Musa Yaqubun Türkiyədə kitabı işıq üzü gördü

Ustad şairimiz, dağların, daşların, qayaların, dərələrin, düzlərin, bir sözlə Azərbaycan təbiətinin tərcüməçisi, onları öz dilində danışdıran Musa Yaqubun bu günlərdə Türkiyədə kitabı çapdan çıxıb. Özünün də xəbəri olmadan türk qardaşımız, araşdırmaçı İmdat Avşarın təşəbbüsü və əməyi ilə araya-ərsəyə gələn “Benim dertlerimin ayakları var” kitabı başdan-ayağa Musa Yaqubun lirikasına həsr olunub. “Bu dünyanın qara daşı göyərməz”, “Bir gözünü sən əydin, bir gözün mən”, “Dənizləri hasarlayın” və s. kimi təbiətdən və ictimai əhəmiyyət kəsb edən şeirlərinə öyrəşdiyimiz Musa Yaqub, həm də incə qəlbli şair kimi lirik şeirlərin müəllifidir.

Adətən Musa Yaqubu biz dağları, daşları, qayaları tərənnüm edən, elə o dağlar, daşlar kimi sərt, nəhəng şair kimi tanımışıq. Amma onun lirik şeirləri də hər bir insanın könül pıçıltısı, həmdəmi, sevənlərin yol yoldaşıdır. Elə ona görə də araşdırmaçı İmdat Avşar şairin müxtəlif illərdə yazdığı lirik şeirlərini toplayaraq kitab halına salıb və onun qardaş Türkiyədə çap olunmasını təmin edib. İmdat Avşara qardaş qayğısı ilə təşəkkürümüzü bildirir və yenicə çapdan çıxmış “Benim dertlerimin ayakları var” kitabından bir neçə şeiri oxucularımıza təqdim edirik. Onu da diqqətə çatdıraq ki, kitaba ön sözü şair Əjdər Ol yazmış və Müsa Yaqub yaradıcılığana yüksək qiymət vermişdir. Maraqlı cəhət bir də odur ki, şeirlər latın əlifbası ilə, yəni Azərbaycan dilində çap olunub. Amma əksər sözlərin türkcədə necə deyilməsini əks etdirən lüğət isə kitabın arxasında verilmişdir. Bu da türk oxucularının Musa Yaqubu oxuyub, başa düşməkdə yardımçısı olacaq. 78 yaşlı ustad şairimizə can sağlığı, uzun ömür və yeni-yeni yaradılıcıq uğurları arzulayırıq.

Yeganə Balayarqızı

Niyə gəlmisən

Soldurub bağını, töküb barını,

Daha şuxdan salıb yarpaqlarını,

Soldurub o çıraq yanaqlarını

Qış olub, üstümə niyə gəlmisən?

Sən adlı o xanım xatını mənə,

Vermədin öz şahlıq taxtını mənə.

Qıymadın gül, çiçək vaxtını mənə,

Qış olub, üstümə niyə gəlmisən?

Məni həsrət qoyan ilk bəhərinə

İndii gəlib məni yada salıbmı?

Gözünün alovu özgələrinə,

Saçının qırovu mənə qalıbmı?

Qış olub, üstümə niyə gəlmisən?

Gözəllik, neylədin o bəxşişini,

Gəlmisən, bəs kimə bəxş etdik onu?

Nə bilim taleyin göndərişini

Qaytara bilmirəm, nə bildin bunu?

Nə bildin mən bir az ürəyi kövrək,

Qadın baxşında mütiyəm, lalam.

Nə bildin o həsrət məni əyəcək,

Nə bildin səninçin keçilmiş yolam.

Qış olub, üstümə niyə gəlmisən?

Ağlayan hirsimi soyutmağamı?

İncik ürəyimi uyutmağamı?

Təkəbbürlü xanım, a nazlı xanım,

Yox, yox, yalvarışı saxla Allah.

Bu yazıq baxışı saxla sən Allah.

Di yaxşı, bu dili, bu fəndi saxla,

Dilinin altında o qəndi saxla.

Gücün var, keçəni qaytar, soraqla,

Qış olub, üstümə niyə gəlmisən?

Nə dedin? Ah, bu nə yanıqlı sözdü!

Bir dayan, gözündə bu nə torandı...

Ah, mənim ürəyim nə ikiüzlü,

Vüqarımı necə yerə vurandı!

Bacara bilmədim, özümlə, heyf!

Qış olub, üstümə niyə gəlmisən?

Saxla həsrətimi

Bir qəfil görüşə, sevincə kimi,

Saxla ürəyində boğ həsərətimi;

Gəlin anaların mücrüsündəki

Ən gizli, müqəddəs döyünçə kimi

Saxla bu həsrəti könlündə saxla.

İslanmış düyün tək açılmaz olan

Unut bu nisgili boğ ürəyində boğ içində.

Təkcə səninkidir, təkcə səninki,

Əbədi sirr kimi saxla sinəndə;

Lap belə ən yaxın həmdərdinə də

Deyiləsi deyil deyə biləsən.

Bir az açılasan, bir az güləsən.

Hə, sonra iş güclə qarışar başın,

Bu yaxın rəfiqən, o iş yoldaşın

Xırda bir məclisdə keçən saatla

Ya bir söz söhbətlə, bir zarafatla

Ərit həsrətimi, ərit bir qədər,

Ağlar ürəyini kirit bir qədər.

Sonra da evə gəl, yır yığış elə,

Durub dönə-dönə

Şüşələri sil,

Amma pəncərədən boylanma çölə,

Baş qatıb mətbəxə gediş gəlişlə,

Nə bilim bu işlə, ya da o işlə

Bacarsan bir anlıq çıxar yadından

Ərit həsrətimi, ərit bir qədər,

Ağlar ürəyini kirit bir qədər.

Soyut bu nisgili qar kimi ərit,

Köz kimi, kül kimi, qor kimi ərit,

Bəs sonra, bəs sonra...

Tək qalanda, tək,

Bilirəm üstümə dağlar gələcək.

Bu həsrət gözünün yaşına dönüb,

Sinəndə dəiyrman daşına dönüb

Alacaq əlindən hər dözümünü.

İllah ki, vaxt səni get gələ sala

İllah ki, özgə bir dərdin də ola,

Bax, onda ürəyin tamam dolacaq.

Bu həsrət çox ağır həsrət olacaq.

İllah ki, hava da tutulsun bir az,

Həsrətdə görəsən günahı tamam.

Guya ki, mən olsam hava tutulmaz,

Hər işin düz olar, guya mən olsam.

Qəfil bir görüşə, sevincə kimi,

Dediyim müqəddəs düşüncə kimi

Saxla həsrətimi könlündə saxla;

Gözünə baxmağım olacaq yenə.

Gəlib gözlərində, baxışlarında

Donan həsrətimi görməsəm, heç nə!

Təzadlar.- 2014.- 2 dekabr.- S.15.