vəzifə
sahibinin yanına gedib 30-40 il bundan əvvəl yazılan boyat
mətinlərinə can verən iqtidar qəzetləridir. Mən
bu sözü dəfələrlə demişəm, yenə də
təkrar edirəm. "Təzadlar" Azərbaycan mətbuatı
aləmində özünəməxsus yer tutmuş
samballı qəzetlərdən biridir. Birdən-birə onun və
rəhbərinin təsadüfi adamların, orta təhsili
olmayan, başsağlığına imza qoyan, qəzetinin
birinci səhifəsində prezident İlham Əliyevin şəkli
ilə yanaşı, "Baş redaktordan" rublikası
altında öz şəklini verən redaktorların siyahısına
salmaq, reket adlandırmaq ən azı insafsızlıqdır. Əslində
bu məsələ Mətbuat Şurasının sədri Əflatun
Amaşovun iradəsi daxilində deyil. Orada bəzi qüvvələr
daha güclüdür. Bunu da Amaşov özü çox
gözəl bilir. Nə deyim, Amaşovdur də, o da
dostlarımızdan biridir. Onu da qınamıram. Ancaq mətbuatın
bütün problemləri Mətbuat Şurasının sədri
olaraq Amaşovun əlində cəmlənməlidir. Axı
dövlətin yardımını bölüşdürən
adamın mətbuatın bütün dərdlərini, problemlərini
həll etməyə nə haqqı var? Mətbuatın
problemini yalnız ona rəhbərlik edən qurumlar bilər.
Prezident Yanında KİV-in İnkişafına Dövlət Dəstəyi
Fondunun rəhbəri isə deyir ki, kimi istəyirəm, ona pul
verirəm. çox qəribədir, həm də təəccüblüdür.
İndi də şərt qoyulub ki, mətbuata ayrılan
yardım yalnız gündəlik və hər sayından min
nüsxə satılan qəzetlərə verilir.
Doğrudanmı yardım verilən qəzetlərin hər
sayından mini satılır? Uzun illər mətbuat sahəsində
külüng çalan insanlardan biri kimi tam məsuliyyətlə
deyirəm ki, bu gün 50-55 faizi satılan beş-altı qəzet
ola bilər. Bunun da əksəriyyəti
müxalifyönümlü qəzetlərdir. Fondun yardım
verdiyi 30-dan artıq qəzetin əsla satışı yoxdur.
Formal şəkildə hansısa təşkilatlardan abunə
siyahısı əldə edib fonda təqdim edirlər.
Dövlətin mətbuata
ayırdığı yardımı yüksək qiymətləndirirəm,
bu, çox vacib, xeyirxah bir addımdır. Dövlət
başçısı mətbuata maddi vəsait ayırdı
ki, qəzetlərimiz inkişaf etsin. Yoxsa, demədi ki, bu pulu
quldurcasına darmadağın edib, aranızda
bölüşdürün? Mətbuatın mənəvi
dostlarından hesab etdiyim Prezident Adminstrasiyası ictimai-siyasi
şöbəsinin müdiri Əli Həsənov daim mətbuatın
üzləşdiyi problemlərin həllinə
çalışıb. Ə.Həsənov
çıxışlarında mətbuata ayrılan
yardımın nəinki gündəlik, həftəlik
çıxan qəzetlərə də ayrılmasının
vacibliyini vurğulayıb. Adi "JEK" müdürünün
qəbuluna düşmək olmur, ancaq istənilən vaxt Ə.Həsənovla
görüşmək mümkündür. O ki qaldı onun
şəxsi keyfiyyətlərinə, mən onu gözəl
bir insan kimi dəyərləndirirəm. Mətbuat
Şurasının yeni binasının
açılışında iştirak edən dövlət
başçısı İlham Əliyev yardımla
bağlı fikirlərini açıqlayaraq yenidən bu
mövzuya toxundu. Belə çıxır ki, Mətbuat
Şurasının və Prezident Yanında KİV-in
İnkişafına Dövlət Dəstəyi Fondunun rəhbərliyi
bu yadımı ələkeçirəndən sonra nəinki
