İtaliya - “xəyallar ölkəsi”ndən “silinməz” səfər təəssüratları

...Italiya ecazkar və təzadlı təbiəti olan bir ölkə kimi təkcə yerli əhali üçün deyil, xarici turistlər üçün də çox cəlbedici bir ölkədir. Adriatik dənizinin sahilləri boyunca uzanan çimərlikləri, göz oxşayan sıra dağları, cənubunda qızmar yayı, şimalında şaxtalı qışı-bütün bunlar İtaliyaya qədəm basan hər kəsi valeh edir.

Belə bir deyim var: “Arzunu azad et və onun dönüşünü gözlə...” Bu həqiqətən də belədir! İndiyədək hələ də “gözoxşayan”, bəşəri memarlıq və incəsənətin sərvəti sayılan “valehedici” İtaliyanı görmək hər bir memarın arzusudur desəm, məncə yanılmaram. İtaliya-sivilizasiyanın parlaq nümayişi ilə III minilliyinə qədəm basan, yüksək mədəni dəyərləri özündə cəmləyən, füsunkar şəhər və vilayətlərilə, birmənalı olaraq “bəşər bağı” adlandırılan ecazkar bir ölkədir. Avropada əhalinin ən sıx məskunlaşdığı ölkələrdən olan İtaliyada ərəblər, bizanslılar, yunanlar, normanlar, finikiyalılar və başqa xalqların nümayəndələri yaşayırlar...

Ötən ilin payızında məşhur İtalyan brendi kimi dünyada tanınan “Leardini 1964” şirkətinin təşəbbüsü ilə AzMİU-da (Azərbaycan Memarlıq və İnşaat Universiteti) “La bella cucina” adlı “ interyer-dizayn tərtibatı” üzrə müştərək müsabiqənin keçirilməsi təklifi qərara alınmışdı. Müsabiqənin əsas qəyəsini Azərbaycanın mədəni irsi ilə tanışlıq, ölkəmiszin mətbəx və yaşam mühiti ənənələrinə olan maraq, zəngin milli - etnik xüsusiyyətlər, cəmiyyətin müasir tələb və funksional tələbatlarının araşdırılması, İtaliya-Azərbaycan milli-mədəni həyat tərzindəki oxşar və fərqli cəhətlərin öyrənilməsi, ənənəyə müasir yanaşma tərzinin müəyyənləşdirilməsi və s. cəhətlər təşkil edirdi.

Müsabiqənin maraqlı və “məsuliyyətli” konsepsiyası həm interyer dizaynı üzrə, həm də, Azərbaycanın mədəni və etnoloji tarixi üzrə nəzəri bilik və bacarıqların bütünlüklə “səfərbərliyini” tələb edirdi. Qalibləri isə “xəyallar ölkəsi” - İtaliyaya bir həftəlik səyahət gözləyirdi!

Qısa arayış: “Leardini 1964” şirkəti - İtaliyanın “elit” mebel və avadanlıqlar istehsalı üzrə, əsasən, işini ailə ənənələrinə sadiqlik, sənətkarlıq prinsipləri üzərində quran və “50 il”lik yubileyini yenicə qeyd edən dünyaca məşhur olan bir şirkətdir. Şirkətin bu günə qədərki dəyişməz mövqeyini “Nəfis, təmtəraq və eksklüzivlik” devizi ifadə edir. “Gianluca Donati” - isə, 1964-ci ildən etibarən nəinki italyan, eləcə də beynəlxalq mebel “bazar”ında yaşayış və ictimai məkanlar üçün “elit” mebel və avadanlıq istehsalı ilə fərqlənən - Leardini markasının brendidir.

Brendin hər bir mebel elementində, həqiqi mənada, tarixin və üslubun dərin “kök”lərini izləmək mümkündür. Belə ki, şirkətin bütün kolleksiyalarının dizayn həllində italyan incəsənətini bütün dünyada məşhur edən, əsasən də Venesiya və Veronadan vüsət alan bədii cərəyanlar öz əksini tapır.

