Elmi dünyanı dolaşan, özü Qarabağı gəzə bilməyən alim

Rafiq Əliyev: "Ən böyük istəyim, arzum hər qarışı mənim üçün müqəddəs və əziz olan Qarabağımı azad, ölkəmi bütöv görməkdir"

- Rafiq müəllim, bildiyimizə görə, ötən ildə ABŞ, Almaniya, Kipr və başqa ölkələrdə elmi-tədqiqatlar aparmış, mühazirələr oxumuş, elmi seminarlar keçirmisiniz. ABŞ-dan başlayaq. Məruzələriniz, seminarlarınız necə keçdi?

- 15 ildən çoxdur ki, ABŞ-ın Corciya Dövlət Universitetinin və Kaliforniyadakı Berkli Universitetinin alimləri ilə birlikdə elmi araşdırmalar aparırıq. 1999-cu ildə Corciya Dövlət Universitetinin professoru seçiləndən sonra bu Universitetdə mütəmadi olaraq postmodern texnologiyalar sahəsində, qeyri-səlis iqtisadiyyat sahəsində araşdırmalar aparmışıq, "Biznesdə və iqtisadiyyatda yeni texnologiyalar" adlı xüsusi kurs oxumuşam. Müasir informasiya texnologiyaları sahəsində professor və müəllimlər, tədqiqatçılar və tələbələr üçün seminarlar keçirmişəm. ötən ilə gəlincə, Corciya Dövlət Universitetindən olan həmkarlarımla qeyri-səlis iqtisadiyyat sahəsində apardığımız nəticələri müzakirə etmiş, onları ABŞ-da geniş elmi ictimayyətlə tanış etmiş və bəzi nəticələrimizi çap etdirmişik.

Ötən ilin aprel ayında Berkli Universitetində professor L.Zadənin rəhbərliyi altında keçirilən beynəlxalq seminarda "Davranış iqtisadi sistemlərdə qeyri-səlis qərarların təhlili və idarəetmə" mövzusunda çıxış etdik, bu sahədə alınan elmi nəticələrimizlə Berkli Universitetinin və Avropa, Kanada, Cənubi Koreya, Türkiyə, Hindistan və başqa ölkələrin alimlərini tanış etdik, fikir mübadiləsi apardıq. Seminardan sonra professor L.Zadə öz fikirlərini elektron poçtu vasitəsilə göndərdiyi məktubda belə ifadə etdi: "Əzizim Rafiq, səni Berklidə görməyimdən və son elmi nəticələrinlə tanış olmağımdan məmnunluq duydum. Sənin seminardakı mühazirən hər bir nöqteyi-nəzərdən əla idi. Sən dərin təfəkkür sahibi, həqiqi alimsən. Elm dünyasının, o cümlədən Soft Computing dünyasının sənin biliyinə və təcrübənə ehtiyacı var...

Dərin hörmətlə: L.Zadə"

- Rafiq müəllim, Sizin son illər L.Zadə və Corciya Dövlət Universitetinin alimləri ilə birlikdə məşğul olduğunuz sahələrdən biri qeyri-səlis iqtisadi nəzəriyyənin yaradılmasıdır. Bu barədə oxucularımıza məlumat verə bilərsinizmi?

- XIX əsrdən bəri iqtisad elminin inkişafını izləyəndə görürük ki, onun əsasında dəqiq və riyazi əsaslandırılmış aksiomatik nəzəriyyə durmasına baxmayaraq, iqtisadi reallıqlarla iqtisadi nəzəriyyə əsasında verilmiş hesablamaların, proqnozların arasında bir uçurum var. Bunun əsas səbəbi iqtisadi reallıqların modelləşdirilməsinin (hər bir nəzəriyyə reallığın modelini özündə təcəssüm etdirir) klassik dəqiq riyaziyyata əsaslanmasıdır.

Biz, müasir görkəmli dünya iqtisadçı alimləri, Nobel mükafatı laureatları G.Akerlof, D.Kaheman və başqalarına istinadən göstərmişik ki, klassik və neoklassik iqtisadi nəzəriyyələrin əsasında duran standart elmi fərziyyələr - bütün insanlar rasionaldırlar və ancaq öz məqsədlərini güdəndirlər - qənaətbəxş deyildir.

