“Qorxuram ki, xanımlar mənimlə yola getməsinlər”
Ramil Qasımov: “çətin xasiyyətli” olduğumu
da düşünürəm”
“Şənbə
qonağı”mız son günlər ən çox teatrsevərlərin
müzakirəsinə səbəb olub desək,
yanılmarıq. Fikrimcə, martın 27-də ifa etdiyi
Koroğlu obrazı ilə o teatrların
diqqətini cəlb edə bildi. İllər öncə
Bülbülün, Lütfiyar İmanovun oynadığı
obraza həyat verən qonağımız Ramil Qasımov
Koroğlunu özünün səhnə vəsiqəsi kimi
qiymətləndirdi. Gənc yaşında teatrda uğur qazanan
qonağımızla görüşümüz isə teatrda
deyil, tam başqa mühitdə baş tutdu.
- Maraqlıdır, niyə Ramil Qasımovla teatrda,
yaradıcı mühitdə deyil, məhz rəsmi iş
ortamında yəni ofisində görüşdük?
- Həmişə deyirəm
ki, mən xalqımın azad oğluyam. Uşaq
yaşlarımdan həmişə mənim bir amalım, məqsədim
olub. Azərbaycanın adını layiqincə dünyada təmsil
və təbliğ etmək. Bunu isə Musiqili Komediya
Teatrı çərçivəsində edə bilməzdim və
buna görə də qəti qərar verdim. Öz şirkətimi
qurdum, estrada teatrını yaratdım. Və vətənimin mədəniyyətinin
inkişafı uğrunda iri addımlarla irəliləyirəm.
Bu mənim qarşıma qoyduğum ən vacib məqsəddir.
Mən mütləq Azərbaycanı xaricdə təmsil etməliyəm.
Ona görə də bu ofisimdə öz işlərimi qururam.
Öncə onu deyim ki, “R&D” yaradıcılıq istehsalat
birliyi yanvar ayından etibarən fəaliyyət göstərir.
- “R&D” şirkətinin fəaliyyəti hansı
yöndə olacaq?
- “R&D” şirkətində
mədəniyyət yönündə müxtəlif işlər
görülür. Məsələn, birinci qolu “Biz Bakıdanıq” estrada sinfonik
orkestridir. İkinci qolu xeyriyyəçi
disklərin çıxarılmasıdır.
Qeyd edim ki, bu
lahiyə çərçivəsində
biz uşaq musiqi sənətində müstəsna
xidmətləri olmuş
Ahmet Şefeqin diskini çıxarmışıq.
Digər
üçüncü qolu
isə istedadlı gənclərin inkişafı
ilə bağlıdır.
Belə ki, biz istəyirik ki, Azərbaycanın hər bir bölgəsindən olan gəncləri bir yerə yığıb,
onların istedadlarını
üzə çıxaraq,
maarifləndirək. Düşünürəm ki, bunların hamısı cəmiyyətimizə
faydalı olan işlərdir.
- Sadaladığınız lahiyələr heç də asan başa
gələn işlər
deyil. Bu işdə dəstəkçinizin kim olduğunu bilmək istərdik...
- “Azerfon”, “Vodefon” milli dəyərlərimizə
qiymət verir, sponsurluq edir. Bundan başqa
isə bu sahədə mənimlə
işləyən Zemfira
xanım, Məmmədhüseyn
müəllim və Elməddin müəllimdir.
Hamımız əl-ələ verib, çalışırıq.
- “R&D” şirkətinin rəhbəri vəzifəsində
çalışmaq sizi teatrdakı yaradıcı fəaliyyətinizdən
ayırmır?
- Bilirsiniz, mənim
fikrimcə yaradıcı insan o şəxsə deyirlər ki,
o bütün sahələrdə çalışsın,
öz şücaətini göstərsin. Mən həm də
dirijoram, xor-dirijor təhsili almışam. Rəssamlıq bacarığım da var, gözəl rəsmlər,
fotolar çəkirəm. Yəni bunların hamısı
yaradıcılıq daxilindədir. Yaradıcı insan adi
insanlardan az da olsa fərqlənir. Çox işlərlə məşğul
olmur. Lakin mən öz işimi özüm etməyi sevirəm.
