Azərbaycanda ilk dəfə Milli Kitab Mükafatı təsis olundu

Noyabrın 3-də M.F.Axundov adına Milli Kitabxanada Azərbaycan ictimaiyyətinin diqqətini çəkən tədbir düzənləndi. Daha doğrusu, müasir Azərbaycan ədəbiyyatının inkişafına yönəlmiş Milli Kitab Mükafatının təqdimat mərasimi oldu. Təqdimat mərasimində mədəniyyət və turizm naziri Əbülfəz Qarayev başda olmaqla, ölkəmizin tanınmış ziyalıları və dəyərli insanlar, media rəhbərləri iştirak edirdilər.

Tədbiri açan mədəniyyət və turizm naziri Əbülfəz Qarayev yeni təsisçilik münasibəti ilə bütün kitabsevərləri təbrik etdi. O, bu mükafatın gələcəkdə kitab mədəniyyətinin daha yeni səhifələr və uğurlarla zənginləşəcəyinə ümidvar olduğunu bildirdi.

Sonra söz Milli Kitab Mükafatının təsisçisi, "Əli və Nino" Nəşriyyat evinin sahibəsi Nigar Köçərliyə verildi. Xanım Nigar Köçərli layihənin məqsədləri barədə danışdı və bildirdi ki, məqsəd ictimaiyyətin diqqətini Azərbaycan ədəbiyyatına cəlb etmək, müasir ədəbiyyatımızın sosial önəmini artırmaq və ədəbiyyatımızı zəngilləşdirəcək əsərləri dərc etməkdir.

"Biz çox ümid edirik ki, bu layihənin həyata keçirilməsi sayəsində milli ədəbiyyatımız üçün inci hesab edilən ədəbi əsərlər yarada biləcək müasir müəlliflərin oxucular üçün "kəşf edilməsi" və stimullaşdırılmasına nail olacağıq. Tarixən Nizamilər, Füzulilər, Ordubadilər, Axundovların vətəni olan ölkəmizin yeni ədəbi dahilərə ehtiyacı var. Əminəm ki, Mədəniyyət və turizm nazirliyinin, Azercell şirkəti və ümumiyyətlə, hamımızın dəstəyi ilə həyata keçəcək bu layihənin sonunda ilk Milli Kitab Mükafatımız sonralar ədəbiyyatımıza Nobel mükafatını bəxş edəcək yazıçıya qismət olacaq"-deyə Nigar Köçərli bildirib.

Azercell Telekom Korporativ ünsiyyət və Sosial Məsuliyyət bölümünün rəhbəri ülviyyə Həsənzade qeyd etdi ki, vətəndaşlarımızın mədəniyyətə qarşı marağını artırmaq, bu sahəyə yatırım etmək Azercell üçün böyük zövqdür.

"Milli ədəbiyyatımızın inkişafına yönəlmiş bu layihənin həyata keçməsində bir çox insanların və qurumların rolu əvəzsizdir. Mədəniyyət və Turizm Nazirliyi və İdman və Gənclər Nazirliyi simasında Azərbaycan hökumətinin dəstəyi ilə baş tutan ilk dəfə keçirilən Milli Kitab Mükafatına inanan və baş sponsorluq edən "Azercell" şirkətinə xüsusi olaraq minnətdaram. Bildiyiniz kimi Azercell Telekom Korporativ Sosial Məsuliyyət mədəniyyətini təbliğ edən, ölkəmizdə qazandıqlarını cəmiyyətimizin inkişafına sərf edən və bu mənada digər biznes strukturları üçün nümunə olan ilk şirkətdir. Baş sponsorla bərabər, "Azersun" və "Qarant Sığorta"-da bu təşəbbüsü dəstəklədiklərinə görə onlara təşəkkürümi bildirirəm" - deyə N.Köçərli dedi...

Qeyd edək ki, Mükafatın münsiflər heyətində Azərbaycan Respublikasının Yazıçılar Birliyinin katibi və Pen-klubun sədri Çingiz Abdullayev, "Oskar" mükafatı laureatı, Kinomatoqrafçılar İttifaqının sədri Rüstəm İbrahimbəyov, Azərbaycan Respublikasının Jurnalistlər Birliyinin sədri Elçin Şıxlı, kinorejissor Ramiz Fətəliyev, yazıçı Vagif Səmədoğlu, millət vəkili Rəbiyyət Aslanova, Yazıçılar Birliyinin katibi Rəşad Məcid, "Xəzər" Universitetinin rektoru Hamlet İsaxanlı, tele-aparıcı Nərgiz Cəlilova, prodüser Balakişi Qasımov və "Muğam" radionun rəhbəri Elnur Baimov təmsil olunur.

