Baharlılar haqqında kitab

Tədqiqatçı-jurnalist Orxan Zakiroğlunun (Baharlı) “Şərq tarixi: Baharlılar” (Bakı, 2013), “Şərq tarixi: Baharlılar (ensiklopedik məlumat kitabı)” (Bakı, 2013) adlı iki kitabdan ibarət əsəri işıq üzü görüb. Müəllif hər iki kitabı iyirmi ildən çox müddətdə orta əsrlərə aid tarixi qaynaqlar, arxiv materialları, tədqiqat əsərləri əsasında apardığı araşdırmalara istinadən yazıb. 1996-cı ildə qələmə alınmış iki kitabdan ibarət bu əsər uzun illər müəyyən səbəblər üzündən nəşr olunmayıb

Müəllif kitabları çapa hazırlayarkən bəzi tarixi faktları, hadisələri bir daha nəzərdən keçirib, dəqiqləşdirmələr apararaq arxiv materiallarına, orta əsrlərə aid tarixi mənbələrə, tədqiqat əsərlərinə istinadən əlavələr edib, genişləndirib. Birinci kitabda “Baharlı” sözünün etimologiyası araşdırılır. Bu tayfanın görkəmli şəxsiyyətlərinin, dövlət, elm, mədəniyyət xadimlərinin fəaliyyətləri xronoloji ardıcıllıqla təhlil olunur.

İkinci kitab ensiklopedik qaydalara uyğun yazılıb. Əsər müəllifi tarixin müxtəlif dövrlərində yaşamış, hazırda fəaliyyət göstərən 183 şəxsiyyət haqqında ətraflı məlumat verib.

Hər iki kitaba daxil edilmiş baharlılarla bağlı altı nəsil şəcərəsi orta əsrlərə aid tarixi qaynaqlara, arxiv materiallarına, tədqiqat əsərlərinə istinadən hazırlanıb.

“Şərq tarixi: Baharlılar” (Bakı, 2013), “Şərq tarixi: Baharlılar (ensiklopedik məlumat kitabı)” (Bakı, 2013) adlı iki kitabdan ibarət bu əsər müəllimlər, tələbələr, ümumiyyətlə, qədim türk xalqlarının tarixi ilə maraqlananlar üçün dəyərli tədqiqat əsəridir.

ELBAR

Təzadlar.- 2014.- 15 iyul.- S. 15.