“Mənim ana dilim”

Müşfiqabad qəsəbəsindəki E.Şirəliyev adına 274 saylı tam orta məktəbdə Beynəlxalq Ana Dili günü münasibəti ilə keçirilən tədbir yaddaşlara həkk olundu...

Dil dedim fəryadım qalxdı təpəmdən,

Qədim dövlət dilim, şeiriyyət dilim

Xalqım öz dilində mahnı deyəndən,

Neçə yol dilindən dara çəkilib.

Respublikamızın xalq şairi Söhrab Tahirin “Azərbaycan” poemasından sitat gətirdiyimiz bu misralar əsrlərlə dilimizin qorunması uğrunda mübarizəni gözəl əks etdirir. Əlbəttə ki, hər bir millətin varlığı onun dilidir. Dil insanları bir-birinə bağlayan həm də bir ünsiyyət vasitəsidir. Ona görə də dil ən müqəddəs sərvət sayılır. Elə müqəddəs ki, onu dünyada hamıdan çox sevdiyimiz anamızın dili ilə bağlamışıq. Bu səbəbdən dilimiz ana dili adlanır. Dünyada yaşayan hər bir xalq öz ana dilini qorumaq üçün varlığından keçməyə hazırdır. Heç də təsadüfü deyil ki, dilin müqəddəsliyini hər an xatırlatmaq üçün fevralın 21-i Beynəlxalq Ana Dili günü kimi qəbul edilib. Həmin günü bütün xalqlar öz doğma dillərini sevdirmək üçün bir çox tədbirlər həyatə keçirirlər.

Beynəlxalq Ana Dili günü münasibəti ilə Azərbaycanın əksər orta məktəblərində çox maraqlı və rəngarəng tədbirlər həyata keçirildi. Belə gözəl tədbirlərin biri də Qaradağ rayonu Müşfiqabad qəsəbəsi E.Şirəliyev adına 274 saylı tam orta məktəbdə baş tutdu. Bu tədbiri əvvəldən axıra qədər çox maraqla izlədim. Sözün həqiqi mənasında şagirdlərin ifasında söylənən dilimizə, vətənimizə, torpağa həsr olunmuş şeirlər və səslənən musiqilər istər-istəməz adamı kövrəldir. Tədbirin açılışı gözəl sənətkarımız mərhum Gülağa Ağayevin ifasında “Şirin dil” mahnısı ilə açıldı.

Məktəbin əsasən 7-ci və 8-ci sinif şagirdlərinin hazırladığı ədəbi-bədii kompozisiya aşağı sinif şagirdlərində dilimizə olan həvəsi mən deyərdim, bir az da artırdı. Bu şagirdlər anladılar ki, bəli, bizim ana dilimiz müqəddəsdir və onun varlığını qorumaq, inkişaf etdirmək hər birimizin mənəvi borcudur. Şagirdlərdən Xəyyam Nəbizadənin, Fərqanə Gülverdiyevanın ifasında səslənən muğam parçaları sözün əsl mənasında adamı ovsunlayırdı. Fatimə Mahmudəliyevanın ifasında şair Tofiq Bayramın “Ana dili” şeiri çox böyük peşəkarlıqla səsləndi. 8 c sinif şagirdi Leyla Abbasovanın ifasında Məmməd Aslanın “Mənim dilim qibləgahım” şeiri olduqca təsirli alındı.

Şagirdlərin ifası zamanı arabir zalda əyləşmiş aşağı sinif şagirdlərinin üzlərinə baxırdım. Onlar ana dilimizin nə qədər şirin olduğunu sanki indi anlayırdılar. Elə hər çıxışdan sonra ifaçının gurultulu alqışlara qonaq edilməsi də, dediklərimizə canlı sübut idi. 8-ci sinif şagirdi Məryam Quliyeva isə X.R.Uluturkün “Mənim dilim” şeirini çox böyük ustalıqla söylədi. Şeirlər arası səslənən muğan parçaları isə dilimizin necə zəngin olduğunu daha qabarıq şəkildə tamaşaçılara çatdırırdı.

