Qaraqoyunlu dövlətinin qurucusu
Görkəmli dövlət xadimi, Qaraqoyunlu dövlətinin yaradıcısı Qara Yusif 1355-ci ildə anadan olmuşdur O, soy-kök etibarilə Baharlı tayfasındandır. Atası Qara
Məhəmmədin öldürülməsindən
sonra Qaraqoyunlu tayfasının başçısı
seçilmişdir. Onun
haqqında bütün
məlumatlar Nizaməddin
Şaminin "Zəfərnamə
(Azərbaycan və qonşu ölkələrin
tarixinə dair iqtibaslar)" (Türk dilindən tərcümə
edəni akademik Z.M.Bünyadov, Bakı,
1992), Əbubəkr Tehraninin
“Kitabi-Diyarbəkriyyə” (Fars dilindən tərcümə
edən, ön söz, şərhlər və göstəricilərin
müəllifi Rahilə
Şükürova, Bakı,
1998), Hasan-ı Rumlunun
“Ahsenüt-Tevarih” (Çeviren:
Mürsel Öztürk,
Ankara-2006) adlı orta
əsrlərə aid mənbələrə
istinadən qələmə
alınmış, akademik
Həmid Araslının,
professor Cəfər İbrahimovun
tədqiqatlarından istifadə
edilmişdir.
Qara Yusif hakimiyyəti dövründə
atasının siyasətinə
uyğun hərəkət
etmiş, qüdrətli
dövlət yaratmaq üçün hərbi əməliyyatlar aparmışdır. Öz məqsədinə
çatmaq üçün
uzun illər ona maneə olmuş teymurilər və ağqoyunlularla döyüşməli olmuşdur.
Əmir Teymurun və Ağqoyunlu başçısı
Qara Yuluk Osmanın ordularını
dəfələrlə məğlub
etmişdir. Qara Yusifin
qələbələri ilə
yanaşı uğursuz
döyüşləri də
çox olmuşdur.
Onun köməyinə sığınmış
Cəlairi hökmdarı
Sultan Əhmədlə müttəfiq
olmuş, lakin ciddi uğur əldə edə bilməmişdir.
Sultan Əhmədlə müttəfiq olduğu illərdə teymurilərlə
həlledici döyüşlərdə
iştirak etmişdir. Teymurilərlə döyüşlərdə geri
çəkilməli olduğu
zamanlarda Misir sultanının, Osmanlı
sultanının yardımlarından
istifadə etmək istəmişdir. O, səkkiz-doqquz
ay İldırım Bəyazidin
qonağı olmuşdur.
Osmanlı sultanı Qara
Yusifi ondan tələb edən Əmir Teymura rədd cavabı vermişdir.
Qara Yusif İldırım Bəyazidin
məğlubiyyətindən sonra bir müddət
ona sadiq Qaraqoyunlu əmirləri ilə Bağdadda yaşamışdır. Teymurilərin
Bağdada hücumunu eşidib Şama
getmişdir. Onun məqsədi vəziyyət
düzələnə qədər
Misir sultanı Fərəcin yanında sığınacaq tapmaq idi. Sultan Əhməd
də onun ardınca Şama
çatmışdır.
Hadisələrin canlı şahidi
Nizaməddin Şaminin
salnaməsinə istinadən
Əmir Teymur Misir sultanı Fərəcin yanına elçi göndərərək
Qara Yusifin edam edilməsini, Sultan Əhmədin onun yanına göndərməsini
əmr etmişdir. Salnaməçi Həsən
bəy Rumlu da Əmir Teymurun
Qara Yusif haqqında çıxartdığı
ölüm hökmü
barədə yazmışdır:
“Əgər sultan bizim
sevgimizə layiq isə, Qara Yusufu öldürsün və sultan Əhmədi də bağlayıb dünyanın sığındığı
yer olan dərgahımıza göndərsin”
Qara Yusif Azərbaycanın dövlətçılık
tarixində öz sözünü demiş tarixi şəxsiyyətdir.
