Müğənni Rüfət Mehtiyev vəfat edib

Bu gecə saat 03. 00 radələrində tanınmış azərbaycanlı müğənni Rüfət Mehtiyev qəflətən dünyasını dəyişib. Mərhumun yaxınlarının dediyinə görə, müğənni beyinə qansızmadan vəfat edib.

Mərhumun dostlarından biri, Azərbaycanın tanınmış jurnalisti Vüqar Vüqarlı Milli.Az xəbər portalına bildirib ki, Rüfət Mehtiyev televizora baxarkən dünyasını dəyişib.

"Mənə onun ölüm xəbərini deyəndə inanmadım. Hətta telefonda mənə zəng edən şəxsə də dedim ki, belə yersiz zarafatlardan xoşum gəlməz. Amma sonra bildim ki, Rüfət düynasını dəyişib. Rüfət çox gülərüz, xoş bir insandı. Onunla bağlı ancaq xoş xatirələrim var", - V.Vüqarlı dedi.

R.Mehtiyev "8-ci kilometr" yaşayış massivindəki qəbristanlıqda dəfn ediləcək.

Mərhum müğənninin yas mərasimi onun Məhəmməd Hadi, 29 ünvandakı evində keçirilir.

Dəfn mərasimi bu gün saat 14.00-da olacaq.

Aldığımız məlumata görə, Rüfət Mehtiyev qan təzyiqinin qəfil yüksəlməsi və insult nəticəsində dünyasını dəyişib. Çağırılmış təcili yardım briqadası Rüfəti xilas edə bilməyib.

Onun iki uşağı qalıb.

Xatırladaq ki, Rüfət Sabir oğlu Mehdiyev 7 iyul 1969-cu ildə Bakıda anadan olub. 26 Bakı Komissarı adına Mədəniyyət sarayının piano sinfində (1976-1986), Azərbaycan Dövlət Universitetinin geoloji coğrafiya fakültəsində təhsil alıb (1986-1992). 1989-cu ildən musiqi ilə məşğuldur. 1992-ci ildən müğənnilik edir. "Space" Televiziyasında hazırlanmış “Qış Nağılı” (2004) və “Baharın Nağılı” (2008) film-verilişlərində çəkilib.

Allah rəhmət eləsin!

Üç nöqtə.- 2011.- 2 fevral.- S. 13.