Erməni lobbiçiliyinin qurbanları

Ülfət Hacıyev: "Ermənistan-Azərbaycan münaqişəsinin 20 ildə həll olunmaması onları da narahat edir və mən Avropa tərəfinin məsələdə passivliyini vurğulayanda çox səmimi qəbul edirdilər"

Azad Brussel Universitetinin məzunu, diaspor fəalı Ülfət Hacıyevin "Təzadlar"a müsahibəsi

- Ülfət bəy, Avropada Azərbaycan gənclərinin fəallığını necə dəyərləndirirsiniz?

- Elnur bəy, əvvəla, təşəkkür edirəm sizə və qəzetinizə ki, mənim kimi Avropada təhsil alan fəal gənclərin düşüncələrinin cəmiyyətə çatdırılmasında bilavasitə köməkçi olursunuz. Sualınıza gəldikdə isə, söyləyə bilərəm ki, Avropada təhsil alan gənclər nəinki öz üniversitetlərinin akademik həyatında, hətta yaşadığı ölkələrin sosial-ictimai həyatında kifayət qədər fəaldırlar. Biz gənclər bu ölkələrdə təhsil almaqla bərabər, Azərbaycanın tarixini, mədəniyyətini və incəsənətini təbliğ etməyə çalışırıq. Bir sözlə, müasir Azərbaycanın xarici ölkələrdə gənc elçiləri olaraq bizlər Azərbaycan dəyərlərini və həqiqətlərini layiqincə müxtəlif vasitələrlə yaşadığımız cəməyyətlərə çatdırırıq.

- Siz Avropanın tanınmış siyasi-ictimai xadimləri ilə görüşlər keçirmisiniz. Onların ölkəmiz haqda düşüncələri nədən ibarətdir?

- Onlar Azərbaycan haqqında olduqca müsbət fikirdədilər. Azərbaycanın qısa zamanda müxtəlif sahələrdə inkişafı onların diqqətini cəlb etməyə bilməz. Azərbaycana Avropanın strateji tərəfdaşı kimi baxırlar və bundan əlavə, ölkəmiz Avropanın enerji təhlükəsizliyinin təminatçılarından biridir. Mənimlə söhbətlərində qeyd edirdilər ki, müasir Azərbaycanın proqressiv gəncini görmək çox xoşdur və nəzərə alaq ki, gənc insanlar cəmiyyətin aparıcı qüvvələrindən biridir. Azərbaycanın Avropaya inteqrasiyası uzaq gələcəkdə deyil. Sözsüz ki, bütün bu inkişafa baxmayaraq, bəzi dairələrdə mövcud olan problemlər onları narahat edir və bu nöqsanların aradan qaldırılması avrointeqrasi prosesinin sürətləndirilməsinə zəmin kimi görürlər.

- Xüsusilə, Dağlıq Qarabağ münaqişəsi haqda nələr düşünürlər?

- Əvvəla, deyim ki, onlar mən Qarabağdan olduğum üçün Qarabağ haqqında dediyim hər hansı bir həqiqəti daha səmimi qəbul edirdilər. Ermənistan-Azərbaycan münaqişəsinin 20 ildə həll olunmaması onları da narahat edir və mən Avropa tərəfinin məsələdə passivliyini vurğulayanda çox səmimi qəbul edirdilər. Lakin onlar hansısa bir mövqe göstərməkdən çəkinir, olduqca diplomatik cümlələrlə kifayətlənirdilər. Sözsüz ki onların içində Azərbaycanın mövqeyini və vətənimizin ərazi bütövlüyüny dəstəkləyən insanlar da az deyil. Bəziləri məsələnin həllinə təkan vərə bilən amillərdən biri kimi, Azərbaycan və Ermənistan gənclərini daha çox dialoqa getməsini söyləyirdilər.

- Ümumiyyətlə, erməni diasporu ilə mübarizə aparmaq çətin deyil ki?

- Erməni lobbiçiliyinin güclü olması bir mifdir və bu mif erməni uydurmalarından biridir. Beynəlxalq hüququn və ədalətin Ermənistan-Azərbaycan münaqişəsinin ərazi bütövlüyümüzün çərçivəsində həll olunmasını dəstəkləməsi, bizim tərəfimizi güclü tərəf kimi etmiş olur. Buna baxmayaraq, bəzən bəzi ermənipərəst qüvvələrin, erməni lobbiçiliyinin qurbanları ilə üzləşirsən. Lakin yetərincə bilikli və savadlı azərbaycanlı gənclərlə mübarizədə hər hansı bir erməni lobbiçisi və onun qurbanı olan avropalı olduqca acizdir. Ən azından bunu öz təcrübəmə əsaslanaraq əminliklə söyləyirəm.

- Bu gün Avropada xeyli sayda Azərbaycan gənci yaşayır və təhsil alır. Onların bir mərkəz ətrafında birləşib fəaliyyət göstərməsini necə görürsünüz?

- Gənclərin mərkəz şəkilində toplanıb fəaliyyət göstərməsi çox yaxşı təşəbbüs kimi qiymətləndirmək olar və bunun müsbət təsirləri qısa zamanda özünü göstərər. Lakin düşünürəm ki, bugünkü gündə biz gənclərə hansısa bir mərkəzdən göstərişsiz də fəaliyyətimizdə kifayət qədər fəal ola bilərik və oluruq. Hər birimiz müxtəlif güc və potensiallara malikik və yalnız öz faliyyətəmizi daha da gücləndirdiyimiz halda, məsələyə daha da böyük töhfə vermiş olarıq.

- Ekspertlər belə fikirlər bildirirlər ki, Avropada yeni millətçilik dalğası artmaqdadır. Bu haqda nə deyə bilərsiniz?

- Qatı millətçilik heç vaxt müsbət hal kimi qiymətləndirilə bilməz. Bunu hamı başa düşür. Lakin iqtisadi böhranın Avropanı bürüdüyü halda, bu dalğanın artması heç də təəccübedici hal olmasın. Bu millətçi dairələr nəinki Avropa xaricindən gəlmələrə qarşıdırlar, eləcə də öz qonşu ölkələrindən gəlmələrə qarşı çıxırlar. Sözsüz ki, bu, hamıya şamil oluna bilməz, çünki Avropada yaşadığım vaxt ərzində avropalıların tolerant olmasını müşahidə etmişəm və onların mənə olan münasibəti onu təsdiq edir ki, millətçilik dalğasını yalnız bəzi siyasi dairələr yaradır. Amma inkişafın qabağını ala biləcək millətçilik dalğasını yaradan bəzi milliyətçi qüvvələr iqtisadi və siyası bəhanələr gətirməklə heç bir avropalını aldada bilməzlər.

Elnur Eltürk

Təzadlar.- 2012.- 4 dekabr.- S.7.