Gənclərin kitaba marağı artır

Azərbaycan müstəqilliyini əldə etdikdən sonra əlifbanın dəyişməsi və digər məsələlər gənclərin ədəbiyyata marağını azaltdı. Bununla belə internetdən istifadənin də kütləviləşməsi kitaba qarşı bir laqeydlik yaratdı. Son vaxtlar gənclər arasında kitaba olan maraq artmaqdadır. Belə ki, xarici ədəbiyyatların və klassik Azərbaycan ədəbiyyatlarının latın əlifbasında dərc olunmasından sonra belə gənclərin ədəbiyyata marağı yaranır. Müstəqilliyimizi qazandıqdan sonra paytaxtda əsasən tələbələrin daha çox üz tutduğu Milli Kitabxana göz önünə gəlirdisə, son zamanlar qəsəbələrdə fəaliyyət göstərən kitabxanalarda da fəallıqlar müşahidə olunmaqdadır. Qəsəbələrdə sakinlərin kitaba olan marağını öyrənmək üçün Badamdar qəsəbə kitabxanasına üz tutduq. Kitabxana əməkdaşı Sədaqət Vaqifqızı suallarımızı cavablandırarkən bildirdi ki, son vaxtlar kitaba olan maraq artmaqdadır. Onun fikrincə kitabxanaya müraciət edənlərin əksəriyyətini gənclər təşkil edir. Həmçinin yuxarı siniflərdə oxuyan şagirdlər də kitabxanadan geniş istifadə edirlər. “Kitabxanaya müraciət edənlər müxtəlif yaş həddini əhatə etsə də əsas müraciət edənlər gənclərdir. Bununla belə qəsəbə ərazisində yerləşən 236 və 239 saylı orta məktəblərin 10-11-ci sinif şagirdləri də müraciət edirlər”. Sədaqət xanım onu da bildirdi ki, gənclərin maraqlandıqları əsasən xarici ədəbiyyatdır. “Yerli müəlliflərin əsərlərinə də müraciət edənlər çox olur”. S.Vaqifqızından kitab götürənlərin gündəlik sayını təxmini olaraq bildirməsini istədikdə isə qeyd etdi ki, iyirmi nəfərdən çox oxucu gün ərzində kitabxanaya müraciət edir.

Mədəniyyət və Turizm İdarəsinin səyyar kitabxana layihəsindən istifadə edərək kitab alınıb-alınmadığını Sədaqət xanımdan soruşduqda bildirdi ki, onun növbəsində heç bir oxucu səyyar kitabxana layihəsindən yararlanmayıb. Eləcə də kitabxananın problemlərinin, çatışmayan kitabların olub, olmadığını soruşduqda isə qeyd etdi ki, bir sıra kitablar var ki, bizdə yoxdur. “Bəzi kitablar var ki, oxucular müraciət etdikdə onları boş qaytarmaq məcburiyyətində qalırıq”.

Məhərrəm

Üç nöqtə.- 2010.- 20 noyabr.- S. 19.