Tanınmış rəssamlarımızın məşhur əsərləri sığortalandı

“İçərişəhər” Dövlət Tarix-Memarlıq Qoruğu İdarəsi tərəfindən satın alınmış Azərbaycanın məşhur rəssamlarının əsərləri “Standard Insurance” Sığorta Şirkəti tərəfindən pulsuz olaraq sığortalanıb. İdarədən verilən məlumata görə, sığortalanan rəsm əsərləri arasında Toğrul Nərimanbəyovun “Bakı Qədim Şəhər”, Tofiq Kərimovun “Qız Qalası”, Elbəy Rzaquliyevin “Şirvanşahlar Sarayı” və “Köhnə Küçə”, Hafiz Məmmədovun “Qoşa Qapı”, Rafiq Mehdiyevin “İçərişəhərdə”, Eyyub Məmmədovun "Şirvanşahlar”, Mahmud Tağıyevin “İçərişəhər”, Böyükağa Mirzəzadənin “Qala” və “Qız Qalası” kimi əsərləri yer alır.

Milli rəssamlıq sənətinin inkişafında xüsusi xidmətləri olan bu istedadlı sənətkarların İçəri Şəhərin tarixi abidələri və müxtəlif görüntüləri əks olunan əsərlərində bu qədim məkanın tarixi ruhu rəsm dili ilə özünəməxsus tərzdə ifadə olunub. “İçərişəhər” Dövlət Tarix-Memarlıq Qoruğu İdarəsi özəl şirkətlərin Azərbaycanın tarixinə, mədəni irsinə və incəsənətinə göstərdikləri qayğını təqdir edir və gələcəkdə bu cür təşəbbüsləri dəstəkləməyə hazır olduğunu bildirir.

Üç nöqtə.- 2011.- 22 fevral.- S. 13.