“Ozan” Çelyabinskdə Azərbaycan həqiqətlərini yayır

Rafael Quliyev: “Biz televiziyalara yol taparaq Xocalı soyqırımını tanıtdırırıq”

DÜNƏN “RİA Novesti” Beynəlxalq Xəbər Agentliyinin binasında Rusiyanın Çelyabinsk Vilayətində fəaliyyət göstərən “Ozan” Azərbaycan Mədəniyyət Mərkəzinin rəhbəri, Ümumrusiya Azərbaycan Konqresinin Çelyabinsk regional təşkilatının sədri Rafael Quliyev mətbuat konfransı keçirib. Konfrans “Ozan” mərkəzinin 10 illik fəaliyyətinin ildönümünə həsr olunmuş tədbirlər sırasında keçirilib. Rafael Quliyev bildirdi ki, “Ozan”ı yaradarkən qarşımızda bir fikir var idi ki, Azərbaycandan gələn soydaşlarımızı qarşılayaq, yerləşdirək. « Fəaliyyətə başladıqdan sonra hiss etdik ki, yeni vasitədən istifadə etməliyik. Bu məqsədlə də “Ozan” qəzetini təsis etdik və artıq 41-ci sayı işıq üzü görüb. İndi də hiss edirik ki, qəzetdən də artıq bir iş görməliyik. Başladıq kitablar, jurnallar çap etdirməyə. Bu gün Rusiyada elə bir ali məclis yoxdur ki, bizim səsimiz eşidilməsin. Qarşıda duran planlarımıza gəldikdə isə qeyd edim ki, Azərbaycan-Rusiya əlaqələrini inkişaf etdirmək üçün 2011-2012-ci illər üçün plan hazırlamışıq və bunun üçün də Azərbaycan Mədəniyyət Nazirliyinə müraciət etmişik. Biz, çalışırıq ki, azərbaycanlı biznesmenləri Çelyabinskə, onların biznesmenləri isə Azərbaycana sərməyə qoysunlar. Bu gün azərbaycanlı müəllim – professorlarımız, həkimlərimiz, biznesmenlərimiz Çelyabinskdə ilk onluğa düşürlər”.

Konfransda «Üç nöqtə»nin “Çelyabinskdə yaşayan ermənilərlə azərbaycanlıların münasibəti necədir və onlar hansısa problemlər yaratmırlar ki?” - sualını cavablandıran R.Quliyev bildirdi: “Onlar hər zaman bizim arxamızca gəlirlər. Ancaq çata bilmirlər. Onlar bizimlə rəqabət apara bilmirlər”. İkinci sualımıza - “Ozan” Azərbaycan həqiqətlərini və Xocalı soyqırımını necə təbliğ edir?” cavabı belə oldu: “Biz, Çelyabinskdə Xocalı soyqırımının, Azərbaycan həqiqətlərinin təbliğ olunması üçün xeyli işlər görmüşük. Qəzetimiz vasitəsi ilə təbliğat aparırıq, internet saytımız fəaliyyət göstərir. Bundan əlavə televiziyalarda materiallar yayırıq. Düzdür, müəyyən tapşırıqlar olur və problemlər yaradırlar. Ancaq biz müxtəlif vasitələrlə tapıb televiziyalara yol tapırıq və materiallarımızı yayırıq”.

Məhərrəm

Üç nöqtə.- 2010.- 25 dekabr.- S. 5.