Tibb Universiteti beynəlxalq əməkdaşlığı genişləndirir

Dünya Bankı ATU-nun layihələrini dəstəkləyəcək

Azərbaycan Tibb Universitetinin (ATU) rektoru, professor Gəray Gəraybəyli Dünya Bankının Avropa və Mərkəzi Asiya üzrə praktika meneceri Kristian Aedonun rəhbərlik etdiyi nümayəndə heyəti ilə görüşüb.

Rəhbərlik etdiyi ali təhsil müəssisəsi barədə qonaqlara ətraflı məlumat verən G.Gəraybəyli ATU-da tədris sistemində aparılan islahatlardan, təhsilin keyfiyyətinin artırılması istiqamətində fəaliyyətdən danışıb. Beynəlxalq əlaqələrin önəmini vurğulayan rektor qeyd edib ki, fərqli təhsil sistemləri ilə tanışlıq, yeniliklərin tətbiqi tədrisin təkmilləşdirilməsinə yardımçı olur. Bu baxımdan Dünya Bankı ilə müştərək layihələrin həyata keçirilməsi çox əhəmiyyətlidir.

K.Aedo Dünya Bankının təhsil sahəsində gördüyü işlər, dəstəklədiyi proqramlar haqqında məlumat verib. Bildirib ki, təhsil üzrə milli prioritetlərin müzakirəsi və tələbə krediti proqramları üzrə seminarın təşkili məqsədi daşıyan bu səfər zamanı bank təmsilçiləri müvafiq dövlət qurumları, universitet rektorları və digərləri ilə görüşlər keçirirlər.

Sonra ATU-da Dünya Bankının dəstəyi ilə icra oluna biləcək layihələr barədə fikir mübadiləsi aparılıb, əməkdaşlıq sahələrinin araşdırılaraq müəyyənləşdirilməsi qərara alınıb.

Qırğızıstan universiteti ilə əməkdaşlıq

ATU-nun rektoru, professor Gəray Gəraybəylinin daha bir görüşü Qırğızıstan – Türkiyə Manas Universitetinin rektoru, professor Sebahattin Balcı ilə olub.

Rəhbərlik etdiyi universitet barədə geniş məlumat verən S.Balcı bildirib ki, artıq 21 ildir fəaliyyət göstərən bu ali təhsil ocağı Türkiyə və Qırğızıstan hökumətləri arasında bağlanmış sazişə əsasən yaradılıb. Universitetin 9 fakültəsində təhsil alan 6000-dən çox tələbə arasında 14 xarici ölkədən gənclər var. Bu ali məktəbin məzunları 5 qitə və 33 ölkədə mütəxəssis kimi çalışır. Bu il Manas Universitetinin Türk Universitetlər Birliyinə başçılıq edəcəyini deyən rektor ATU-nun da bu birlikdə aktiv iştirak edəcəyinə ümidvar olduğunu bildirib.

Bu birlikdə ATU-nun da iştirak etdiyini vurğulayan G.Gəraybəyli keçən il olduğu kimi, bu il də Tibb Universitetinin nümayəndələrinin Manas Universitetinin tədbir və yarışlarında iştirak edəcəyini qeyd edib.

Türkiyənin Medicabil xəstəxanası ilə memorandum

ATU-nun rektoru professor Gəray Gəraybəylinin göstərişi ilə Tədris Cərrahiyyə Klinikasının baş həkimi professor Rauf Ağayev və tibbi koordinasiya şöbəsinin həkimi Aygün Abdullayeva qarşılıqlı əməkdaşlığın inkişafı məqsədi ilə Türkiyənin Bursa şəhərindəki Medicabil xəstəxanasına səfər ediblər. Nümayəndə heyəti xəstəxananın professorları ilə görüşüb, təmsil etdikləri tibb müəssisəsi barədə geniş məlumat verib.

Sonra iki tibb ocağı arasında akademik mübadilə və əməkdaşlığın genişləndirilməsi məqsədi daşıyan memorandum imzalanıb. Görüş zamanı idarəetmə məsələləri ilə bağlı fikir mübadiləsi aparılıb, birgə elmi tədqiqatlar aparılması, simpozium və konfransların keçirilməsi, təcrübə mübadiləsi imkanları müzakirə olunub.

Yaponiya ATU-ya qrant ayıra bilər

ATU-nun Tədris Cərrahiyyə Klinikasında Yaponiya Beynəlxalq Əməkdaşlıq Agentliyinin (JICA) nümayəndə heyəti ilə görüş keçirilib.

Tədbirdə universitetin beynəlxalq əlaqələr üzrə prorektoru Nadir Zeynalov ATU-nun beynəlxalq qurumlarla əməkdaşlığı barədə məlumat verib. Elmi işlər üzrə prorektor, dosent Rauf Bəylərov ATU-da aparılan elmi tədqiqatlar barədə danışıb, bu işlərin bir qisminin beynəlxalq təşkilatların dəstəyi ilə həyata keçirildiyini bildirib. Universitetin klinik bazaları haqqında məlumat verən Tədris Cərrahiyyə Klinikasının direktoru, professor Surxay Hadıyev elmi araşdırmaların tədris və müalicə ilə paralel surətdə aparıldığını, burada tədqiqat üçün lazımi şəraitin olduğunu qeyd edib. II Uşaq xəstəlikləri kafedrasının assistenti Sevinc Muxtarova JICA-nın qrantı hesabına Yaponiyada treninq-seminarda iştirakı ilə bağlı təəssüratlarını bölüşüb, onun layihəsi üçün nəzərdə tutulmuş avadanlığı iştirakçılara təqdim edib.

Yaponiya Beynəlxalq Əməkdaşlıq Agentliyinin Özbəkistanda yerləşən regional mərkəzinin müdiri Fuşimi Katsutoşi təşkilatın tarixi, qrant layihələrinin ayrılması prinsipi və müxtəlif dövlətlərin hökumətləri ilə əlaqələri barədə ətraflı məlumat verib, bu layihələrdə Azərbaycanın da iştirak etdiyini bildirib.

Türk professor təqdimatla çıxış edib

Tədris Cərrahiyyə Klinikasında İstanbul Medipol Universitetinin “Mega” Xəstəxanasının nümayəndələrinin iştirakı ilə “Xoşxassəli və bədxassəli şişlərə yanaşmalar” mövzusunda seminar keçirilib.

Toplantını açan klinikanın direktoru, professor Surxay Hadıyev bu cür tədbirlərin əhəmiyyətini vurğulayıb. Sonra “Mega” Xəstəxanasının Beyin və sinir cərrahiyyəsi bölməsinin rəhbəri, professor Nejat Akalan “Qlial şiş, cərrahi müdaxilə prinsipləri və yeni inkişafları” mövzusunda təqdimatla çıxış edib. Seminar çərçivəsində videokonfrans formatında hər iki universitet xəstəxanalarının həkimləri arasında müzakirə və danışıqlar aparılıb.

Tibb qəzeti.-2017.-fevral-mart.-S.7.