Real həyata yaxın olan, yuxarıda göstərilən uçurumu aradan qaldıra bilən yeni iqtisadi nəzəriyyə, mərkəzində insan duran sistem kimi baxılmalı olan iqtisadiyyatda iştirak edən agentlərin (institutların, təşkilatların, qərar qəbul edən insanların) motivasiyalarını, intuisiyalarını, sosial normalarını, emosiyalarını, başqa sözlə, davranış normalarını nəzərə almalıdır.

İqtisadi və sosial-iqtisadi aləm elə mürəkkəbdir ki, onu klassik riyaziyyatın və bivalent Aristotel məntiqinin dilində təsvir etmək mümkün deyil. İqtisadi reallıqları düzgün, adekvat nəzərə ala bilməyimiz üçün bizim daha səmərəli modelləşmə dilinə ehtiyacımız var. Biz belə qənaətə gəlirik ki, iqtisadi, sosial və siyasi sistemlərin modelləşdirilməsi dili qeyri-səlis məntiqə əsaslanan dil olmalıdır (bu dil təbii dilə çox yaxındır).

Yuxarıda qeyd etdiyimiz kimi, iqtisadi sistem insan yönümlü (human centric) və informasiyanın mövcudluğu baxımından yüksək qeyri-müəyyənliklə səciyyələnən realistik çoxagentli sistem kimi baxılır və iqtisadi agentlərin davranışının modelləşdirilməsi qeyri-səlis məntiqi dilə əsaslanır.

Bizim tədqiqatlarımızda əsas vurğu iqtisadi sistemlərdə qərar qəbul edənlərin yeni faydalılıq funksiyasının qurulma prinsiplərinə qoyulmuşdur. Faydalılıq funksiyası bu tədqiqatlarda klassik yanaşmadan fərqli olaraq tək istehsalçının gəlirinin artırılması və ya istehlakçının verilmiş büdcə daxilində şəxsi faydalılığının maksimallaşdırılmasını nəzərdə tutmur. Təklif olunan yeni faydalılıq funksiyası qərar qəbul edənin faydalılıq funksiyasında, eyni zamanda başqasının mənafeyini, iqtisadi agentlərin dürüstlük (vicdanlılıq), mədəniyyət, emosiya və başqa davranış faktorlarını nəzərə almağa imkan verir.

Onu qeyd etmək istərdim ki, ABŞ iqtisadiyyatının dirçəlməsi baxımından ABŞ-ın yeni prezidenti Barak Obamanın son çıxışında göstərdiyi tədbirlər yuxarıda göstərdiyimiz ilə həmahəngdir.

Təklif olunmuş nəzəri müddəalar qeyri-səlis riyazi yanaşma, daha doğrusu, L.Zadə, R.Əliyev (ALİ-1, ALİ-2) və Mamdani məntiqləri tətbiq olunmaqla real praktiki məsələlərə tətbiq olunmuşdur.

- Bu sahədəki elmi nəticələriniz harada çap olunub?

- Qeyri-səlis iqtisadiyyat sahəsində aldığımız nəticələr ABŞ-da, Almaniyada, Finlandiyada, Azərbaycanda və başqa ölkələrdə dərc olunmuşdur. Onu da qeyd edim ki, "Fuzzy Economics" (Qeyri-səlis İqtisadiyyat) kitabımız dünyanın məşhur nəşiriyyatı olan "Springer Verlag" da ötən il çapa qəbul olunmuşdur.

Bu mövzuda ötən ilin oktyabr-dekabr aylarında Almaniyada Bonn və Axen universitetlərində, Avropanın Yulixdə olan məşhur elm mərkəzində, Finlandiyanın Helsinki Universitetində çıxışlarım olub və fikir mübadiləsi aparmışam.

- Almaniya qəzetləri ötən ilin dekabr ayında sizin müsahibənizi çap etmişdi. Bu müsahibədə hansı məsələlərə toxunulmuşdu?

