Milli Qəhrəman anıldı

Təfəkkür Universitetinin akt zalında Azərbaycanın Milli Qəhrəmanı Fazil Umud oğlu Mehdiyevin anım günü keçirildi. 

Qeyd edək ki, F.Mehdiyev 1991-ci il sentyabrın 24-də Ağdamın Abdal-Gülablı kəndində gedən döyüşlərdə qəhrəmancasına həlak olub.

Tədbir "Milli qəhrəman" qəzetinin təşkilatçılığı ilə keçirilib. Anım mərasimində Milli Qəhrəmanın cəbhə yoldaşları, universitetin tələbə və müəllimləri iştirak ediblər.

çıxış edənlər F.Mehdiyevin keçdiyi döyüş yollarından, onun qorxmazlığından danışıblar. Milli Qəhrəmanın anası Şövkət xanımın çıxışı isə bütün iştirakçıları kövrəldib. O, oğlunun Vətən torpağını müdafiə edərkən qəhrəmancasına həlak olmasından qürur duyduğunu qeyd edib.

"Milli qəhrəman" qəzetinin baş redaktoru Mirbəşir Seyidzadə qəhrəmanın döyüş yolundan mərasim iştirakçılarına ətraflı məlumat verib. Tədbirin məhz təhsil ocağında keçirilməsini onunla izah etdi ki, gənclər F.Mehdiyev kimi qəhrəmanları tanısın, Vətəni onun kimi sevsinlər və hər zaman torpaqlarımızı qorumağa, işğaldan azad etməyə hazır olsunlar.

M.Seyidzadə Xətai prospektində Milli Qəhrəmanın xatirəsinə ucaldılmış büstündən danışarkən rastlaşdıqları çətinlikləri, məmur özbaşınalığını da qeyd edib. Bildirib ki, Fazilin valideynləri Nəsimi rayonunda yaşadıqlarından onun büstü həmin rayonda qoyulmalıdır. Buna görə də Nəsimi RİH-ə qəhrəmanın büstü üçün yer ayrılması barədə müraciət olunmuşdu. Məsələnin həlli icra başçısının müavini Zahid müəllimə tapşırılsa da, o, valideynləri aldadaraq, onlardan gizlənib, ümumiyyətlə, bu işə məhəl qoymayıb.

Bunun da nəticəsində Fazilin büstü Xətai rayonunda ucaldılıb.

Tədbirin sonunda şəhid ailəsi adından Azərbaycan Respublikasının Prezidenti İlham Əliyevə müraciət qəbul olunub.

Eldar Əzizli

Təzadlar.- 2009.- 29 sentyabr.- S.3.