Ocaq aşığı

Məhərrəm Huseynli haqqında danışmaq xoşdur mənə. Onu yaxşı tanıyıram deyə fikrimin üstündə qətiyyətlə dayanıram. On ildən çoxdur bir kollektivdə çalışırıq. Ötən hər il onun açılmamış yeni-yeni mənəvi zənginliklərinə ayna salıb, bizi bir-birimizə bağlayır. Məhərrəm bəy Dədəm Qorqud yadigarı ozan-aşıq sənətimizin həm yaxşı təmsilçisi, həm yaxşı təbliğçisi, həm də yaxşı araşdırmaçısıdır.

Tovuzda doğulub. Tovuzda doğulub, Turana yol alıb. Yerlibazlıq, tayfabazlıq kimi insanı böyük mahiyyətindən ayıraraq cılızlaşdıran cəhətlər nə yaxşı ki, Məhərrəm bəyə yaddır. Azmı olub bu “xəstəlik” üzündən şairliyini, alimliyini, aşıqlığını heç eləyənlər?! Nə yaxşı ki, Məhərrəm Hüseynli bu bəladan uzaqdır. O, bəziləri kimi anketcə milli olanlardan deyil. Soruşa bilərsiniz: aşıq olub milli olmamaq da mümkündürmü? Razıyam, mümkün deyil. Bu müqəddəs sənət milli mədəniyyətimizin heç cür inkarolunmaz tərkib hissəsidir. Ancaq azmı görmüşük sinəsində saz gəzdirib öz rayonunu ölkəsi, öz yerlisini milləti bilən xırdaları, cılızları?.. Tərslikdən Məhərrəm bəyin də belə yerliləri az deyil. Bəzən onların içindən də Məhərrəm bəyə ağız büzən tapılır. Məhərrəm bəy isə dayanmır. Yorulmadan haqq bildiyi yola davam edir. Sinəsində sazla, əlində qələmlə müqəddəs amallar uğrunda döyüşdədir. Bu yolda bir an da olsa çaşmır, ləngimir, təngimir. Türk dünyasının Mikayıl Azaflı (“Əzablı” da demək olar) kimi haqq bağıran ozanının sənət köynəyindən keçməyi Məhərrəm Hüseynliyə getdiyi yolda yar olur.

Qoca Azaflıyam, dilim var, lalam,

Elə dərd varmı ki, çəkməmiş olam,

Təbrizdə qardaşım, Sibirdə balam-

Bax onlar ağartdı saçımı mənim.

- deyən Qoca Azaflının sözün həqiqi mənasında ən layiqli mənəvi davamçısıdır Məhərrəm Hüseynli. Məhərrəm Hüseynli Bütöv Azərbaycan savaşının önündə gedənlərdəndir. Onun milli davada iştirakı bəziləri kimi kor-koranə özfəaliyyət xarkteri daşımır. O, bu gün Bütöv Azərbaycan davasının ən inamlı, ən sədaqətli yolçularını özündə birləşdirən, öz fəaliyyəti ilə İran fars-molla rejiminin kürkünə birə salan, kökünə balta vuran Bütöv Azərbaycan Ocaqlarının fəallarındandır. Aşıq olan ocaqdan çıxar. Aşıq olanın ocağı olar. Necə ki, Alı ocağı, Ələsgər ocağı, Şəmşir ocağı, Avdı ocağı, Mikeil ocağı, Kamandar ocağı, Xanlar ocağı, Əli qədəmgahı (Aşıq Əli Quliyev ocağını belə adlandırır) var. Bir də var Məhərrəm Hüseynlinin təmsil olunduğu Bütöv Azərbaycan ocağı. O ocaq ki, bu gün təkcə Məhərrəm Hüseynlinin yox, bütün Azərbaycan türklərinin istisi özünə çatan ən müqəddəs ocağıdır. Məhərrəm Hüseynli öz ocağımızın aşığıdır, öz ocağımızın odunu qoruyur... Ocaq köməyiniz olsun!

Həmid ORMANLI

Təzadlart.- 2014.- 13 dekabr.- S.15.