- Almaniyanın Zigen Universitetinin rəhbərliyinin və professorlarının xahişi ilə mən bu Universitetin seminarlarında "Qeyri-səlis iqtisadiyyata giriş" mövzusunda məruzə ilə çıxış etdim. Hələ seminardan bir ay öncə universitetlərdə və eyni zamanda İnternetdə bu barədə elan verilmişdi. Seminarda professorlar, müəllimlər, məmurlar, tədqiqatçılar və tələbələr iştirak edirdi. Seminardan sonra jurnalistlər müsahibə verməyimi xahiş etdilər və bir gün sonra bu müsahibə çap olundu. Əsas suallar qeyri-səlis iqtisadiyyatın lazımlığı, əsas prinsipləri, fərqli cəhətləri barədə idi. Verilən sualların bir hissəsi isə ümumdünya maliyyə böhranı ilə əlaqədar idi. Mən deyəndə ki, bu siyasi və iqtisadi böhranın dayanması üçün ən azı 2-3 il lazım gələcək jurnalist xanım iki əli ilə başını tutdu.

- Biz Sizin və başqa dünya alimlərinin bu ümumdünya böhranı haqqında fikirlərinizi "Təzadlar" qəzetində bir neçə ay müddətində dərc etmişik. Sizin fikirlərinizə yenidən qayıtmaq istərdik.

- Ötən ilin ortalarindan başlayaraq dünya alimləri və praktikləri İnternetdə Berkli Universitetinin təşəbbüsü ilə müzkirələr keçirir. çox sevindirici haldır ki, respublika mediasında Sizin "Təzadlar" qəzeti ilk olaraq və mütəmadi olaraq bu müzakirələri və başqa mütəxəsislərin fikirlərini işıqlandırmışdır. Biz bu böhrani siyasi və iqtisadi böhran kimi səciyyələndiririk. O müzakirələrdə təmsil olunan fikirlərdən biri kimi mənim fikrimi və təkliflərimi və eyni zamanda onlara olan cavabları təkrar etmək istərdim.

Mən yazmışdım ki, üzləşdiyimiz böhranın əsas səbəbi dünya iqtisadiyyatında olan iqtisadi, maliyyə agentlərinin qarşılıqlı əlaqəsinin yüksəldiyi bir şəraitdə onlar arasında koordinasiyanın zəif səviyyədə olmasıdır. Onu da qeyd etmişdim ki, bu böhranın əsas səbəbi olan bu dediklərim bəzi siyasi motivlərlə müşayiət olunur.

İkinci dominant səbəb, mənim fikrimcə, mövcud iqtisadi nəzəriyyənin qeyri-müəyyən, çox əlaqəli və mürəkkəb iqtisadi dünyamıza adekvat olmamasıdır.

Düşünürəm ki, aşağıdakı ideyalar üzləşdiyimiz böhranla mübarizə aparmağımız üçün faydalı ola bilər. Əvvəla, üzləşdiyimiz böhranın inkişafına uyğun müxtəlif dərəcəli koordinasiyası (demokratiyası) olan ssenarilər qurulmalı, bu ssenarilər eqoistik yox, alturistik iqtisadi yanaşmalara əsaslanmalıdır və bu ssenarilərdə tək ABŞ, Avropa yox çin, Hindistan, Rusiya, Meksika, İran və başqa ölkələr iqtisadi agentlər kimi nəzərdə tutulmalıdır. İkincisi, dünyanın seçilmiş alimlərinin, iqtisadiyyat və maliyə mərkəzlərinin iştirakı ilə dünya maliyyə institutlarının koordinasiyası üçün multi-agentli iqtisadi model qurulmalıdır. Bu model üzləşdiyimiz qeyri-səlis, qeyri-müəyyən və xaotik iqtisadi situasiyaya adekvat olmalıdır.

Nəhayət, böhranın dayandırılması üşün maliyyə institutlarının davranışını, özü də dinamik, xaotik və qeyri-müəyyən davranışının dayanıqlıq problemini həll etmək lazımdır. Bu məsələdə professor L.Zadə (ABŞ), professor W.Pedrycz (Kanada) və bizim tərəfimizdən təklif olunmuş "Mürəkkəb qeyri-müəyyən dinamik sistemlərin ümumiləşmiş dayanıqlıq nəzəriyyəsi" istifadə oluna bilər.

***

Bir çox alimlər bu təkliflərə öz fikirlərini bildirmişdilər. Amerikalı alim A.Silverman yazır: "Rafiq, mən razıyam. Siz siyasətdən yaxa qurtara bilməzsiniz. Mən həmçinin onunla da razıyam ki, Siz deyirsiniz:

Mən düşünürəm ki, bizim rast gəldiyimiz böhranın aradan qaldırılması planında bəzi irəli sürülmüş idealar səmərəli ola bilər, yəni müxtəlif dərəcəli demokratiyada (koordinasiyada) bu böhranın inkişafının müxtəlif ssenarisinə baxmaq, buraya altruistik iqtisadi yanaşmanın (eqoizm hissi olmayan yanaşma) və həmçinin nəinki ABŞ və Avropanı, həm də çin, Hindistan, Rusiya, Meksika, İran və s. ölkələri daxil etmək olar.

