Çingiz Aytmatovun dilimizdə işıq üzü görmüş “Hekayələr” kitabının təqdimatı keçirildi

Noyabrın 22-də “Kitab evim” mağazasında qırğız yazıçısı Çingiz Aytmatovun dilimizə tərcümə ilə işıq üzü görmüş “Hekayələr” kitabının təqdimat mərasimi keçirildi.

“Altun kitab” nəşriyyatının təşəbbüsü və təşkilatçılığı ilə keçirilən tədbirin aparıcısı şair Dayandur Sevgin qonaqları salamladıqdan sonra yeni nəşrlə bağlı iştirakçılara məlumat verdi. Kitabın tərcüməçiləri şair İbrahim İlyaslıya və Təranə Quliyevaya minnətdarlıq edən D.Sevgin İ.İlyaslının şairliklə yanaşı, tərcüməçilik bacarığına da malik olduğunu bildirdi. O, tərcüməçiliyin də digər sənət sahələrindən daha fərqli məsuliyyət, gərgin əmək tələb edən yaradıcılıq işi olduğunu vurğuladı.

Azərbaycan Yazıçılar Birliyinin Yaradıcılıq məsələləri üzrə katibi İlqar Fəhmi kitab təqdimatının məhz kitab evində keçirilməsinin önəmli olduğunu dedi. Təqdimatı keçirilən kitabdan və Çingiz Aytmatov yaradıcılığından söz açan İ.Fəhmi kitabın uğurlu bir tərcümə nümunəsi olduğunu qeyd etdi. O, müəllifləri təbrik edərək onların tərcüməçilik fəaliyyətlərini davam etdirməsini istədi.

Azərbaycan Yazıçılar Birliyinin mətbuat xidmətinin rəhbəri Xəyal Rza “Hekayələr” kitabının bu yaxınlarda Qırğızıstanın Azərbaycandakı səfirliyində də geniş təqdimatının keçirildiyini xatırladaraq, səfirliyin təşəbbüsü və təşkilatçılığı ilə keçirilən tədbirdə Qırğızıstan Xarici İşlər Nazirliyinin Avropa, Amerika ölkələri departamentinin başçısı Kanat Tursunkulovun, Qırğızıstanın Azərbaycandakı səfiri Aydjiqit Buranovun, AYB sədri, xalq yazıçısı Anarın, həmçinin millət vəkillərinin iştirak etdiyini bildirdi. AYB-nin mətbuat katibi kitabın oxucular tərəfindən maraqla qarşılanacığına əminliyini vurğulayaraq müəlliflərə yeni yaradıcılıq uğurları arzuladı.

Şair Vasif Süleyman bildirdi ki, bu cür tədbirlər son zamanlar ölkədə “kitab oxuyan yoxdur” deyə şikayətlənənlərin yanılma göstəricilərindən sayıla bilər.

Araşdırmaçı Ənvər Börüsoy bu təqdimatın ona ikiqat sevinc yaşatdığını vurğuladı. Çingiz Aytmatovla dostluğundan və uzun müddət bir yerdə olmalarından söz açan Ə.Börüsoy İ.İlyaslının məhz Ç.Aytmatov yaradıcılığına müraciət etməsindən məmnun olduğunu dilə gətirdi. Onun fikrincə, o xalq tarix boyu həmişə qələbə çalır kr, öz mədəniyyətinə sahib çıxır: “Öz mədəniyyətinə sahib çıxmayan xalq həmişə məhvə məhkumdur. Ona görə də bizim bir turk olaraq mədəniyyətimizi, mənəviyyatımızı, həyat tərzimizi məhv etməyə çalışırlar. Sanki ölkə bir poliqona çevrilib və o poliqonun qarşısında dayanan sizlərsiniz. Siz mənəviyyat insanları olmasa, mənəviyyatımız, milli mənəvi dəyərlərimiz məhv olar. Yaxşı ki, siz varsınız”.

Şabranda fəaliyyət göstərən Xaqani Poeziya evinin rəhbəri şairə Aybəniz Əliyar, şairə Nazilə Gültac, yazar Aləmzər Sadiqqızı, Bakı Avropa liseyinin müəllimi, “Altun kitab” nəşriyyatının əməkdaşı Hidayət Allahverdi, “Kulis.az” dərgisinin əməkdaşı Ağa Cəfərli, AMEA Nizami adına Ədəbiyyat İnstitutunun direktor köməkçisi Mehman Həsən və digərləri çıxış edərək tərcümənin məziyyətləri və kitabın əhatə etdiyi mövzularla bağlı öz fikirlərini bölüşərək, müəlliflərə yeni yaradıcılıq üfüqləri dilədilər.

Sonda İbrahim İlyaslı tədbirin təşkilatçılarına və iştirakçılarına minnətdarlıqla, təqdimat mərasiminə gələn çoxsaylı oxucuları, kitabsevərləri, elm və sənət dostlarını, sadə insanları, Bakı Avropa liseyinin şagirdlərini bir arada görməkdən məmnunluğunu təşəkkürlə dilə gətirdi.

Daha sonra oxucular “Hekayələr” kitabı üçün müəllif imzası aldılar.

Elbar ŞİRİNOV

Təzadlar.- 2014.- 25 noyabr.- S.15.