«Kəlbəcər» kitabı yenidən nəşr edilib

Məzahir Təhməzov: «Kitabın rus və ingilis dilinə tərcümə edilməsi də nəzərdə tutulub»

İllər keçdikcə Azərbaycanın işğal altında olan torpaqlarının dəyərini, respublikamız üçün iqtisadi əhəmiyyətinı daha artıq hiss edirik. Məlum məsələdir ki, Azərbaycan torpaqlarının 20 faizi işğal altında olmasaydı, ölkəmizin iqtisadi gücü, əhalinin həyat səviyyəsi indikindən dəfələrlə yaxşı olardı. Torpaqlarımızın gec-tez işğaldan azad olunacağına şübhə yoxdur. İşğal nəticəsində ölkəmizə vurulan maddi ziyan da bərpa ediləcək. Amma əsas məsələ bu gün böyüyən gənc nəslin yaddaşından həmin torpaqlar haqqında təsəvvürün yaradılması, o rayonların yer və yurd adlarının unudulmamasıdır. Bunun üçün əsas iş həmin rayonlardan olan insanların üzərinə düşsə də, amma ziyalılar, şairlər, yazıçılar, elm adamlarının da üzərinə müəyyən məsuliyyət düşür. İndiyədək işğal altında olan rayonların hər biri haqqında xeyli kitab yazılıb.

Kəlbəcər rayonu, bu rayonun təbii ehtiyyatları haqqında da bir neçə kitab çap olunub. Bu günlərdə Məzahir Təhməzovun müəllifi olduğu «Kəlbəcər» kitabı yenidən nəşr edilib. Kəlbəcər rayonu haqqında məlumatlar, rayonun yer, yurd adları, yer adlarının mənası əks olunan kitab gənc nəsil üçün çox dəyərlidir. Kəlbəcərin yeraltı və yerüstü sərvətləri, uzun illər təbii sərvətləri tədqiq edən, axtarıb tapan geoloqların məlumatları əksini tapıb. Hər kəndin ağsaqqallarının kəndləri, kəndlərdəki yer adları, bulaqları, çayları, dağları barədə verdikləri bilgilərə daha çox yer ayrılıb. Eyni zamanda Kəlbəcər rayonun təbiətini əks etdirən fotoşəkillərə, rayonun işğaldan əvvəlki görüntülərinə yer verilib. Kitabın ən önəmli əhəmiyyəti isə Kəlbəcərin kəndlərinin sxematik inzibati-ərazi xəritələrinin verilməsidir. İlk dəfədir ki, rayonun kəndlərinin sxematik inzibati-ərazi xəritəsi yer və yurd adları dəqiq göstərilməklə təsvir edilib.

Kitabın müəllifi Məzahir Təhməzovun sözlərinə görə, kitabın yeni nəşrində bir sıra yeniliklər edilib: «Kitabda Kəlbəcər rayonu və kəndlərlə bağlı şəkillərin sayı artırılıb. Həmçinin, işğaldan sonra çəkilən bəzi şəkillər kitaba əlavə edilib. Kəlbəcər rayonunda tarixi-memarlıq abidələrinin şəkilləri yerləşdirilib. Yer adlarına da əlavələr edilib. Kitabın yeni nəşrində Kəlbəcər rayonunda qayaüstü rəsmlərdən olan fotoşəkillərə də yer ayrılıb».

M.Təhməzovun sözlərinə görə, kitabın rus və ingilis dilinə tərcümə edilməsi də nəzərdə tutulub.

Qeyd edək ki, kitabda 1993-cü il Kəlbəcər faciəsi - Kəlbəcərin erməni işğalçıları tərəfindən işğal edilməsi haqqında məlumat verilib. Bu kitabın gənc nəsldə Kəlbəcər rayonu, onun gözəllikləri barədə ətraflı təəssürat yaradacığı şübhəsizdir.

Xalid

Üç nöqtə.- 2011.- 16 mart.- S. 14.