Beynəlxalq maliyyə institutlarının multiagent modelini (buraya müxtəlif ölkələrdən alimləri daxil etmək olar) yaratmaq lazımdır, hansı ki, real, qeyri-səlis, xaotik, ideallardan uzaq olan bizim üzləşdiyimiz situasiyaya adekvat ola bilsin.

Ola bilər ki, alimlər bir o qədər yox, forumlar elmi metod və prinsipləri ciddi surətdə tətbiq edirlər. Həmçinin, mən "alturizmə" əmin deyiləm. özü-özünü həvəsləndirmək və bu parametrlər çərçivəsində işləmək lazımdır...

Mənim Almaniya qəzetində çıxan müsahibəm aşağıdakı sözlərlə bitir: "Bu böhranda əsas itirilən pul deyil, inamdır".

- Görünür ki, ötən 2008-ci il yaradıcılıq baxımından Sizin üçün çox gərgin olub. Bu ötən ildə ən böyük uğurunuz kimi nəyi sayırsınız?

- Tək ötən ildə deyil, ümumiyyətlə, elmlə məşğul olduğum 45 ildə ən əsas nəticələrimdən biri kimi keçən il dünyanın ən mötəbər istinad indeksli jurnallarindan biri olan "IEEE SMC Transactions"da çap olunan ümumiləşdirilmiş dayanıqlıq nəzəriyyəsini sayıram. Bu jurnalda dərc olunan məqalələr bir qayda olaraq dünyada 4-5 nüfuzlu alimin anonim rəyindən sonra çap olunur. 35 səhifəlik məqalədə çap olunan bu nəzəriyyənin mahiyyəti nədir?

Düz 120 ildir ki, bütün dünya iqtisadi, siyasi, texniki sistemlərin dayanıqlıq problemini araşdırır. Yəni baxılan sistem tarazlığını itirəcəkmi, xaosa gedəcək, yoxsa müəyyən bir yerdə qərarlaşacaq?

Bu günə qədər bu prosesi rus alimi Lyapunovun nəzəriyyəsi ilə öyrənirdilər, bəzən də Lipşits yanaşması istifadə olunurdu. Klassiklər qarşısında bizdə qorxu yoxdur, yəni klassiklər öz işlərini görüblər. Bu gün problemlərə daha real yanaşmaq lazımdır. Bu işdə dinamik sistemlərin ümumiləşdirilmiş dayanıqlıq nəzəriyyəsi təklif olunmuş, yeni dayanıqlıq tərifi (Zadə-Əliyev tərifi) verilmişdir. Qeyri-səlis differensial tənliklərlə yazılan dinamik sistemlərin dayanıqlıq meyarı formalaşdırılmış, müvafiq teoremlər verilib isbat olunmuşdur.

Dünya alimlərinin - rəyçilərinin bu nəzəriyyə haqqında qısa fikirlərini Sizə çatdırmaq istərdim. Bu nəzəriyyə dayanıqlıq probleminin ümumiləşmiş nəzəriyyəsini verir, həm də tək riyazi mənada yox, eyni zamanda praktik baxımdan. Başqa bir alimin fikrində deyilir: bu nəzəriyyədə qeyri-səlis dayanıqlığın təməl konsepsiyaları və geniş sinif dinamik sistemlər üçün əsas meyarları elmə daxil edilmişdir. Bu nəzriyyə yeni bir anlayış - linqvistik dayanıqlıq anlayışını təklif edir. Başqa rəylərdə göstərilir ki, təklif olunan nəzəriyyə qeyri-səlis məntiq əsasında dayanıqlıq nəzəriyyələrinin necə fundamental əsasa gətirmək olar ideyasını ortaya qoyur. Təklif olunan elmi nəticələr qeyri-səlis diferensial tənliklərlə modelləşdirilən sistemlərin yeni dayanıqlıq nəzəriyyəsidir. Indi biz bu nəzəriyyənin köməyi ilə mürəkkəb iqtisadi, sosial-iqtisadi və texniki sistemlərin dayanıqlığı məsələləri ilə məşğuluq.