Tarixi salnamələrdə “güclü
və əzəmətli
əmr” adlandırılmış
Qara Yusif görkəmcə hündürboy,
sağlam, qüvvətli
şəxs kimi təsvir edilmişdir.
Qara Yusif təbiət etibarı ilə mərd, ürəkli, verdiyi sözə sadiq hökmdar kimi xatırlanmışdır.
O, orta əsrlərə
aid mənbələrdə düşmən ordusunun zəif cəhətlərini
öyrəndikdən sonra
hərbi əməliyyatlar
aparmış təcrübəli,
ağıllı sərkərdə
kimi göstərilmişdir.
Qara Yusif öz dövlətini
qurduqdan sonra güclü ordu yaratmış, ölkədə
quruculuq, abadlıq işləri aparmışdır.
Tarixi qaynaqlara istinadən belə qənaətə gəlmək mümkündür
ki, Qara Yusif Əmir Teymurun qorxduğu, ehtiyat etdiyi ağıllı dövlət
adamı, təcrübəli
sərkərdə idi.
Qüdrətli hökmdar Qara
Yusifin nə vaxtsa onun yaratdığı
dövlətə problemlər
ya-radacağından qorxduğu
üçün rəqibinin
ölümünü istəmişdir.
Onun İldırım Bəyaziddən,
Sultan Fərəcdən Sultan Əhmədin onun yanına göndərməsini,
Qara Yusifin edamını tələb
etməsi təsadüfi
deyildir. Əmir Teymur
Sultan Əhmədin onun
dövlətinə təhlükə
olmadığını bildiyi
üçün Cəlairi
hökmdarını sağ-salamat
istəmişdir. Hakimiyyəti boyu Sultan Əhmədi özünə rəqib hesab etməmiş hökmdar Qara Yusif haqqında belə düşünməmişdir.
O, Qara Yusifin yolda igidliyi, qoçaqlığı sayəsində
qaça biləcəyindən
ehtiyat etdiyi üçün türk sultanlarından onun edamını tələb
etmişdir. Ağıllı Əmir Teymur
Qaraqoyunlu dövlətinin
qurucusu haqqında dü-şüncəsində yanılmamışdır.
Qara Yusifi türk tarixində diqqəti çəkən şəxsiyyətlərdən
biri hesab etmiş Faruq Sümər onun təcrübəli hərbçi
olmasını yazmışdır.
Müəllifin gəldiyi qənaətə
görə onun cəsarətinə, igidliyinə
təkcə əsgərləri
deyil, Cağataylar başda olmaqla bütün düşmənləri
heyran idi.
Salnaməçi Həsən bəy Rumlu Qara Yusifin
şəxsiyyətinə ehtiramla
yanaşmış, onun
hökmdarlıq fəaliyyətinə
yüksək qiymət
vermişdir. O, Qara Yusifin dövrü haqqında yazmışdır
ki, Qara Yusif müharibə meydanında qan içən bir aslan, əyləncə məclisində isə cövhər saçan bir bulud idi.
Ədalətli, mərhəmətli olması ilə tanınmış, əxlaqı
ilə seçilmişdir.
Zalımların düşməni olmuş, məzlumların
rifahına çalışmışdır.
Ölkəsində sabitliyi, əmin-amanlığı
qorumuş, kənd təsərrüfatının inkişafına
fikir vermişdir.
Əsgərlərin maaş və ərzaqlarını vaxtlı-vaxtında
vermişdir.
Misir sultanı
Fərəc Əmir Teymurun tələbindən
ehtiyat etdiyi üçün Şam naibinə Qara Yusiflə Sultan Əhmədin
həbs edilməsi tapşırığını vermişdir. Qara Yusif bir neçə
il Şamda
həbsxana həyatı
yaşamalı olmuşdur.