7-ci sinif şagirdi Elmir Pənahovun sazda qoşmalarımızı ifa etməsi isə hamının qəlbini ovsunladı. Hiss olunur ki, bu balaca istedad Azərbaycanın gələcəkdə çox böyük sənətkarlarından biri olacaq. Maraqlı məqam həm də ondan ibarətdir ki, balaca Elmir çox böyük məharətlə muğam parçalarını ifa edirdi. 8-ci sinif şagirdi, gənc qiraətçilər arasında ümumrespublika müsabiqəsinin qalibi Fatimə İbadovanın oxuduğu “Şahnaz” muğamı isə xalqımızın mənəvi sərvətinin necə etibarlı əllərdə olduğunu sübut edirdi. Digər 8-ci sinif şagirdi Türkay İbrahimlinin “Ağ çiçəyim” musiqisinin sədaları altında rəqs etməsi isə tamam başqa bir aləm idi. Türkay sanki rəqs etmirdi, quş kimi süzürdü. Doğrudan da 274 saylı məktəbdə belə istedadlı şagirdlərin olması qəlbimdə bir qurur hissi doğurdu. T.İbrahimovanın peşəkar rəqqaslar kimi rəqs etməsi, deməyə əsas verir ki, bu şirin balamız gələcəkdə Azərbaycanı istənilən beynəlxalq tədbirlərdə çox böyük məharətlə təmsil edə bilər.

Ana dilimizə həsr olunmuş ədəbi-bədii kompozisiya o qədər maraqlı və cəlbedici oldu ki, vaxtın necə gəlib keçdiyindən xəbərimiz olmadı. Bəs belə rəngarəng tədbiri araya-ərsəyə gətirib, bizlərə mənəvi qida verən görəsən kimdir? Öyrəndim ki, məktəbin Azərbaycan dili və ədəbiyyatı müəllimi, ədəbiyyat sahəsi üzrə metodbirləşmənin rəhbəri, həm də gözəl şeirlərin müəllifi Yeganə xanım Əliyevadır. Elə tədbir də məhz Yeganə müəllimənin “Azəri dilim” adlı şeiri ilə başa çatdı. Bu şeir 8-ci sinif şagirdi Fatimə İbadovanın ifasında çox gözəl səsləndi:

Bu dildə səslənir möhtəşəm himnim,

Bu dildə yazılır mənim kimliyim,

Azadlığım, istiqlalım, birliyim,

Azəri dilim, doğma Ana Dilim.

Ulu öndərimin dilidir bu dil,

Mənim qürur yerim, fəxr mənbəyim.

Mənim dövlət dilim, şeiriyyət dilim,

Azəri dilim, doğma Ana Dilim.

Tədbirin sonunda məktəbin direktoru Atakişi Cəfərov Yeganə Əliyevaya bu gözəl tədbirə görə təşəkkür edərək, dedi: “Əziz şagirdlər, bizim ana dilimiz çox şirin və müqəddəs bir dildir. Bu dildə bizə anamız layla çalıb, bu dildə biz elm öyrənirik, bu dil bizi torpağa, vətənə bağlayır. Ona görə də dilimizi sevmək, onu qorumaq hər birimizin borcudur. Özünüz də şahid oldunuz ki, dilimizə həsr olunmuş bu tədbir o qədər maraqlı keçdi ki, heç vaxtın necə ötdüyünü də bilmədik. Yeganə xanıma buna görə təşəkkür edirik”.

Atakişi müəllimin dəvəti ilə tədbirin iştirakçısı kimi mən də öz ürək sözlərimi şagirdlərə belə çatdırdım: “Biri-birimizlə Azərbaycan dilində danışmaq hələ dilimizi tam bilmək demək deyil. Ana dilimizi biz o zaman mükəmməl bilmiş sayılarıq ki, bu dildə bizə öyrədilən elmlərə tam yiyələnək, bu dildən aldığımız mənəvi güclə torpağımıza, vətənimizə bağlı olaq. Bu yolda sizə uğurlar diləyirəm”.

Sonda məktəbin direktoru A.Cəfərova və Yeganə Əliyevaya şagirdlərin mənəviyyatında ciddi rol oynayan belə gözəl, vacib tədbirin təşkilinə və keçirilməsinə görə təşəkkürümü bildirdim. İnanıram ki, belə tədbirlər şagirdlərin yaddaşlarına əbədi həkk olunacaq və ana dilimizin sevilməsi, qorunub, inkişaf etdirilməsi baxımından gənc nəslin həyatında böyük rol oynayacaq.

Elçin MƏMMƏDLİ

Təzadlar.- 2014.- 25 fevral.- S.15.