Cabbar bəy Vəlibəyov və davamçıları

Bu günlərdə tanınmış tədqiqatçı-jurnalist Orxan Zakiroğlunun (Baharlı) “Cabbar bəy Vəlibəyov və davamçıları” (Bakı, 2014) adlı kitabı işıq üzü görüb. Kitab görkəmli maarif xadimi, Ağdamın I Baharlı kənd tam orta məktəbinin yaradıcısı Cabbar bəy Vəlibəyovun anadan olmasının 120, yaratdığı məktəbin 100 illiyi münasibəti ilə qələmə alınıb. Cabbar bəy Vəlibəyov tarixin müxtəlif zamanlarında dövlət, elm, mədəniyyət xadimləri ilə tanınan Baharlı tayfasının layiqli övladlarındandır.

Kitabda görkəmli maarif xadiminin ömür yolu xronoloji ardıcıllıqla verilir, soykökü, həyatı, pedaqoji fəaliyyəti işıqlandırılır, davamçıları, əsasını qoyduğu məktəbin məzunları haqqında söhbət açılır.

Kitabda Cabbar bəy Vəlibəyovun övladı, I Baharlı kəndinin ilk və yeganə görkəmli alimi, milli fəlsəfi irsimizin əvəzolunmaz tədqiqatçısı, AMEA-nın müxbir üzvü, fəlsəfə elmləri doktoru, professor Zakir Məmmədovun (Baharlı) həyatı və elmi fəaliyyəti haqqında ətraflı məlumat verilir.

“Cabbar bəy Vəlibəyov və davamçıları” adlı bu kitab Cabbar bəy Vəlibəyov və davamçıları haqqında ilk və dəyərli tədqiqat əsəridir.

E.ŞİRİNOV

Təzadlar.- 2014.- 2 oktyabr.- S.15