Qara Yusif Şamda yaşadığı
dövrdə Sultan Əhməd
də onun yanında idi. O, Əmir
Teymurun ölüm xəbərini Şamda yaşadığı zaman
eşitmişdir. Əmir Teymurun
ölümündən sonra
hökmranlıq iddiasında
olan varisləri arasında baş vermiş daxili çəkişmələr qüdrətli
Teymurilər dövlətini
zəiflətmişdir. Teymurilərin zəifləməsindən istifadə etmiş Qara Yusif bir
neçə döyüşdə
onlara qələbə
çalmışdır. Əsas həlledici döyüş
1408-ci ildə Təbriz
yaxınlığında Səridurud
adlanan ərazidə baş vermiş, Əmir Teymurun oğlu Miranşah öldürülmüşdür.
Qara Yusif Şamda həbsxana həyatı yaşadığı
illərdə Cəlairi
Sultan Əhmədlə anlaşma
bağlamışdır. Bu anlaşmaya görə, Azərbaycanı qaraqoyunlular,
İraqı isə cəlairilər idarə etməli idi. Lakin Qaraqoyunlu dövləti yarandıqdan sonra Sultan Əhməd Şirvanşah
I İbrahimin təhrikiylə
Qara Yusifə xəyanət etmiş, məğlub olaraq, öldürülmüşdür. Qara Yusif Şirvanşah I İbrahimə qələbə
çalıb onu özündən asılı
etmişdir.
Qara Yusif hakimiyyəti dövründə
Qaraqoyunlu dövlətinin
möhkəmlənməsinə çalışmışdır. Onun hakimiyyətinin
son illərində Mərkəzi
Asiya və İranda hökmranlıq etmiş Əmir Teymurun oğlu Şahrux Mirzə 1418-1420 illərdə Azərbaycana
uğursuz hərbi yürüşlər etmişdir.
Qara Yusif Teymuri hökmdarı
Şahrux Mirzə ilə müharibə apardığı zaman Təbriz yaxınlığında
Ucan adlanan yerdə 13 noyabr 1420-ci ildə vəfat etmişdir.
Beləliklə, Qara Yusif tərəfindən
1410-cu ildə mərkəzi
Təbriz şəhəri
olan Qara-qoyunlu dövlətinin əsası
qoyulmuşdur. Qara Yusifin qurduğu Qaraqoyunlu dövləti Kür çayından Cənubi Azərbaycandan başqa Ərməniyyə,
Qərbi İran, İraq, Gürcüstanın
bir hissəsi və s. əraziləri də əhatə etdiyi üçün böyük imperiya sayıla bilər. Qaraqoyunlu dövləti 58 il öz
varlığını qoruyub
saxlaya bilmişdir.
Qaraqoyunlu dövlətində ən
yüksək mənsəb
sahiblərinin, dövlət
başçılarının azərbaycanlılardan (əsasən
Baharlı tayfasından)
ibarət olması bu dövləti həmin əra-zidə yerləşmiş bir sıra əvvəlki dövlətlərdən fərqləndirir. Rəsmi
dövlət sənədləri
fars dilində
yazılsa da, professor Cəfər İbrahimovun qeyd etdiyi kimi,
dövlət sarayına
daxil olan Azərbaycan şairləri
ana dillərində dəyərli əsərlər
yaradırdılar. Qaraqoyunlu dövləti
aparatında güclü
milli əhval-ruhiyyə
özünü büruzə
verir bu da sonrakı dövrlərdə daha geniş vüsət alırdı. Akademik Həmid
Araslı əsaslı
şəkildə XV əsrdə
Azərbaycan ədəbi-bədii
dilinin möhkəmləndiyini,
inkişaf etdiyini göstərmişdir.
Bu il görkəmli
dövlət xadimi, Qaraqoyunlu dövlətinin yaradıcısı Qara Yusifin anadan olmasının 660 ili tamam olur. Azərbaycanın Ağqoyunlular və Səfəvilər dövründə
yüksək tərəqqiyə
çatması məhz
Qara Yusifin qurduğu Qaraqoyunlu dövləti zamanında təşəkkül tapmış
ənənələrin inkişafının
nəticəsidir.
Orxan Zakiroğlu (Baharlı)
tədqiqatçı-jurnalist
Təzadlar.- 2015.- 24 noyabr.- S15