Zəngulən susmasaydı kaş...

 

Bu günlərdə Azərbaycan Musiqi Mədəniyyəti Muzeyində Azərbaycanın xalq artisti mərhum Baba Mahmudoğlunun həyat və yaradıcılığına həsr olunmuş Əhsən Rəhmanlının "Səhnəmizin Məcnunu Baba Mahmudoğlu" adlı kitabının təqdimat mərasimi oldu. Bu, Baba Mirzəyev haqqında yazılan sayca 3-cü kitabdır.

Bundan öncə filoloq, fəlsəfə elmləri doktoru Fəridə Ləmanın "Səlcuqdan gələn səs" (2011-ci il), pedaqoji elmlər namizədi Allahverdi Eminovun "Baba Mirzəyevin musiqi fəlsəfəsi" (2007) adlı kitabları işıq üzü görüb. Əhsən Rəhmanlının bu kitabı çox gözəl tərtibatla hazırlanıb, 559 səhifədən ibarətdir. "Araz" nəşriyyatında çap olunan bu kitabda müəllif bədii öz fəaliyyətindən xalq artisti zirvəsinə yüksələn Mirzəyevin sənətə gəlməzdən öncə boya-başa çatdığı mühiti, tələbəlik və gənclik illərini, səhnəyə kövrək addımlarını, keçdiyi çətin yolları, acılı-şirinli həyat, yaşam tərzini verib. Eyni zamanda xalq artistinin sənətinin fanatlarının, tanınmış şəxsiyyətlərin ürək sözləri, ona həsr olunan şeirlər, təbriklər də kitabda yer alıb. Bu kitab Baba Mahmudoğlunun canından çox sevdiyi şeirlərində, mahnılarında vəsf etdiyi, həyatdakı Leylisi, Qarabağ gözəli, alim Amalya Cəfərzadənin təşəbbüsü və maddi dəstəyi ilə işıq üzü görüb. Bənzərsiz səs sahibi Baba Mahmudoğlu dünyanın bir çox ölkələrində qastrol-konsert səfərlərində olmuş, mükafatlar, hədiyyələr, diplomlar almışdır. Kitabda Babanın 100-dən çox şeirlərinə özünün və tanınmış bəstəkarların musiqi bəstələdiyi mahnıları da verilib. O, 100 ildən bir dünyaya gələn, fitri istedadı olan kamil insanlardan biridir. Gözəl şeirlər yazmaq, bəstələmək özü məlahətli, bənzərsiz səslə oxumaq hər kəsə nəsib olmur. Baba məhz belə şəxsiyyətlərdən biri idi. Tamaşaçılar Baba Mirzeyevin zil səsinə, səhnə davranışına, aktyorluq qabiliyyətinə hər zaman böyük dəyər vermiş, alqışlamışlar. Öncə dediyimiz kimi, kitabın təqdimat mərasimində Babanın xanımı Amalya, qızı Aygün, oğlu Aydın, nəvələri, dostları, xalq artistləri, yazarlar, elm sənət adamları, telekanallar iştirak edirdilər. Məclisi muzeyin işçisi Təranə xanım açaraq sözü aparıcı Əlirza Xələfliyə verdi. Muzeyin "Qədim alətlər" ansamblının müşayiətilə əməkdar artist Nuriyyə Hüseynova Teyyub Aslanov bir neçə xalq mahnısı oxudular. Əhsən Rəhmanlının bədii rəhbəri olduğu "Baba Mahmudoğlu" adına xalq çalğı alətləri ansamblının müşayətilə Opera Balet Teatrının solisti Rafiq Əliyev mahnı oxudu. Ardınca Babanın nəvəsi, Musiqi Akademiyasının məzunu, gənc pianoçu, xaricdə keçirilən bir neçə müsabiqənin laureatı Fəridə xanım Zeynallı bir neçə əsər ifa etdi. Qazaxdan məxsusi bu məclis üçün gələn (Babanın qohumu) aşıq Ruslan Əmiraslanov sazı sinəsinə basdı, saz dilə gəldi. Məclis əhli olan Çingiz Fərəcov, Canəli Əkbərov, Süleyman Abdullayev, Nahid Hacızadə, Elxan Məmmədli, Fəridə Ləman, Nazim Kazımov, Abbasqulu Nəcəfzadə digərləri maraqlı xatirələr söylədilər. Sonda Babanın xanımı Amalya Cəfərzadə çıxış etdi məclis əhlinə təşəkkürünü bildirdi.

 

 

Zeynəb Bəhmənli,

şairə-publisist, Azərbaycan

Yazıçılar Jurnalistlər birliklərinin üzvü   

 

Təzadlar.- 2013.- 23 fevral.- S.11.