- Siz elmi nəticələrinizi adətən hansı jurnallarda çap etdirirsiniz?

- Bir qayda olaraq mən elmi məqalələrimi istinad indeksli beynəlxalq jurnallarda dərc etdirirəm. ötən ildə mənim "Qeyri-səlis iqtisadiyyatda modelləşdirmə və dayanıqlığın analizi" (Modelling and stability analysis in fuzzy economics) (Applied and Computational Mathematics); "Məntiqi qaydaların alınması üşün dinamik verilənlərin çıxarılması" (Dynamic data mining technique for rules extraction) (Applied Soft Computing); "Qeyri-səlis neyron şəbəkələri əsasında linqivistik zaman sıralarının proqnozlaşdırılması" (Linguistic time series forecasting using fuzzy recurrent neural network) (Soft Computing); "ümumilşdirilmiş dayanıqlıq nəzəriyyəsinin əsasları" (Fundamentals of a fuzzy logic based generalized theory of stability) (İEEE SMC Transactions); "Qeyri-səlis hesablamalar üçün məntiqi neyron şəbəkələri" (Logic-Oriented Neural Networks) (Neurocomputing, Elsevier); "Qeyri-səlis neyron şəbəkələrinin öyrənilməsi üçün təkamül alqoritmləri" (Evolutionary Algorithm-Based Learning of Fuzzy Neural Networks) (Fuzzy Sets and Systems, Elsevier) və s. məqalələrim dərc olunmuşdu.

Bəzən bir məqalənin çapı üçün 2-3 il gözləmək lazım gəlir. Lakin düşünəndə ki, bu jurnallar yüksək impakt göstəricisi olan jurnallardır, onda gözləməyə dəyər.

- Mətbuatdan oxuduğumuza görə, dünyanın müxtəlif ölkələrində 70-ə yaxın kitablarınız dərc olunub. ötən ildə də kitablarınız çıxıbmı?

- Kitablarımın sayının çox olması, birinci növbədə, elmi araşdırmalarımızın çoxşaxəli və coğrafi baxımdan paylanmış olmasındadır. Digər tərəfdən, dünya nəşriyyatlarının müraciəti ilə əlaqədardır. Hər dəfə etiraz etmək olmur. Keçən ildə də çıxan "Rekkurent qeyri-səlis neyron şəbəkələri" (Recurrent Fuzzy Neural Networks and Their Performance Analysis, IN-TECH) kitabımızı Avstrıyalı həmkarlarımızın xahişi ilə birlikdə yazmışıq.

Bu kitabda postmodern informasiya texnologiyasının əsasında duran qeyri-səlis neyron hesablamalarının nəzəri və tətbiqi problemlərinə baxılmışdır. Kitab ABŞ, Şimali Kipr, Avstriya və başqa ölkələrdən olan alimlər ilə birgə yazılmışdır.

Bundan əlavə, redaktəmiz altında "Qeyri-səlis sistemlərin və Soft Kompütinqin tətbiqi" (Application of Fuzzy Systems and Soft Computing) "Intelligent Systems for Industrial Automation" kitabları "b-Quadrat Verlag", Almaniya nəşriyyatında dərc olunmuşdur.

- Siz hər il dünyanın bu və ya digər ölkələrində öz sahənizdə olan alimləri bir yerə yığırsınız. ötən ildə belə beynəlxalq konfranslar keçirdinizmi?

- Qeyri-səlis sistemlər və Soft Kompütinq üzrə 8-ci benəlxalq konfransı ötən ilin 1-3 sentyabrında Finlandiyada Helsinki şəhərində keçirdik. Dünyanın müxtəlif ölkələrindən başda professor L.Zadə olmaqla xeyli seçilib-sayılan alimləri bu konfransda iştirak edirdilər. Elmin bu sahəsinin indiki durumu və perspektiv inkişafı geniş müzakirə olundu. İntellektual sistemlər üzrə ənənəvi 5-ci beynəlxalq konfrans Səmərqənd şəhərində keçirildi və avtomatlaşdırmanın intellektuallaşdırılması sahəsində geniş fikir mübadiləsi aparıldı.

