Dillər Universitetində İtalyan Dili Mərkəzi açıldı

Tədbirdə İtaliya xarici işlər nazirinin müavini də iştirak edirdi

Martın 3-də Azərbaycan Dillər Universitetində (ADU) İtaliyan Dili Mərkəzinin açılışı oldu. Tədbirdə İtaliya xarici işlər nazirinin müavini Alfredo Mantika, İtaliyanın Azərbaycandakı səfiri Jan Luici Maşa, onun xanımı Marinella Maşa və universitetin rektoru, millət vəkili Səməd Seyidov iştirak edirdilər.

Tədbir iştirakçılarını salamlayan ADU-nun rektoru, professor Səməd Seyidov italyan dilinin universitetdə 2001-ci ildən tədris olunduğunu bildirdi. Onun sözlərinə görə, hazırda italyan dili tərcüməçiləri bölməsində bakalavrlar və bir neçə magistr təhsil alır.

Açılış mərasimində çıxış edən İtalya xarici işlər nazirinin müavini Alfredo Mantika Azəpbaycan-İtalya əlaqələrini yüksək qiymətləndirərək, mərkəzin açılışının əlamətdar hadisə olduğunu qeyd etdi və bu tədbirdə iştirakdan məmnunluğunu bildirdi: "İtalyan Dili Mərkəzinin açılışında iştirak etdiyimə çox şadam. Yaxşı haldır ki, mərkəzin açılışı səfərimlə eyni vaxta təsadüf etdi, çünki italyan dilini təbliğ etmək, yaymaq mənim səlahiyyətlərimə aiddir. ümid edirəm ki, tələbələr bu mərkəzin köməyi ilə xalqımızın tarixi və mədəniyyəti ilə daha yaxından tanış olacaqlar. Sizə uğurlar arzulayıram".

İtaliyanın Azərbaycandakı səfiri xanım Marinella Maşa da mərkəzin yaradılmasının əhəmiyyətinə toxundu: "Azərbaycan Dillər Universitetində italyan dili kafedrası fəaliyyət göstərir. Burada gələcəyin tərcüməçiləri yetişir. Biz istədik ki, gənclər bizim ölkəmiz haqqında daha dolğun biliyə malik olsunlar. Bu yeni açılan mərkəz onlara yaxından köməklik göstərəcək. Mərkəzdə azərbaycanlı müəllimlərlə yanaşı, İtaliyadan dəvət olunmuş mütəxəssislər də dərs deyəcək. Gənclər İtaliyanın mədəniyyəti, tarixi haqqında da ətraflı məlumat alacaqlar".

Dillər Universitetində açılan İtalyan Dili Mərkəzinə və italyan dili kafedrasına rəhbərlik edən xanım Marinella onu da vurğuladı ki, italyan dilini mükəmməl öyrənmək istəyən hər bir kəs mərkəzə gələ bilər.

Tədbirdə o da qeyd olundu ki, mərkəzdə toplanan bədii və publisistik kitablar İtaliyadan gətirilib.

Qonaqlar açılış mərasimindən sonra universitetin rektoru, professor Səməd Seyidovla və tələbələrlə görüşdülər. Görüşdə İtalyan Dili Mərkəzinin fəaliyyətinin necə qurulacağı barədə müzakirələr aparıldı, qonaqlar tələbələrin suallarını cavablandırdılar.

Qeyd edək ki, Azərbaycan Dillər Universitetində Jorj Sand adına fransız dili mərkəzi, Amerika mərkəzi, Britaniya mərkəzi və Skandinaviya dillər mərkəzi də fəaliyyət göstərir.

Elbar Şirinov

Təzadlar.- 2009.- 5-7 mart.- S. 14.