Macar-Azərbaycan Dostluq Cəmiyyətində görüş keçirilib

Səfir Vilayət Quliyev cəmiyyət üzvlərinin 90 faizinin macarlardan ibarət olmasını yüksək qiymətləndirib

Budapeştdə «Millətlər Evi»ndə Macar-Azərbaycan Dostluq Cəmiyyəti (MADC) Azərbaycanın Macarıstandakı səfirliyinin əməkdaşları ilə üzvlərinin görüşünü görüş təşkil edib. Cəmiyyətin sədri Svetlana Abdullayeva qurumun üzvlərini təqdim edərək bildirib ki, 1994-cü ildən fəaliyyət göstərən MADC Azərbaycanın tarixi və bu günü, qədim adət-ənənələri, milli bayramları, dövlətimizin qazandığı nailiyyətlər barədə informasiya yaymağı qarşısına məqsəd qoyub. Macarıstanda təhsil alan tələbə Rəşad Mehbaliyevin ucnoqta.az-a verdiyi məlumata görə, tədbirdə çıxış edən qurumun üzvləri təşkilata nə zaman və hansı məqsədlə üzv olmalarından, bu müddət ərzində Azərbaycan barədə təsəvvürlərinin nə dərəcədə genişlənməsindən və Macarıstanda ölkəmizə marağın durmadan artmasından söz açıblar. Cəmiyyətin təşkil etdiyi müxtəlif tədbirlərə, onun fəaliyyət sahəsinə, habelə ölkələrimizin və mədəniyyətlərimizin qarşılıqlı yaxınlaşmasına maraq göstərən çoxsaylı insanlar arasında ayrı-ayrı peşə sahibləri var. Cəmiyyətin üzvləri Azərbaycan səfirliyinin təşkil etdiyi tədbirlərdə yaxından iştirak edirlər. Azərbaycanın Macarıstandakı fövqəladə və səlahiyyətli səfiri Vilayət Quliyev bildirib ki, cəmiyyətin fəaliyyətinə yaxşı bələddir, xalqlarımızın bir-birini yaxından tanımaları məqsədi daşıyan ümumi işə qurumun hər bir üzvünün şəxsi töhfəsini yüksək qiymətləndirir: «Sevindirici haldır ki, cəmiyyət üzvlərinin 90 faizi macarlardan ibarətdir. Azərbaycanı sevən bu insanlar ölkəmizlə bağlı səmimi hisslərini bundan sonra da dostlarına, həmkarlarına və ailə üzvlərinə aşılayacaqlar».

V.Quliyev Diasporla İş üzrə Dövlət Komitəsinin dəstəyi ilə ötən il macar dilində çapdan çıxmış üçcildlik topludan söz açaraq bildirib ki, nəşrdə Macarıstanda tanınan gənc Azərbaycan müəlliflərinin qələminə məxsus, onların keçmiş və gələcəklə bağlı mülahizələrini, Vətənin ağrılı-acılı və şad günlərini əks etdirən hekayə, povest və esselər, habelə qədim Azərbaycan diyarı Qarabağın zəngin mədəniyyəti barədə sənədli materiallar yer alıb. Bu qəbildən maraqlı layihələr gələcəkdə də həyata keçiriləcək. V.Quliyev tədbirdə iştirak edənlərə, Azərbaycan və macar xalqlarına uğurlar və tərəqqi arzulayıb.

Elməddin

Üç nöqtə.- 2011.- 1 fevral.- S. 6.