IV Beynəlxalq Müasir Musiqi Festivalı yekunlaşdı

Festivalın 25 il əvvəlki təşkilatçıları bu dəfə tədbirə qatılmadı

Məlum olduğu kimi, bu ay ölkəmizdə Qara Qarayev adına IV Beynəlxalq Müasir Musiqi Festivalı keçirilib. 25 illik tarixi olan bu festival 1-8 aprel tarixlərində reallaşıb. Festival çərçivəsində elmi konfrans, həmçinin dünyanın tanınmış musiqiçilərinin konsertləri də təşkil olunub. Qeyd etdı ki, tədbir Mədəniyyət və Turizm Nazirliyinin təşkilatçılığı ilə baş tutub.

İlk dəfə Bəstəkarlar İttifaqı tərəfindən təşkil olunan festivalda bu il sözügedən qurum iştirak etməyib. Bu məsələyə münasibət öyrənmək üçün Bəstəkarlar İttifaqı ilə əlaqə saxladıq. İttifaqın mətbuat xidmətindən “Üç nöqtə”yə verilən məlumata görə onlar festivalda təşkilatçı qismində iştirak etmək istəsələr də, bununla bağlı heç bir təklif almayıblar: “Bununla bağlı bizə heç bir təklif gəlməyib. Əgər təklif edilsəydi, onda məmnuniyyətlə qəbul edərdik. Bildiyiniz kimi, Qara Qarayevin adını daşıyan ilk festival 25 il əvvəl baş tutub. Qara Qarayevlə bağlı 25 il əvvəl keçirilən elə həmin festivalın təşəbbüskarı, təşkilatçısı da məhz Firəngiz xanım Əlizadə olub”.

Bu məsələyə qarşı tərəfin də mövqeyini öyrənmək üçün Mədəniyyət və Turizm Nazirliyinin incəsənət şöbəsinin müdiri Fərəh Əliyeva ilə də əlaqə saxladıq. Qara Qarayev adına IV Beynəlxalq Müasir Musiqi Festivalının təşkilatçıları sırasında olan Fərəh xanım festivalla bağlı Bəstəkarlar İttifaqına təklif göndərilmədiyini söylədi: “Hansısa tədbirdə iştirak etməyin iki yolu var. Ya bilet alırsan, ya da ki, dəvətnamə ilə gedirsən. Biz isə insanların maddi durumunu nəzərə alaraq açıq qapı elan etmişdik. İstəyən hər bir kəs gəlib iştirak edə bilərdi. Bəstəkarlar İttifaqına isə xüsusi olaraq dəvətnamələr göndərmişdik. Amma Firəngiz xanım həmin ərəfədə Bakıda yox idi. Bir də ki, hamının hər yerdə təşkilatçı olması vacib deyil ki... Bildiyiniz kimi Qara Qarayev adına IV Beynəlxalq Müasir Musiqi Festivalı Mədəniyyət və Turizm Nazirliyi tərəfindən təşkil olunmuşdu. Ancaq yenə de deyirəm hər bir kəs rahatlıqla orada iştirak edə bilərdi. Onu da deyim ki, biz Bəstəkarlar İttifaqı ilə birgə çox sayda tədbirlər keçirmişik. Yəni burda problemə səbəb olacaq heç bir məsələ yoxdur”.

Xatırladaq ki, Qara Qarayev adına IV Beynəlxalq Müasir Musiqi Festivalına 10 ölkədən musiqi kollektivləri, ifaçılar və musiqişünaslar qatılıb. Festivalın açılış və qapanış mərasimləri Azərbaycan Dövlət Filarmoniyasında keçirilib.

Üç nöqtə.- 2011.- 12 aprel.- S. 13.