Amerikalı alim erməni soyqırımını ifşa etdi

Amerikalı tarixçi professor Castin Makkarti London «School of Economics» universitetində «Türk – erməni münasibətləri: kortəbii baxış, aldatmaq və erməni problemi» adlı konfrans keçirib. Tarixçi alimə görə Türkiyədə erməni məsələsində baş vermiş problemlərin mənbəyi İngiltərə və Amerika mətbuatında dərc olunan subyektiv məlumatlardır. Konfrans iştirakçılarına belə nəşrlərdən nümunələr təqdim edən Makkarti Türkiyə barədə bu mövzu ilə əlaqəli karikaturaları da göstərərək beləcə Osmanlı və Türk imicinin mənfi əks etdirildiyini vurğulayıb. Sürgünün və iddia olunan digər hadisələrin baş vermədən qərb mətbuatında yayıldığını deyən Makkarti bunların həqiqət olmadığını deyib.

Bu illərdə İngiltərə və Amerika mətbuatının bölgədə müxbiri olmadığını deyən tarixçi xəbərlərin ermənilər tərəfindən verilən səhv məlumatlarla hazırlandığını bildirib. Osmanlı tərəfindən məlumat almadıqları üçün subyektiv nəşrlər hazırlandığını bildirən alim bu xəbərləri hazırlayanların öz xəyal güclərindən istifadə etdiyini deyib: «Erməni missionerlər tərəfindən yazılan bir çox kitablar da həqiqəti əks etdirmir. Öz rəvayətlərini özləri yaradıblar».

«Milliyyət» xəbər verir ki, konfrans zalında olan ermənilər isə deyilənlərə etiraz edərək Castin Makkartini və türk dinləyiciləri təhqir edib. Xatırladaq ki, Castin Makkarti 1770 – 1923-cü illərdə Balkan, Qafqaz regionu və Krımda 5 milyon osmanlının, buna müqabil 1.9 milyon xristianın köçə məcbur edildiyini göstərən xəritə hazırlayıb.

Hüseyn

Üç nöqtə.- 2011.- 8 fevral.- S. 3.