Milli Kitab Mükafatının bütün respublikanı əhatə etməsi üçün Təşkilat Komitəsi və Münsiflər Heyəti tarixən ədəbi mərkəzlər sayılan Gəncə, Şamaxı, Naxçıvan, Lənkəran, Şəki və Quba şəhərlərində ətraf rayonlardan da dəvət olunacaq ziyalılarla və gənclərlə görüşlər keçirəcək və layihə barədə məlumat verəcəklər. Həmçinin Bakı Dövlət Universiteti, Bakı Slavyan Universiteti, N.Tusi adına Azərbaycan Pedaqoji Universiteti, Xarici Dillər Universiteti və digər ali məktəblərdə tələbələr qarşısında çıxış edəcəklər.

İlin ən böyük mədəni hadisəsinə çevrilmək iddiasında olan Milli Kitab Mükafatı layihəsi bir neçə mərhələdə həyata keçiriləcək.

"Layihə barədə bütün məlumatlar www.mkm.az internet səhifəsində öz əksini tapıb. Eyni zamanda istəyənlər bu internet resursu vasitəsilə Milli Kitab Mükafatına iddialı olmaları barədə müraciət edə bilərlər və öz əsərlərini göndərə bilərlər",- Nigar Köçərli deyib.

Müsabiqədə hekayələr, povestlər, romanlar və digər ədəbi üslublarda yazılmış nəsr əsərləri qəbul olunacaq. Müsabiqəyə müəllifin vətəndaşlığından asılı olmayaraq azərbaycan dilində yazılmış bütün əsərlər və əsərin dilindən asılı olmayaraq Azərbaycan vətəndaşı tərəfindən yazılmış əsərlər təqdim oluna bilər.

Namizəd əsərlər minimum 40 min çap işarəsi həcmində olmalıdır. Eyni zamanda Milli Kitab Mükafatının təqdimat günündən 10 il əvvəlki müddət ərzində yazılmış əsərlər Münsiflər Heyəti tərəfindən nəzərdən keçiriləcək. Namizəd əsərlərin müəlliflərinə yaş, cins, yaşama yeri və əsərin nəşr olunma yeri üzrə heç bir məhdudiyyət tətbiq olunmayacaq. Əsərləri yalnız müəlliflər təqdim etməlidir və bura həm dərc olunmuş, həm də dərc olunmamış əsərlər daxildir.

Namizəd əsərlər 31 dekabr 2009-cu ilə qədər qəbul olunur. Yanvarın 26-da 20 əsərdən ibarət əsər elan ediləcək və Münsiflər Heyəti bu əsərləri oxuyaraq xüsusi mexanizm vasitəsilə dəyərləndirəcəklər. Fevralın 10-da isə 10 əsərin daxil olduğu kiçik siyahı Milli Kitab Mükafatının rəsmi internet səhifəsində yerləşdiriləcək və arzu edənlər üçün online səsvermə imkanı yaradılacaqdır. May ayının 1-də isə 3 qalibin adı elan olunacaq.

Birinci yerin qalibinə 3,000 manat, ikinci yerin qalibinə 2,000 manat və üçüncü yerin qalibinə isə 1,000 manat həcmində mükafat veriləcək. Ən yaxşı 10 əsər dərc olunaraq dövlət kitabxanalarına və təhsil ocaqlarına paylanılacaq.

Milli Kitab Mükafatı çərçivəsində Azərbaycanın ən dinamik inkişaf edən sığorta şirkəti olan "Qarant Sığorta" xüsusi mükafat elan edir. Milli Kitab Mükafatı layihəsi dövründə sığorta mövzusunda ən maraqlı kiçik hekayə qalibinə 1,000 manat mükafat və mənzilinin 100,000 manat dəyərində sığortası hədiyyə olunacaq.

Gənclər və İdman Nazirliyi isə gənclər arasında ədəbiyyata marağı artırmaq və gənc yazarları dəstəkləmək məqsədilə 1,000 manat dəyərində öz mükafatını təsis edir.

Bütün bunlardan sonra millət vəkili Rəbiyyət Aslanova və digər tanınmış ziyalılar təsis olunan mükafata münasibətini bildirdilər, təsisçiyə uğurlar dilədilər.

Daha sonra jurnalistlərin və digər ziyalıların suallarına aydınlıq gətirildi.

"Təzadlar"ın baş redaktoru Asif Mərzili isə çıxış edərək Milli Kitab Mükafatının təsis olunması münasibəti ilə təsisçini və dəyərli münsiflər heyətini təbrik etdi, həmçinin bir məsələyə də aydınlıq gətirilməsini istədi.

Adından göründüyü kimi, mükafat "Milli Kitab Mükafatı" adlanır. Müəlliflərin əsərlərində mövzu necə seçilməlidir: milli ruha bağlılıq əsas şərt olmalıdır, yoxsa istənilən xalqın, ölkənin həyatına həsr edilə bilər? Çünki bəzi müəlliflər var ki, məsələn, Amerikan, rus, gürcü həyatına müraciət edir,- deyə bildirən Asif Mərzilinin sualına cavab birmənalı olmadı və bildirildi ki, bu barədə münsiflər heyətinin üzvləri seçim edərkən cavab verə biləcəklər...

Qələndər Xaçınçaylı

Təzadlar.- 2009.- 5 noyabr.- S.10.