Şirkətin fabrikasındakı emalatxanalarda, istənilən mebel kolleksiyasının dizaynı üzrə texniki hazırlığa yiyələnərkən, ustad və sənətkarlıq izlərini açıq aydın görmək mümkündür. İstehsal prosesindəki tamamilə əl işi sayılan sənətkarlıq nümunələri, artıq real mebelin dəyər və unikallığının təminatçısı kimi qəbul edilmişdir. Layihələrin dizayn həllində texnoloji təminata əsaslanan şirkət layihənin təyinatının “diktə” etdiyi bütün funksional xüsusiyyətləri müəyyənləşdirməyə və bütünlükdə, detal və üslub həllərini dəyərləndirməyə qadirdir. Bütün deyilənlər bir daha sübut edir ki, yüksək keyfiyyətli mebel - sənət nümunəsi istehsalına nail olmaq (uzun illər şirkətin istinad etdiyi yeganə mövqe) bütün məmulatlarda uzunmüddətli zəmanətə və texniki dəstəyə təminat verir. Bütün dizayn-konsepsiya və layihə təklifləri müxtəlif ağac cinslərindən (o,cümlədən, ekzotik cinslər) və geniş çeşiddə bəzək materiallarından (mərmər, qranit, travertin və s. eksklüziv cinslərdən) hazırlanır. Hazırda şirkət 2 xətt üzrə eksklüziv araşdırmaları və istehsalı (klassik və müasir istiqamətlər) həyata keçirir. “Leardini 1964” şirkətinin sahibi, cənab Franco Leardinidir, onun oğlu Marco Leardini isə (Marco Leardini 1964) şirkətin və “ailə səlnaməsi” işinin uğurlu davamçısıdır.

İştirakçılar tərəfindən müsabiqəyə göndərilən (ayrılmış olan müddət ərzində) müxtəlif konsepsiyalı layihə təkliflərindən müsabiqədə yalnız 3 qalib 2014-ci ilin yazında münsiflər heyəti tərəfindən müəyyənləşdirmilmişdir: AzMİU-nun “Dizayn” kafedrasının məzunu Mərziyə Əhmədova (müsabiqənin qalibi), “VİP” sinif villa məkanında yaşam və mətbəx mühitinin interyer-dizayn həlli” mövzusunda, AzMİU, “Dizayn” kafedrasının dosent əvəzi Nərgiz Ağayeva (münsiflərin xüsusi seçimi) “Kiçikqabaritli şəhər mənzili məkanında yaşam və mətbəx mühitinin interyer-dizayn həlli” mövzusunda və AzMİU-nun “Dizayn” kafedrasının məzunu Orxan Əfəndiyev (münsiflərin xüsusi seçimi) “Konteyner - ev məkanı çəçivəsində yaşam və mətbəx mühitinin interyer-dizayn həlli” mövzusunda.

Nəhayət ki, həyəcanlı məqamlar arxada qalaraq, qaliblər müəyyənləşdi və bizi “əsrarəngiz” İtaliya ilə gözləyən görüş baş tutdu. İtaliya paytaxtında gördüyümüz və aldığımız təəssüratlar, “Leardini 1964” şirkəti liderlərinin “qonaqpərvərliyi” ümidlərimizi daha da üstələdi.

Noyabrın 10-dan 21-dək olan səfər zamanı İtaliyanın qədim şəhərləri - Verona, Mantova, Ferrara və Veneziyaya yüksək səviyyəli, maraqlı səyahət turları təşkil olundu. Səfər çərçivəsindəki ekskursiyalarda nəinki İtaliyanın, bütün bəşəriyyətin mirası sayılan nadir memarlıq və sənət incilərilə yanaşı, həmçinin, İtalyan Qotikası, Barokko və İntibah, Roman üslubları ilə də yaxından tanışlıq mümkün oldu. Təbii ki, İtaliya tarix və incəsənət xəzinələri ilə zəngin olan füsunkar bir ölkədir. Turistlərin ən çox ziyarət etdiyi qədim yunan və Roma qalıqları, yaxud da barokko və Renessans (İntibah dövrü) memarlığı bir çox İtaliya şəhərlərinin qürur mənbəyi hesab olunmalıdır. Rəsm əsərləri, mərmər heykəllər və fəvvarələr Bernini, Mikelancelo və Rafael kimi sənətkarların adı ilə bağlıdır. İtalyanların daha çox istiqanlı olmaları, insanlara qaynayıb-qarışmaları və qonaqpərvərlikləri də xüsusi qeyd olunmalıdır. Axı onlar ünsiyyət qurmağı, şirin söhbət etməyi başqalarından daha yaxşı bacarır və sevirlər.

Nəfis italyan mətbəxindən aldığımız təəssüratlar da bizi valeh etdi. Təəccübləndirici cəhət isə italyanların qidalanma “mədəniyyəti”nə, “milli” məzmunlu yeməklərə, şərabçılığa və nahar zamanı ünsiyyətdən alınan sevinc və zövq hissinə verdikləri “incə” dəyər və hörmət idi.