Həm də məndə işi aparmaq, liderlik
bacarığı var.
- 26 yaşında opera səhnəsində Koroğlu
obrazını yaratmaq heç bir ifaçıya nəsib
olmayıb.
- Mən artıq
“Koroğlu” obrazının mənə gətirdiyi uğuru
unutmuşam. Məncə belə də olmalıdır. Əgər
mən bütün günü desəm ki, ay mən belə
oynadım, ay mən ən gənc Koroğlu oldum, onda
inkişaf olmayacaq. Artıq mən Koroğlu barədə
deyil, edə biləcəyim yeni işlər haqqında
düşünürəm.
- O hansı işlərdir?
- (Bu an iş cədvəlini
bizə göstərir) İşlərimiz çoxdur. Məsələn,
Heydər Əliyev sarayında, Flarmoniyada, Sumqayıtda, Gəncədə
konsert proqramları, “Arşın mal
alan” tamaşasının yeni quruluşda səhnələşdirilməsi
və.s. Yavaş-yavaş həyata keçirməyə
çalışacam. Bundan başqa pedaqoji fəaliyyətimlə
də məşğul oluram. Aprelin 7-dən 11-dək mənim
tələbəm Yasin Həsənov Sank Peterburqda 11-ci Uşaq
Vokal Festivalında çıxış edəcək.
- “Koroğlu” obrazına hazırlıq prosesi nə qədər
vaxt apardı?
- Əslində mən
bu rola uşaqlıqdan hazırlaşıram. Çünki,
müəllimim Mobil Əhmədov
hər zaman “Koroğlu”dan müəyyən hissələri
öyrədirdi. Ancaq məhz bu tamaşaya hazırlığa
gəlincə isə, heç 2 ay tam hazırlaşmadım.
Opera və Balet Teatrı tərəfindən təklif gəldikdən
sonra yanvar ayının sonunda məşqlərə
başladım. Təccüblü görünsə də, cəmi
bir dəfə “praqon” oldu.
- Bildiyimizə görə, bu tamaşanı
Bülbülə həsr etmişdiniz?
- Bəli, mənim ifa edəcəyim
“Koroğlu” operası dahi Bülbülə həsr
olunmuşdu. Bu tamaşanı
ona görə Bülbülə ithaf etdim ki, onun ruhu şad
olsun, görsün ki, bu sənət, bu məktəb, bu nəsil
yaşayır, davam edir. Bəlkə də tamaşanı
Bülbül müəllimin ruhuna ithaf etdiyim üçün
bu qədər uğurlu alındı. Mən tamaşadan öncə
fəxri xiyabana gedərək Üzeyir Hacıbəylidən,
Bülbüldən, Lütfiyar İmanovdan xeyir dua aldım, məzarlarına
gül qoydum. Onlardan mənə halallıq vermələrini
istədim.
- Milli dəyərlərə, keçmişinə
bağlı insanlardansınız. Bəs texnologiyanın
inkişaf etdiyi bu zamanda milliliyi qorumaq çətin deyilki?
- Qeyd edim ki, mən
Avropa əsərlərinin burada təbliğinin çox əleyhinəyəm.
Niyə? Zənnimcə, biz daha çox milli
operalarımızı dünyada təbliğ eləməliyik.
Necə ki, Bakı Musiqi Akademiyasında Puççininin,
Verdinin klavirləri var, həmçinin, milli
operalarımızın notları dünyanın musiqi
ocaqlarında olmalıdır. Biz alnı açıq,
üzü ağ hər yerdə - istər Böyük Teatrda,
istər La-Skala Teatrında, istərsə də
dünyanın müxtəlif musiqi məkanlarında “Leyli və
Məcnun”, “Koroğlu, “Şahsənəm”, “Sevil”, “Nizami”,
“Vaqif”, “Natəvan” və digər operalarımızı
nümayiş etdirə bilərik. Çünki bu əsərlərimizdə
Azərbaycanın milli koloriti təcəssüm olunur.