maddi vəsaitə ehtiyacı olan qəzetləri, hətta
prezidentin tövsiyələrini belə unutdu. Belə
olmasaydı, cənab prezidentin KİV-ə olan
qayğısına əks hərəkət etməzdilər. Ədalət
naminə etiraf etməliyik ki, böyük vəsait tələb
edən gündəlik qəzetlərin fəaliyyətini
dayandırmamaq üçün öz şəxsi vəsaitlərini
xərcləyən qəzetçilərimiz var ki, hətta
onlar belə, dövlətin mətbuata ayırdığı
yardımından kənarda qaldılar. "Təzadlar" elə
məhz bu qəbildən olan qəzetlərdəndir. Bir
neçə gündəlik və həftəlik qəzetlərin
Azərbaycanın elit təbəqəsi tərəfindən
oxunduğunu belə nəzərə almayan MŞ və
Prezident Yanında KİV-in İnkişafına Dövlət Dəstəyi
Fondu bu qəzetlərin əməyini qiymətləndirməkdən
çəkindi. Yəni doğrudan da bir neçə həqiqətən
qəzetçiliklə məşğul olan barmaqla
sayılası redaksiya heyətini yola vermək, onları
yardımla dəyərləndirmək bu qurumlara bu qədərmi
ağır gəldi? Bu yardımın qeyri-bərabər
bölünməsi yağın üstünə yağ
tökməyə bənzəyir. Məhz külli miqdarda
yardım ayrılan qəzetlərin redaksiyalarına
baxış keçirilsəydi, onların heç də bu
yardıma ehtiyacı olmadığı bəlli olardı.
Heç kimə sirr deyil ki, külli miqdarda yardım
ayrılan qəzetlərin onsuz da sponsorları var. Elə qəzetlər
də var ki, hətta onların normal iş şəraitləri
belə yoxdur, lakin bütün bunlara baxmayaraq, onlardan elələri
var ki, fəaliyyətləri öz hesablarına yenə də
davam edir. Hətta "özündən deyən" qəzetlər
onlarla bir ölçüyə gələ bilmir. Bax, əsl qəzet
və qəzetçilik budur. Bütün bu
sadaladığım problemləri yaşayan qəzet
redaksiyalarından biri də mənim rəhbərlik etdiyim
"Proqnoz"dur. Bu problemlər get-gedə o qədər
böyüdü ki, məni yatağa saldı. Bütün bu
olanları sadəcə olaraq xəstə ürəyimin
ağrısı ilə bir daha xatırlayıram.
- Süleyman bəy, mətbuat
sizi ciddi yumorist bir jurnalist kimi qəbul edir. Bəzən
proqnozlarınızda yanıldığınızı
zarafatyana qeyd edən qəzetlər də olmuşdu.
- Siz yəqin "Ədalət"
qəzetinin günün lətifəsində mənim
bostanıma atdığı daşı nəzərdə
tutursunuz. Təbii ki, o, Aqil Abbasın dostyana bir zarafatı idi.
- Siyasi proqnozlarınızda
necə, yanıldığınız məqamlar olubmu?
- Çox zamanlar siyasi arenada
verdiyim proqnozların əksəriyyəti özünü real
həyatda doğruldub.
- Bütün məqamlarda
sözünü deyən Süleyman bəy nə vaxtsa mətbuatımızın
bu gününü və gələcəyini proqnozlaşdırıbmı?
- Təəssüflə qeyd
edim ki, mətbuat bu gün xaosdadır. Təbii ki, mətbuatın
bu günü və gələcəyini vaxtilə
proqnozlaşdırmışam, amma hələ ki mənim
proqnozuma gəlib çatmayıb. Mənim proqnozuma görə,
vaxt olacaq ki, mətbuatda ancaq peşəkar qəzetçilər
qalacaq...
- Süleyman bəy, belə
getsə, mətbuatla bağlı söhbətimiz uzanacaq və
sizi bu halınızda yoracağıq. Söhbətimizi burada
"Azərbaycan" nəşriyyatında görüşmək
arzusu ilə yekunlaşdırıb sizə Allahdan şəfa
diləyirik.
Elbar ŞİRİNOV
Təzadlar.- 2011.- 13 yanvar.- S.12-13.