- Professor L.Zadə Bakıya ğəldi. Ancaq Siz Bakıda yox idiniz. Vətən nastaljisimi onu Bakıya gətirmişdi?

- Professor L.Zadə Azərbaycanı çox sevir. Burada doğulmuş, uşaqlıq illəri Bakıda keçmişdir. Təbii ki, Azərbaycan və azərbaycanlılara böyük sayğısı var. Qaldı ki, onunla burada görüşməyimiz, bu adi şeydir. Biz ildə bir neçə dəfə onunla görüşür, elmi işlərimizi müzakirə edir, alınmış nəticələrimizi və gələcək işlərimizi müzakirə edirik. Onun Bakı səfəri ilə mənim başqa ölkəyə səfərimin vaxtları üst-üstə düşdü. Biz onunla bunları əvvəlcədən müzakirə etmişdik. Bilirsiniz, bu səfərlərə qiymət vermək üçün qərb və xüsusən Amerika alimlərinin iş, yaradıcılıq üslubunu bilmək lazımdır. Onları əsasən üç şey maraqlandırır. Birincisi, elm və real həyat üçün vacib olan yeni ideyaların qenerasiyası. İkincisi, bu ideyaları işləyib həyata keçirmək üçün maddi təminat. üçüncüsü, yeni elmi ideyaları anlayan, yüksək intellektə və iş qabiliyyətinə malik olan əməkdaşlardan ibarət qarşılıqlı uyarlı kollektivin yaradılması və demokratik idarə olunması. L.Zadə də sırf qərb alimidir.

O, Bakıdan Berkliyə qayıdan gün mənə Almaniyaya telefon açdı, Bakıda oxuduğu orta məktəbdəki görüşündən çox məmnun olduğunu, bu görüşün ona böyük təsir etdiyini söylədi.

- Bu sual ənənəvi sualdır. Gələcək işləriniz?

- Əsas iki elmi istiqaməti qeyd etmək istərdim. Birinci: qeyri-səlis iqtisadiyyat sahəsində araşdırmalarımızı davam etdirəcəyik. Burada əsas məsələ dünya iqtisadçı alimlərin elmi rəğbətini qazanmaqdır.

İkinci istiqamət ikinci tərtib qeyri-müəyyənliyi nəzərə ala bilən qərar qəbuletmə və idarəetmə nəzəriyyəsinin yaradılmasıdır. Bu nəzəriyyə bizim və Berkli Universitetinin birgə elmi kontraktı əsasında aparılır. İkinci tərtib qeyri-müəyyənliyi nəzərə alan iki problemi həll edəcəyik: ikinci tərtib qeyri-səlis və qeyri-səlis-ehtimal qeyri-müəyyənliklərini nəzərə ala biləcəyik.

- Qeyri-səlis iqtisadiyyat, yeni dayanıqlıq nəzəriyyəsi və onun iqtisadi, sosial-iqtisadi sistemlərə tətbiqi, Berkli və Corciya Dövlət universitetləri, almaniyalı həmkarlarınızla apardığımız elmi araşdırmalar və əldə etdiyimiz nəticələr Nobel mükafatına aparan bir cığır ola bilərmi?

- Bunu zaman göstərər, bir də bu sahədə olan dünya alimlərinin fikri.

- Həyatda ən böyük arzunuz?

- Təbii ki, ən böyük istəyim, arzum hər qarışı mənim üçün müqəddəs və əziz olan Qarabağımı azad, ölkəmi bütöv görməkdir. Mənim üçün ötən ildə ən yadda qalan bir ismarıc elə bu arzum ilə əlqədardır. Şəxsiyyətinə və yaradıcılığına böyük hörmət bəslədiyim Qabil Abbasoğlu mənim "Azadlıq" radiosunun "Tanınmışlar" rubrikasındakı çıxışımı dinləyərək yazmışdı: "Radioda Sizi dinlədim. Dinləməyə adamımız çoxdu, amma yaxşı ki, öyrənməyə bir adamımız var - Rafiq Əliyev! Mən ALİMin öldüyünə inanmıram, amma nə vaxtsa bu dünyada olmayacaqsınızsa, o yanğı ki, Sizdə var, Allahdan o lütfi diləyirəm, övladlarınızın çiynində Novruzlu qəbiristanlığına gedə biləsiniz.

Elbar ŞİRİNOV

Təzadlar.- 2009.- 12-14 fevral.- S. 9-10.