- Əslində “Koroğlu” tamaşasının
anşlaq keçməsi hələ də teatra marağın
olduğunu sübut edir. Əgər elədirsə, bəs niyə
çoxları teatra marağın azalmasından şikayətlənir?
- Əslində teatra
maraq var, sadəcə olaraq insanları maraqlandıracaq teatrlar azdır. “Koroğlu”
tamaşasının biletləri bir həftə öncədən
satılmışdı. Çünki, 26 yaşında gəncin
“Koroğlu”nu oynaması marağa səbəb olmuşdu.
Düşünürdülər ki, görəsən, 26
yaşında gənc bu rolu necə oynayacaq? Sizə deyim ki,
tamaşaya gələnlər sırasında kritiklər də
var idi. Hansı ki, baxırdılar görsünlər mən
necə oxudum, oynadım. Allahın köməyi ilə
tamaşa uğurlu keçdi. Orada iştirak edən peşəkarlar
xoş sözlərini dedilər, təbrik etdilər. Polad
Bülbüloğlu mənə təbrik məktubu yazdı, səmimi
sözlərini bildirərək yüksək qiymətləndirdi.
Onu da deyim ki, Polad müəllimin anası Adelya xanım
(Bülbülün həyat yoldaşı – red) tamaşa
bitdikdən sonra mənə yaxınlaşaraq “Bülbüldən
sonra sevdiyim ikinci “Koroğlu” sən oldun” dedi. Mənim
üçün bundan böyük xoşbəxtlik ola bilməz.
Mənim üçün maddiyatdan çox mənəvi dəyərlər
önəmlidir. Çünki mənim maddiyyatım mənim
ifamdır.
- Gənc yaşda Koroğlu oynayan Ramil Qasımovu
yaxın gələcəkdə daha hansı obrazlarda görəcəyik?
- Düzü, hələlik
heç bir tamaşada oynamaq istəmirəm. Çünki, oynaya biləcəyim bir rol yoxdur. Pis çıxmasın,
amma mən artıq çox diqqətli olmalıyam.
“Koroğlu” kimi önəmli obrazın uğrundan sonra adi tamaşalarda iştirak edə bilmərəm. Çünki, “Koroğlu” mənim səhnə vəsiqəmdir. Həm də
ki, mən aktyor deyiləm, vokalçıyam. İnşallah gələcəkdə mənə
uyğun rol olsa oynayaram.
- Şəxsi həyatınızda vəziyyət
necədir?
- Sözsüz ki, hər
bir sənətçi kimi mənim də şəxsi həyatım
var. Ancaq mən şəxsi həyatımı gündəmə
gətirməyi sevmirəm. Təbii ki, bu barədə düşünürəm
və düşünəcəm də. Ancaq hələlik karyeram
barədə daha çox düşünürəm. Fikrimcə,
ilk öncə işimdə istədiyim yerə yüksəlməliyəm,
planlarımı reallaşdırmalıyam. Daha sonra ailə
haqqında düşünəcəm.
- Bəs Ramil Qasımovun seçimi həmkarları
arasından ola bilərmi?
- Hər
bir sahədə çalışa bilər.
Aktyor, müğənni, rəssam,
rəqqasə mənim
üçün heç
bir fərqi yoxdur. Necə deyərlər, sən
Leyliyə Məcnunun gözü ilə bax. Əsas odur ki, o, mənimlə yaxşı
olsun. Amma səmimi etiraf
edim ki, qorxuram ki, xanımlar
mənlə yola getməsinlər. Çox ambisiyalı
insanam. Hətta “çətin xasiyyətli”
olduğumu da düşünürəm. Yəqin bütün bunlar bürcümə görədir.
Ümumiyyətlə, oxatanlar
bir az
hökmranlıq etməyi
sevir. Ancaq düşünürəm ki, illər keçdikcə bu da düzələcək.
Aysər Həsənli
Üç nöqtə.- 2011.- 2 aprel.- S. 15.