Qeyd edim ki, bütün ekskursiyalar, dəvət olunmuş bələdçilərin bu ölkə haqda maraqlı hekayət və “qeyri-adi” faktların izahı ilə müşaiyət olundu.

Bundan əlavə, noyabrın 15-də tarixində nümayəndə heyətinin “Leardini1964” şirkətinin Verona şəhərindəki mebel istehsalı üzrə fabrik və “sou-room”u ilə tanışlıq zamanı bir daha məmulatların “əl-işi” prosesindən keçməsinin “canlı” şahidi olduq. Daha sonra, “şou-room”da müsabiqə qaliblərinin mükafatlandırılma mərasimi oldu. Təntənəli təşkil olunmuş bu mərasimdə Verona şəhərinin Sanquinetto və Casaleone vilayətlərinin merləri; Alessandro Braqa və Andrea Gennari cənabları, münsiflər heyətinin sədri, məşhur memar Luca Bezzetto, şirkətin prezidenti, cənab Franco Leardini, şirkətin digər üzvləri və yerli media nümayəndələri də iştirak edirdilər. Giriş sözü ilə bütün mərasim iştirakçılarını və qalibləri təbrik edən münsiflər heyətinin sədri Luca Bezzetto: seçılmiş layihələrdə bəyənilən; müasir zamanın duyumu ilə “milli” elementlərin sintezini, yaşam və mətbəx mühitinin dizaynındakı uğurlu həlləri və digər özünəməxsus məqamları vurğuladı.

Bizim nümayəndə heyəti tərəfindən də, məhz bizi İtaliyaya dəvət “şərəf”inə layiq gördükləri, göstərilən “isti” qonaqpərvərlik üçün bütün müsabiqə təçkilatçıları və “Leardini 1964” şirkətinin liderlərinə dərin təşəkkürlər bildirildi.

Təntənəli mükafatlandırma mərasimindən sonra müsabiqənin təşkilatçıları və nümayəndələrilə birgə, həmçinin, “Leardini 1964” şirkətinin biznes-məsləhətçisi, cənab Moreno Pettenenin iştirakı ilə maraqlı diskussiya keçirildi. Söhbət zamanı Azərbaycanın “elit” mebel və avadanlıq satışı “bazar”ının indiki vəziyyəti, müasir sifarişçi və cəmiyyətin funksional tələb və tələbatları, həm İtaliya, həm də Azərbaycanın dizayn-sektorunda baş verən yenilik və dəyişikliklər haqda fikir mübadilələri aparıldı. Həmçinin, müasir cəmiyyətdə hansı üslub və təmayüllərə verilən üstünlüklər, gələcəkdə şirkətlə birgə əməkdaşlıq və müştərək yaradıcı layihələrin icrasının mümükünlüyü haqda da müzakirələr aparıldı. Sonda qeyd olundu ki, yeni sosial-iqtisadi münasibətlərin formalaşdığı mərhələlərdə yaranan yeni-yeni tələbatlar, öz növbəsində forma və məzmunca yeni mebel əşyaları və dekor elementlərinin də yaranmasına səbəb olur, bununla da yeni gözəllik ideallarını formalaşdırır.

Romaya bir həftəlik səfərimizin yaddaşımıza hopdurduğu “silinməz” təəssüratlara və qəbula, yüksək qonaqpərvərlik nümayişinə görə, şirkətin nümayəndələri başda cənab Franco Leardini olmaqla, Camillo Zambelli, İlaria Spiandore, Mariana Alcaz, Abdellatif Nour və Luca Bezzettoya dərin təşəkkür edirik. Eyni zamanda, müsabiqənin əsas təşkilatçılığını öz üzərinə götürən, şirkətin aparıcı liderlərindən olan, şəxsən cənab Marco Leardiniyə minnətdarıq və səmimi qəlbdən mebel dizaynı aləmində daha böyük zirvələri fəth etməyi diləməyi özümüzə borc bilirik.

Müsabiqənin təşkili və ərsəyə gəlməsində əməyi olan AzMİU-nun rektoru, prof. G.Məmmədovaya, AzMİU-nun prorektoru, prof. N.Abdullayevaya, AzMİU-nun “Memarlıq” fakultəsinin dekanı, dosent Z.Məmmədovaya və münsiflər heyətinin üzvü, AzMİU-nun “Dizayn” kafedrasının baş müəllimi F.Qasımovaya da “çox sağ olun” deyirik.

Nərgiz Ağayeva,

AzMİU-nun “Dizayn” kafedrasının dosent əvəzi, AMİ-nin üzvi, memar

Təzadlar.- 2014.- 18 dekabr.- S.13.